【神婆雜談】客人分享特集:超低手男性搭訕女仔開場白&手法

 

唔知在座各位朋友有無被人搭訕嘅經驗?我覺得「搭訕」呢樣嘢真係一門學問黎,喺街邊有人埋黎叫你「幫手填份問卷吖」呢一種唔計,我指嘅搭訕,係對方擺明有意圖地搵你 R 水吹(無論係想識你、定係想叫你買嘢都好啦),總之就係「無嘢搵嘢黎講」,務求同你打開話題。

不過,好多時人都係會高估自己嘅說話技巧,或者係低估一眾女士嘅智慧的;今日我就同大家分享一啲都幾令人白目嘅搭訕手法或者開場白,當中有啲係我個人經歷,有啲就係客人同我開心 Share 的,聽聽埋埋,不如寫出黎分享,作為大家茶餘飯後嘅笑料又何妨。

 

(1)明知故問篇

舉個例子。Macy 擺咗張去食 Lady M 期間限定蛋糕嘅相上 Facebook,仲要 Hashtag #LadyM 咁樣,真係應該除咗盲嘅都絕對知佢食緊 Lady M 架啦。所謂明知故問,就係個男仔……姑且叫佢做阿明,阿明為咗同 Macy 搭話,想留言又唔知講咩,於是佢留咗一句「Lady M 蛋糕?」嘅留言諗住實無死啦。

係呀,實無死架,不過 Macy 會唔知比咩反應你好,其他網友見到都會心諗做乜勁咁樣。假設你明知 Macy 食緊蛋糕架啦,咪留一句「喂我都想食呢隻味!!」之類,咁咪開到話題囉。做乜要明知故問啫?

 

(2)扮哂專家篇

如果你覺得「明知故問」已經夠難頂,我諗大部份女性會更加討厭「扮哂專家」嘅搭訕手法。

同樣地用返面「Macy 食蛋糕」嘅例子,當大家都係比下心心、哈哈或者留言「#肥」「無份」「好似好好味」呢種基本網路溝通嘅時候,有時會有啲男性想突出自己,於是會無啦啦喺人地張相下面留幾行字嘅留言,例如係「千層蛋糕嘅基本材料其實係乜乜,整法其實係乜物,我整過唔難整,差唔多味。」咁樣。

對唔住呀,人地唔係想聽呢啲呀,人地唔會因此覺得你識整蛋糕係暖男黎架,除非人地本身對你有好感架咋!如果你只係想識人、想混熟,一黎就認叻扮專家,根據我個客阿 Macy 嘅講法,你只會落得「呢啲做朋友都無望呀!佢即係話自己勁過人地間蛋糕店呀?」咁嘅下場架咋!

 

(3)瓊瑤上身無限 FF 篇

講咗兩個網上嘅分享,我黎分享一個親身喺街經歷嘅。話說某年平安夜,約咗中學姐妹食飯,我喺 Sogo 後面等緊朋友嘅時候,無啦啦有個 Gel 頭 Gel 到硬到、我離遠都聞到佢啲髮膠味嘅男仔行埋黎。

「小姐,我望咗你好耐,有無人同你講過,你著到成身黑色咁,好有性格,好有賽車手嘅味道?」

正當我準備反白眼再行開嘅時候,佢繼續講,「你唔好介意呀,我只係覺得香港好少咁有個性嘅女仔,會著到全身黑色咁,同我真係好夾,我覺得我地有緣份。」

一,老娘我嗰期食肥咗,加上見姐妹求其著,先會著哂啲黑衫黑褲,一陣食多咗都無咁覺;二,我環觀企喺我附近嘅男男女女,冬天嘅銅鑼灣街頭,淨係企我隔離個妹豬都一樣係黑衫黑褲,仲幾靚女添。

我忍唔住笑出聲,「Sorry 你認錯人。」

「你唔信緣份?你唔覺得未開始認識就放棄一個機會好可惜咩?」

 

嗱,以上呢件真人真事,到今日仲係我班姐妹群入面嘅出色笑話,當然,大街大巷搭訕,我必須佩服佢勇氣可嘉,但自信過了頭便是柒了。

講咗咁耐,無非都係想奉勸各位男士,真係傾到計嘅,其實你係唔需要諗藉口搭訕的,特別喺香港呢個大家對陌生人好多時都心存警戒嘅社會,開錯咗個頭,你就真係回不去了。

我聽過嘅奇怪搭訕方式,當然仲有好多,不過今次就寫住咁多先;下次邊位靚女客黎搵我時,我都歡迎你繼續同我分享趣事架~

 

【塔羅牌個案分享】

關於作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

我有回應

則留言

閱讀後覺得好,請多多讚好及分享~:)

其他熱門文章

  • 如果你令女兒相信自己係公主…… by Dr. T
    我們先不要討論好男仔存在與否,姪女我見過,全面每部位都有幾粒暗瘡另加單眼皮/扁鼻/冇眉娘呢個組合相信好難歸類為大美人。特別的地方是姪女非常了解自己是叻女這個道理,所以亦對號入座地認為自己不是張愛玲就是林燕妮,最愛用organic香薰油自硏手…
  • 劣質調情 by 文士琛
    當初我一直以為他們都是單身的。為什麼?因為他們每天都在肆無忌憚地打情罵俏。我公司陰盛陽衰,眾女的焦點都落在一個叫阿臣的男同事身上。阿臣二十多歲,外形普通過普通,而他的確是那種日夜碌著手機追趕潮流玩意一有空就睇波賭波的典型港男。作為一個adm…
  • 「我老豆叫我delete左個facebook account」 by 宇治金時
    「老豆其實都係一個月前先知道有facebook呢樣野。佢根本跟唔到個時代,更加唔知我諗乜,或者呢d就係所謂既generationgap啦,唔了解,唔願意去了解,郁d就想將d野由有變無,佢話無左就無發生過,即係唔存在喎。煩野點可以唔存在,唔s…
  • 【辦公室之男親女愛】如果有人匿名打上公司 HR 爆料揭發奸情,你會點做? by HR 扮工週記
    話說有一日小編收到一個電話,電話另一邊嘅男人自稱係匿名嘅爆料男。佢話公司嘅家英哥同道德妹有奸情,仲話家英哥已經有家室,係唔應該咁做,所以想我哋人事部阻止佢哋繼續錯落去,仲話家英哥個老婆都知道左,隨時會上黎公司捉奸………
  • 偷食的人有難了:我用GPS追蹤男友(一) by B612
    從來都唔會主動講密碼俾我聽,就連喺我面前解鎖手機都會遮遮掩掩。唔係身有屎嘅,怕咩俾人知?佢越係神神秘秘,我就越覺得佢想要嘅,唔止係私隱咁簡單。果然,一齊咗未夠兩年,就發生咗一連串令我哋無辦法繼續一齊嘅事………
歡迎讚好我們的facebook page,免費資訊源源送上。