日本,真係去一次就返唔到轉頭

 

點解我話去完一次日本就返唔到轉頭?因為日本實在太正喇!其中一個原因係日本真係有好多好嘢食,黑毛和牛燒肉、拉麵、蟹宴、壽司、天婦羅、炸串、甜到漏嘅水果等大部分都好好食,最重要係有平有貴,任君選擇,連普通便利店賣嘅滷水雞扒都一樣好食,性價比高,而唔係好似香港咁,要比雙倍價錢先食到所謂日本好西嘅一半。當然,香港都有度好,就係有中菜同其他國家嘅菜,款式變化多,食極都唔厭,而日本就比較多燒同炸,熱氣啲又容易膩。

除咗有好嘢食,仲有靚景睇,今次去大阪就上咗梅天空中花園,個夜景真係靚到喊,仲有去咗大阪城。有啲地方係模擬返以前嘅日本,好似天保山嘅美食橫町同瀧見小路咁,好多影相位,京都嘅清水寺、八坂神社亦好靚。

睇完景仲有大把嘢玩,大阪有個生活今昔館,有得試著和服,道頓堀有個觀光船,通天閣可以睇風景,環球影城玩Harry Porter同Minion, 行到攰又可以去速浪浸溫泉,或者去天保山坐摩天輪,記住買張周遊卡,總共有成五十個免費景點,仲可以任搭地鐵、電車、巴士同部分私鐵。京都就可以著和服或者扮花魁,影相都有排你影。

去旅行不外乎都係食嘢、睇嘢同玩嘢,滿足哂以上三點之外日本仲有啲bonus,就係啲人真係好有禮貌,令我不禁諗起上次去韓國嘅慘痛經歷,遇過幾個都係粗聲粗氣好無禮貌,聽唔明就鄙視我哋,完全唔想理,覺得好煩。相反,日本人就算唔識講唔識聽,都會用身體語言同表情好努力咁幫你。有次離開咗間舖頭,有兩個職員喺門口送我地走,過左個大廈望返轉頭佢哋都仍然笑住喺度(雖然我覺得呢個位有啲太over)。

有晚11點幾去完激安掃貨超攰,啲嘢又重,決定豪一豪搭的士,去到的士站見到好長龍,咁啱第一架的士係貴嗰款,660yen起跳,google map話大概7分鐘就到,其實我都驚司機會發脾四,因為唔知佢喺的士站等咗幾耐,我哋路程又近,但司機一路都好nice,後嚟我坐坐下發現佢兜錯路,佢就好唔好意思一路話「my mistake」,按熄咗個咪錶,到酒店之後佢幫我開車門,仲話唔收我哋錢,當然我哋都格硬塞咗啲錢比佢。如果喺香港應該第一下就畀人拒載,一係就帶我地遊花園。

除咗人嘅質素好,地方亦好乾淨,行到點幾兩點條街都係一隻小強或米奇都無,晏晝連烏繩都唔見一隻,所有食店嘅垃圾都會包好一袋袋,好多仲做埋分類。雖然街上面嘅垃圾筒唔多,但啲人都唔會隨地掉垃圾。日本真係好到你唔信,難怪個個朋友都大讚日本,當返日本係返鄉下。其實我都去過唔少地方旅行,但日本係唯一一個地方我返咗香港之後都一直好掛住,好想好想再去,東京、沖繩、北海道、名古屋,下站去邊好呢?

 

 

關於作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

我有回應

睇完文有嘢想講?入嚟Gööp嘅「輔仁文誌」社群講兩句啦!可以匿名發言﹑即時睇文,輔仁專屬嘅討論空間。

即上iOS App Store/Google Play下載「Gööp」手機程式,碌緊手機嘅讀者可以立即開啟
註冊成為用戶後,輸入社群邀請碼: vjmedia 即可加入,入面見!

則留言

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。