【塔羅個案】女人就黎三十歲仲係 A0 係咪就叫有問題?

文教 / 最新文章綜覽

 

你見到呢個題目,可能會心諗「唔會下嘛?」,亦都可能會內心戚然,身同感受。點解感覺會有咁大落差?咁每個人成長環境,性格同目標都有唔同,無得用同一準則去量度嘅。

好多客人同 Annie 一樣,廿歲尾三十頭咁樣,有份不過不失嘅工作,有幾個真心相交嘅姐妹,耐唔耐去下旅行,過住平凡踏實嘅生活。

你問 Annie 開唔開心?又無話唔開心嘅,朋友我有呀,份工麻麻地、但又唔算好差,但係,隨住年紀漸長,身邊啲姐妹開始結婚啦,一直未拍過拖嘅 Annie,你話個心無嘢就假嘅。

「有時我都幾憎啲社交網絡架!」Annie 苦笑住咁講,「雖然咁講好小心眼,但係當我喺網上面見到啲以前喺學校出名樣衰或者性格騎尼嘅女同學,都陸續開始拍拖結婚勁放閃,我嘅心情真係好複雜,自信心⋯原本都無乜架啦,但睇完啲相之後,真係會跌至谷底架。」

睇到呢度,你地唔好話 Annie 份人心胸狹窄乜乜物物,因為我都幾肯定,在座大部分人,一定都喺唔同層面食過舊朋友花生的。我反而欣賞 Annie 咁老實,要知道坦白,對我幫你開牌係好有幫助的。

回到正題,咁 Annie 衰咩呢?生得平凡是罪嗎?不喜歡與陌生人打交道是罪嗎?懶得打扮是罪嗎?有要求是罪嗎?身邊的交友圈子以女性為主,這也是罪嗎?

以上,當然不是罪;但全部狀況加在一起的話,就是一個問題。

唔扮靚,無嘢的,素顏都可以靚女或感覺清爽的大有人在,不過,呢一點都係需要有點自知之明的,以我為例,我嚴重黑眼圈,眉毛薄,面超圓,身型圓碌碌,唔稍作打扮的話,我應該會嚇走啲客的。

無論男女,人類始終係好依賴第一觀感嘅動物,如果你係女性,你見到一個男仔觀感唔乾淨企理,你都會不禁皺眉吧?當你身邊嘅女性都花心機打扮自己嘅時候(過哂火嗰啲就唔講啦),面前出現一個異性,對方嘅眼光應該很難第一時間落在你身上的。

你可能會話「神婆,你又話有麝自然香嘅?做咩而家叫人打扮先?」係架,有麝自然香呢一點,我一直認同支持的,但要了解你到底有幾香,係需要時間的;點樣做到令人想去了解留意你,咁先能夠開始第一步的。

香港女多男少,先唔計讀女校出身嘅朋友,相信大部份朋友於職場上,應該還是以女同事為大多數的,所以,少機會接觸異性,從而令自己少咗去同人交往嘅機會,呢一點我絕對理解。

但係,當你靜待機會出現嘅時候,還是需要作出相應準備的,好似 Annie 嘅例子,佢做保險公司後勤,上司係阿姐,條 Team 都係女仔,佢仲要女校出身,咁,佢點搵機會呢?

又不如咁講,機會唔主動黎搵你,其實可以考慮自己去搵機會。如果缺乏情場經驗,當然我唔會推介你玩容易遇上桃色風險嘅交友 App;但係,如果係參與工餘活動、進修、甚至多啲參與朋友之間嘅聯誼會,其實,還是會有機會的。

我所講嘅機會,唔係叫你每認識一個男性,都以「拍唔拍到拖」為大前題;我嘅意思係,與人相處,是一種學習,以「擴闊自己交友網絡」為大前題,比自己慢慢習慣返認識新朋友甚至係同異性相處嘅心態,都係單身已久嘅朋友,可以做的一點準備。

Annie 好聽話呀,佢大半年前黎搵我,我同樣地對佢講返以上嘅說話;結果佢開始妝扮返自己,亦報咗啲短期課程,識返啲人。而家?佢剛剛開始有拖拍,雖然佢面對第一次嘅關係非常緊張,不過,總算是一個好開始。

所以,一直單身,不是一個問題,有啲人係鍾意咁樣;亦有好多原因,令到一個人焗住係咁樣。不過,當你想改變現狀,由自身出發,還是會有解決辦法的。

 

【塔羅牌個案分享】

後生女教友畀已婚傳教士搞大個肚唔認數

「我想分手,佢話唔好,不如去開房;然後我覺得佢仲愛我」

你話想生仔我咪唔避孕囉,我家下有咗你就叫我落?

名校老師婚外情的故事

四年入面,我睇住個客拍拖、結婚再離婚。

中環高薪厚職女強人求愛篇:我一覽眾山小,但係⋯⋯

有種客人的確可以活得 Single and Fabulous

 

關於作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

我有回應

睇完文有嘢想講?入嚟Gööp嘅「輔仁文誌」社群講兩句啦!可以匿名發言﹑即時睇文,輔仁專屬嘅討論空間。

即上iOS App Store/Google Play下載「Gööp」手機程式,碌緊手機嘅讀者可以立即開啟
註冊成為用戶後,輸入社群邀請碼: vjmedia 即可加入,入面見!

則留言

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。