【真人真事】條件唔錯但十年冇拖拍(二)——你ig 日日放負?

 

 

「吓?咁同姣仔有咩分別呀?」Ada一聽完我講,好大反應。

「咁又唔同,姣仔係對條仔好,對其他人差,即係虛偽。但我叫你改下說話方式,係希望你對每一個人都係咁,令自己成為一個friendly嘅人,咁我又唔認為係姣喎。」我答。

「妖,咁如果佢連我最真實嘅一面都接受唔到,唔使拍拖啦。」Ada仲係有啲不甘。

「Ada,你呢一句說話我聽過好多次,但真實唔係擋箭牌嚟㗎。如果你嘅真實全部都係缺點,或者對方接受唔到嘅事,咁人地唔要你,都好正常呀。你都唔會要一個真實嘅仆街啦?」

「咁你又啱。唉,但機會已經過去,我改咗又點呢⋯⋯」

「上次Sam咪拎咗你電話嘅,有冇傾落去?」我問。

「有呀,但佢個個都問㗎啦,冇咩值得期待。」

「Sam又唔係咩狗公,你同佢做下朋友,學習下點同異性相處都好呀。」我鼓勵佢。一星期後,佢就同Sam出街。出完街,佢仲同我報告,話冇再講是非、冇爭嘢講,仲讚Sam影啲相好靚𠻹。嘩,聽完我都好開心!

之後,我有約Sam出嚟飲嘢,問下佢對Ada有咩評價。

「我有同佢食過飯呀,okay呀。」Sam話。

「吓?冇其他啦?」一句okay即係點?又friend zone?

「屌,我冇comment咪即係佢普普通通咁,唔太差,但唔impressive囉。」

「但你平時一定會stalk下人㗎,點都有啲發現嘅!」我堅持。

「呀係呀,你自己睇下佢Instagram就知咩事啦。」Sam醒起一啲嘢,打開Ada個Instagram畀我睇。我碌一碌,入面有唔少相,followers同likes唔少,唔係毒撚account。不過,我一認真睇,就明白問題所在了。Ada每十張相,有一張係影下食物、風景、大合照咁,冇咩caption,另外九張就係黑白、語錄、自拍,主要內容係「沒有人明白雙魚座的認真」、「抱歉我無法成為討人喜歡的女生」、「為何認真工作別人看不見」。

「你答我,你喺佢Instagram睇到咩?」Sam問。

「冇咩呀,淨係知佢對生活好多怨言囉。」我話。

「咪係囉,我stalk人,都係想知道佢係一個咩人,了解佢多啲喞。佢得啲咁嘅相,我一來唔知佢有咩興趣、個性,二來睇得多呢啲怨言,我都覺得煩啦。」

「唔係喎,Sammi上次up咗張黑白相,你都即刻comment關心下佢㗎,咁點解Ada唔同?」我問。

「Sammi份人平時咁開心,好少會放負,佢一up黑白相,你就知佢真係有事,自然會關心下啦。就算呀,佢係搏人關心,佢都有呢個quota囉。」

「呀你又好似有啲道理⋯⋯」我又明白咗啲嘢。

我相信,冇人會鍾意一個永遠唔開心、只會埋怨嘅人,我地做人可以正面啲嘅。唔係要你瘋狂放送正能量,抑壓自己嘅負面情緒,但可以積極面對困難,同記錄一啲好嘅回憶,稍微經營一下自己嘅社交用戶,唔好話溝仔啦,對自己本身都有好大幫助,係咪先?

而且,Instagram可以話你嘅一個品牌,人地見完你,對你有興趣,下一步就會stalk下你,你想呈現一個點嘅自己,就要睇你點建立啦。去到呢一刻,我又突然明白,點解有啲人會有兩個accounts,哈哈。

我又要同Ada賽後檢討啦。

 

【真人真事】條件唔錯但十年冇拖拍

(一)二十五歲眉清目秀身材豐滿性格爽朗,A0?

(二)——你ig 日日放負?

(三)——不如你試下貼波?係打波

 

關於作者:霏子

霏子
Fayly .Party Host .不務正業、自甘墮落 .香港大學主修文學及文化研究

我有回應

則留言

閱讀後覺得好,請多多讚好及分享~:)

其他熱門文章

  • 如果你令女兒相信自己係公主…… by Dr. T
    我們先不要討論好男仔存在與否,姪女我見過,全面每部位都有幾粒暗瘡另加單眼皮/扁鼻/冇眉娘呢個組合相信好難歸類為大美人。特別的地方是姪女非常了解自己是叻女這個道理,所以亦對號入座地認為自己不是張愛玲就是林燕妮,最愛用organic香薰油自硏手…
  • 劣質調情 by 文士琛
    當初我一直以為他們都是單身的。為什麼?因為他們每天都在肆無忌憚地打情罵俏。我公司陰盛陽衰,眾女的焦點都落在一個叫阿臣的男同事身上。阿臣二十多歲,外形普通過普通,而他的確是那種日夜碌著手機追趕潮流玩意一有空就睇波賭波的典型港男。作為一個adm…
  • 「我老豆叫我delete左個facebook account」 by 宇治金時
    「老豆其實都係一個月前先知道有facebook呢樣野。佢根本跟唔到個時代,更加唔知我諗乜,或者呢d就係所謂既generationgap啦,唔了解,唔願意去了解,郁d就想將d野由有變無,佢話無左就無發生過,即係唔存在喎。煩野點可以唔存在,唔s…
  • 【辦公室之男親女愛】如果有人匿名打上公司 HR 爆料揭發奸情,你會點做? by HR 扮工週記
    話說有一日小編收到一個電話,電話另一邊嘅男人自稱係匿名嘅爆料男。佢話公司嘅家英哥同道德妹有奸情,仲話家英哥已經有家室,係唔應該咁做,所以想我哋人事部阻止佢哋繼續錯落去,仲話家英哥個老婆都知道左,隨時會上黎公司捉奸………
  • 偷食的人有難了:我用GPS追蹤男友(一) by B612
    從來都唔會主動講密碼俾我聽,就連喺我面前解鎖手機都會遮遮掩掩。唔係身有屎嘅,怕咩俾人知?佢越係神神秘秘,我就越覺得佢想要嘅,唔止係私隱咁簡單。果然,一齊咗未夠兩年,就發生咗一連串令我哋無辦法繼續一齊嘅事………
歡迎讚好我們的facebook page,免費資訊源源送上。