大家最過份試過點整蠱同學?我試過將個骷顱骨頭擺入女同學LOCKER,仲呃佢係. . . . . .

 

中六 Last day 嗰日,我偷左實驗室個骷髏模型Thomas 個頭,然後擺喺同學個 locker 到整估佢。我藉詞問同學借書,然後跟佢裙尾去見證住佢開 locker ,一開個下,佢叫左出嚟,然後見我忍唔住笑到肚痛咁就知我玩野。佢邊笑邊鬧我然後問我個頭骨喺邊度拎嚟。

呢位同學讀開文科,冇入開實驗室,當然唔知 lab 入面有個骷髏骨模型。然後,我就呃呢個同我一樣係客家人嘅同學,話尋日我同太婆起骨,想俾佢睇下太孫每日過嘅環境,所以帶左佢返學。

客家人土葬有個習俗,就係當死者死左七年以上,就會起返佢副骨出嚟洗乾淨,然後擺落金塔埋左佢。因為我係原居民嘅關係,所以我地屋企人都享有特權保留習俗,土葬喺屋企附近座山上。呢個同學同樣係客家人,當然知道呢個習俗喇,於是佢一聽我咁講,塊面就嚇到青曬,把口開始震。

「喂啊鄧豐你係咪玩到冇野好玩啊……你帶你太婆個頭返學都算啦,做咩要擺喺我 locker 喎……」同學直程腳軟,扶住面牆,把聲震曬咁話我:「我都知你癲起上嚟咩都玩得出架喇……人頭嚟架大佬……」

同學信到十足十,嚇到鼻哥窿都冇肉,塊面青啤啤,見佢騰到咁,我就講返真相出嚟。呢件事我地都笑左好耐。

「真係瀨尿架大佬啊……」同學捂住裙,一邊笑但亦以怨恨嘅眼神厲住我。

 

關於作者:清風

清風

我有回應

睇完文有嘢想講?入嚟Gööp嘅「輔仁文誌」社群講兩句啦!可以匿名發言﹑即時睇文,輔仁專屬嘅討論空間。

即上iOS App Store/Google Play下載「Gööp」手機程式,碌緊手機嘅讀者可以立即開啟
註冊成為用戶後,輸入社群邀請碼: vjmedia 即可加入,入面見!

則留言

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。