人蠢可以點樣醫?

 

早兩日,腦細傳聖旨召小編入房,叫小編幫佢諗諗辦法,寫份 Proposal,而個題目係:「點樣可以令啲同事無咁蠢?」

……
……
……

即時我呆左喺到,唔知俾咩反應腦細……雖然俾佢召得入房,九成九都無好野,但小編諗都無諗過會有哩個咁嘅問題。

首先,點先為之蠢?如果要以 IQ 黎計,應該大部分人都無特登去俾錢測試過,所以暫時無足夠數據去用比較科學嘅方法去區分。

如果唔係有實質證據,咁即係憑感覺啦,小編相信腦細係用自己做 Benchmark,其他人諗唔到或者做唔到佢嘅要求,就等於蠢。(如果咁講,其實大家都係個比較,總有大把人諗到啲腦細諗唔到嘅野,咁腦細又叫唔叫蠢呢?)

不過咁,小編都覺得好多同事好蠢,因為有啲政策用十種唔同嘅方法解釋俾同事聽,佢哋都仲係理解唔到……

入返正題,到底蠢可以點醫?小編才疏學淺,唯有上網睇下有咩可以借鑒一下,集思廣益一下。不過睇左一輪,都無搵到啲較為有認受性嘅網站去研究哩個問題……

一係砍掉重練囉!有啲網站提出話 IQ 係同基因有關係,即係天生嘅,亦即係無.得.醫!如果係咁,不如炒哂班人再請過,順便喺 Interview 加插 Aptitude Test,廢事之後又投訴新入職嘅同事。(話時話,既然覺得依家班同事蠢,點解又俾佢哋過試用期喎?小編真係百思不得其解……)

有啲研究話 Omega 3 同做運動都可以幫助腦部運作。再唔係公司花啲錢,每日買三文魚或者魚肝油丸請同事食,等佢哋補一補。最好就買埋蔥俾同事食,食蔥聰明呀!至於運動,唔……可以試下叫啲同事返到公司跑下步先開工……又或者大路啲,學出面其他大企業咁,係咪都搞返十個八個培訓,培訓腦部發展,咁同事無借口啦。不過坊間大部分都係啲增值課程,例如商業英語呀,演講技巧呀,客訴處理呀,團隊協作等等……似乎全部增值課程都有一個共通點,就係前設係有返一定嘅智慧水平……

到底有無一啲「如何提升智慧」嘅培訓,或者係「IQ 提升工作坊」?完全諗唔到,亦都搵唔到!如果大家有咩好方法記住話俾小編知……(跪求……哭……)

唉,等小編認真諗諗寫啲咩貨仔交出去俾腦細先……(明明腦細先係最蠢嗰個……)

 

想做個非正式統計,唔知大家覺得同事蠢可以點醫?

讚好:無得醫。炒哂成班人再請過啦!
心心:叫同事上多啲培訓!
喊喊:食多啲蔥或者魚肝油丸!
嬲嬲:跑完 1,000 米先好返工!

 

【職場膠事】

 

關於作者:HR 扮工週記

HR 扮工週記
HEA 到核爆、哩埋係枱底畫下圈圈直至 2046 退休既 HR,同大家分享一下每一日 HR 平淡既生活。

我有回應

睇完文有嘢想講?入嚟Gööp嘅「輔仁文誌」社群講兩句啦!可以匿名發言﹑即時睇文,輔仁專屬嘅討論空間。

即上iOS App Store/Google Play下載「Gööp」手機程式,碌緊手機嘅讀者可以立即開啟
註冊成為用戶後,輸入社群邀請碼: vjmedia 即可加入,入面見!

則留言

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。