【塔羅個案】「我能夠為死去的人開牌嗎?」

文教 / 最新文章綜覽

 

塔羅牌可以幫你解答生活疑慮,不過某啲問題就唔問得的,例如係「我幾時發達」呢種 Open Question 或者「咩號碼中六合彩」呢啲博彩嘅問題(我知嘅仲會話你知咩 LOL)

試過遇過客人黎問「幾時世界末日」同埋「世界上有無鬼」呢種簡直將我當先知看待嘅問題,實在太抬舉我,我答到你就變預言家了。

不過,問呢啲問題嘅客人,不全然是存心玩嘢,當中亦有真心求解嘅朋友,雖然大部分時候我聽到呢啲「唔問得嘅問題」會哭笑不得,但係我對 Tracy 呢個個案卻感觸良多。

Tracy 打扮樸素,準時到來,對我禮貌微笑。佢並無轉彎抹角,「我想問屋企人嘅事。」

如何改善家人關係,亦係店裡常見問題,我靜心聽 Tracy 講佢嘅故事。

Tracy 出身小康,同屋企人關係不過不失,不過同媽媽嘅關係就比較火星撞地球。

「我有主見,但媽媽亦都好霸道,好多時都要我聽哂佢枝笛去做事。」Tracy 淡淡然地描述母女間嘅事情,「以前細個無得揀,讀咩學校、揀咩科、學咩興趣班,都係媽媽話事;到我大個啦,我就覺得,唔係話佢嗰套唔好,但係我唔想比佢控制我嘅人生,有啲嘢我想試我想做嘅,係咪都要放手比我去做呢?」

Tracy 口中想做嘅事,其實都只係到日本留學而已。

「留學有咩問題?媽媽咁都反對?」
「佢覺得去英美留學先叫做好。」

Tracy 最後說服咗爸爸,成功完成日本留學準備;呢段時間入面,媽媽一直同 Tracy 有少少面阻阻,一直話個女喺日本讀完書返黎都唔會對搵工有咩幫助,好擔心佢前程云云。

而喺 Tracy 到達日本幾日之後,佢媽媽因爲喺街度暈咗,入咗醫院。一輪檢查之後,原來佢患有血癌。

「家人怕影響我學習,協議唔將呢件事話比我知。」

不過,Tracy 都好快覺得奇怪,打親電話返屋企,阿媽唔係「出咗去」就係「瞓左啦」;打媽媽手提,又聽到周圍嘅聲,唔似係公司做緊嘢嘅聲,有一次仲聽到啲咩「量血壓呀」嘅對話。

於是,Tracy 向學校告假,悄悄地返左香港,終於知道母親患病的事;去到醫院,媽媽微笑,笑住講一句「妳衝返黎做乜,學費好貴架」,Tracy 只係心痛,面對住明顯變得憔瘁嘅媽媽,Tracy 好後悔,開始責怪自己無聽話留喺香港,責怪自己之前仲同媽媽頂嘴。

但係事情好似有好轉,醫院話好似有合適嘅骨髓可以移植,而見到媽媽仲可以談笑飲食,Tracy 始終掛心日本學業,喺屋企人支持下,都係返咗日本。

然而,事情不如人願。母親進行移植手術之後,出現排斥反應,加上肺部受到感染,陷入昏迷。Tracy 接到屋企聯絡,建議佢「不如都係返黎香港一陣先」。

Tracy 二話不說訂機票,但無諗過回港之時,遇上東京大風雪。佢困喺羽田機場,班機延誤到唔知幾時,結果比預計時間遲咗兩日先返到香港。

「我返到黎嘅時候,母親已經係彌留狀態。」Tracy 閉上雙眼繼續講,我知道佢強忍淚水,我只係將紙巾輕輕放在佢面前,「我個心好亂,好想佢醒返望住我,好想佢好似以前咁中氣十足同我頂嘴,話我唔生性,話我唔聽話,話我任性;我好想同佢講,我唔任性啦,我咩都聽哂你話,媽咪,求下你,唔好走,求下你,我寧願你繼續日日哦我。」

萬般說話,堆在喉頭,尚未出口,病人拔去喉管,突然像斷了線的玩偶,頹然放鬆,終止了呼吸。

「其實,我知道我咁樣問好傻,」Tracy 淚水滑落,「但係,我可以開牌,問下媽媽而家過得好唔好?我可唔可以叫佢放心?我可唔可以話佢知,我會照顧自己,我會過得好好,我好掛住佢,同埋,好對唔住?」

Tracy 開始哭泣,我不作聲,也不禁拿過一張紙巾,抹去眼眶濕潤。

為故人開牌,我當然是做不到的;而 Tracy 事後亦坦白,佢都知道開牌是不可能問到呢啲事情。不過,佢係我朋友介紹黎的,佢喺朋友口中,知道我曾經歷和她類似的喪母之痛,呢一刻,佢喺悲傷嘅困局當中,對母親充滿思念及愧疚,佢唔知點樣行返出黎。

所以,其實,佢並唔係黎開牌,佢只係黎搵我,得到情感上嘅共鳴。

關於我自身嘅事,我就唔著墨太多,但係我同 Tracy 講,有啲事情,發生了,或會成為遺憾,但如果母親是疼愛自己的,無論當時佢用嘅方式,是否由我們接受都好……

「佢絕對唔會希望見到你抱住自責嘅心情生活下去,同樣道理,如果母親因為生病離開,佢覺得自己不能繼續看顧你成長下去而感到自責,作為女兒的妳,同樣會感到心痛吧?」

Tracy 不作聲,眼淚像缺堤。

最後,Tracy 形容佢今次黎搵我,「好似睇心理輔導咁,個人鬆返少少。」不過,今次寫呢篇文章,我並唔係鼓勵其他有同樣苦痛嘅客人黎搵我,我是開塔羅牌的,在個案中滲雜過多個人情感,就不專業了;如果真的有情緒困擾的朋友,我還是建議求醫,或者尋找專業人士幫忙。

至於如何面對已經離世的、重要的人嗎?

母親離開我以後,我沉寂了一段時間,情緒困擾多年,午夜夢迴,至今難捨。但係,我亦學懂兩件事,就係珍惜眼前人,以及善待自己。

願與有類似經歷的朋友共勉之。

 

【塔羅牌個案分享】

後生女教友畀已婚傳教士搞大個肚唔認數

「我想分手,佢話唔好,不如去開房;然後我覺得佢仲愛我」

你話想生仔我咪唔避孕囉,我家下有咗你就叫我落?

名校老師婚外情的故事

四年入面,我睇住個客拍拖、結婚再離婚。

 

關於作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

我有回應

則留言

閱讀後覺得好,請多多讚好及分享~:)

其他熱門文章

  • 如果你令女兒相信自己係公主…… by Dr. T
    我們先不要討論好男仔存在與否,姪女我見過,全面每部位都有幾粒暗瘡另加單眼皮/扁鼻/冇眉娘呢個組合相信好難歸類為大美人。特別的地方是姪女非常了解自己是叻女這個道理,所以亦對號入座地認為自己不是張愛玲就是林燕妮,最愛用organic香薰油自硏手…
  • 劣質調情 by 文士琛
    當初我一直以為他們都是單身的。為什麼?因為他們每天都在肆無忌憚地打情罵俏。我公司陰盛陽衰,眾女的焦點都落在一個叫阿臣的男同事身上。阿臣二十多歲,外形普通過普通,而他的確是那種日夜碌著手機追趕潮流玩意一有空就睇波賭波的典型港男。作為一個adm…
  • 「我老豆叫我delete左個facebook account」 by 宇治金時
    「老豆其實都係一個月前先知道有facebook呢樣野。佢根本跟唔到個時代,更加唔知我諗乜,或者呢d就係所謂既generationgap啦,唔了解,唔願意去了解,郁d就想將d野由有變無,佢話無左就無發生過,即係唔存在喎。煩野點可以唔存在,唔s…
  • 【辦公室之男親女愛】如果有人匿名打上公司 HR 爆料揭發奸情,你會點做? by HR 扮工週記
    話說有一日小編收到一個電話,電話另一邊嘅男人自稱係匿名嘅爆料男。佢話公司嘅家英哥同道德妹有奸情,仲話家英哥已經有家室,係唔應該咁做,所以想我哋人事部阻止佢哋繼續錯落去,仲話家英哥個老婆都知道左,隨時會上黎公司捉奸………
  • 偷食的人有難了:我用GPS追蹤男友(一) by B612
    從來都唔會主動講密碼俾我聽,就連喺我面前解鎖手機都會遮遮掩掩。唔係身有屎嘅,怕咩俾人知?佢越係神神秘秘,我就越覺得佢想要嘅,唔止係私隱咁簡單。果然,一齊咗未夠兩年,就發生咗一連串令我哋無辦法繼續一齊嘅事………
歡迎讚好我們的facebook page,免費資訊源源送上。