【塔羅個案】個客睇完我啲文黎搵我,然後話覺得要網上寫文感覺好 Cheap(哭)

 

在座各位對上一次買書係幾時?而你買嘅書,係實用性書籍,小說,定係閃閃旅遊書?人大咗,靜落黎睇書嘅時間一定比以前讀書少咗,加上拎住部電話轆轆下,都佔咗都市人大多數時間,睇書,變成一件好奢侈嘅活動。

之所以提起睇書,係因為我最近不約而同地遇上幾位想成為作家嘅客人。感覺真係好神奇架,我自己都好鍾意睇書,而我後生(?)嗰時,都曾經有過想做作家嘅念頭。不過,香港咩環境、閱讀風氣有幾濃厚,相信唔駛我多講,大家都明係一個咩狀況;喺香港,假如你寂寂無名,就算你寫出了幾千萬字文學巨作,相信注目程度都唔及一篇網上潮文。

Eliza 就係其中一員,佢當日到來,一身文青打扮,「我想做作家,想知自己得唔得。我嘅目標係亦舒。」

「你好鍾意亦舒?」我開始洗牌,腦海中飄過幾個書名;中學時期學校鄰近中央圖書館,亦舒首 150 本長篇小說,我應該都睇過。

Eliza 自言好鍾意睇書,不過就以言情小說為主,「邊個寫嗰啲太做作,而阿邊個寫嗰啲又太 Low 了。」Eliza 開始侃侃而談,評論市面上部份有名嘅情愛小說作家嘅優劣(佢認為)。

我笑而不語,很多自稱文人都有種傾向,自視甚高,好聽就叫有股傲氣,難聽嘅……我就唔講了。不過,Eliza 講就講到自己枝筆幾咁掂,又講到自己幾高抱負咁樣,但係,「我多次投稿,啲出版社都無回音,令我好沮喪。」

「素人投稿,一向唔易受理;有無考慮過先試試網上連載、或者投稿到網路上唔同平台?」Eliza 識唔識寫野、寫野好無睇我就唔知,但係,佢開嘅第一對牌,就暗示以佢能力,喺香港想靠枝筆養活自己,就基本上是不可能的;所以我建議佢,與其日日埋首家中默默寫,又無收入,不如即管搵份工做住先,要知道生活經歷,都係寫作嘅一部份啟蒙黎架嘛。

「吓?擺上網咁 Cheap。」

我眉頭一揚,我心諗,阿女,你呢句說話得失好多人噃,才子而家都網上寫野架噃,就算唔拎到咁高層次嘅人黎比較吖,坐喺你面前嘅老娘都係擺文上網嘅人黎架咋噃,而你係因為睇咗我呢啲咁 Cheap 嘅文先想黎搵我架噃……

你家下同我講 Cheap 係咪?!

OK,咁我認我無咩水平嘅,我呢啲要搵食嘅,先要擺文上網;你搞文學嘅,係唔同玩法架啦(雖然我完全唔明佢將亦舒嘅作品稱之為文學嘅理由係乜),不過,我個心多嘢諗啫,我都係好努力地做好我嘅專業嘅。

既然個客唔鍾意網上寫作,咪試下投稿去遠啲囉,去台灣大陸海外囉,不過人才處處,要人地睇得起你,除咗運氣,都要睇返自己嘅文筆有無個人風格的。

我咁講完,Eliza 嘅回應令我成斤血噴出黎。

「我有好努力學亦舒寫嘢架,都學得幾似。」

喂呀,唔好咁啦好無?唔好學人啦,唔好抄人啦,寫作唔係咁架,女呀,救命呀。我嗰下真係好想衝口而出講一句,亦舒寫乜都有人睇,係因為佢係亦舒呀!佢已經熬過咗架啦!

如果有一個三唔識七嘅新人作家,筆下女主角唔係移民加拿大就係屋企住大屋、有工人會煮定上海雞湯煨麵比女主角食、要出席大型場合,一律會有個屋企律師或者會計師搵人去置地廣場買三套一式一樣嘅白套裝比女主角著、然後為咗突出女主角清純特質,所以出街唔會化妝淨擦唇膏下略五百字……嘅話,無人會覺得件事型架,亦舒可以寫呢啲內容,係因為佢係亦舒呀!

我好認真咁同 Eliza 講,不如真係出黎做下嘢、試多幾種唔同嘅筆鋒,去搵出自己嘅風格啦。我唔想淨係話人,問心,有理想係難得的,追隨理想嘅路或者會沮喪,或者會迷失、但同時自己嘅想法都會隨住生活而改變。

希望 Eliza 真係聽得明我講咩啦。

 

【塔羅牌個案分享】

【塔羅問事業】

個客問創業,我話佢未 Ready 佢唔聽,而家蝕到入肉叫我救佢
佢話兩個月過去都未搵到工,要求我道歉
你身邊有無日日覺得自己懷才不遇嘅人?
後生女教友畀已婚傳教士搞大個肚唔認數
「我想分手,佢話唔好,不如去開房;然後我覺得佢仲愛我」
你話想生仔我咪唔避孕囉,我家下有咗你就叫我落?
四年入面,我睇住個客拍拖、結婚再離婚。
中女不諱言「我有 SP,但我唔會同我老公離婚」
男性客戶:「又話香港女多男少,點解我無女仔鍾意?」

 

 

關於作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

我有回應

則留言

閱讀後覺得好,請多多讚好及分享~:)

其他熱門文章

  • 如果你令女兒相信自己係公主…… by Dr. T
    我們先不要討論好男仔存在與否,姪女我見過,全面每部位都有幾粒暗瘡另加單眼皮/扁鼻/冇眉娘呢個組合相信好難歸類為大美人。特別的地方是姪女非常了解自己是叻女這個道理,所以亦對號入座地認為自己不是張愛玲就是林燕妮,最愛用organic香薰油自硏手…
  • 劣質調情 by 文士琛
    當初我一直以為他們都是單身的。為什麼?因為他們每天都在肆無忌憚地打情罵俏。我公司陰盛陽衰,眾女的焦點都落在一個叫阿臣的男同事身上。阿臣二十多歲,外形普通過普通,而他的確是那種日夜碌著手機追趕潮流玩意一有空就睇波賭波的典型港男。作為一個adm…
  • 「我老豆叫我delete左個facebook account」 by 宇治金時
    「老豆其實都係一個月前先知道有facebook呢樣野。佢根本跟唔到個時代,更加唔知我諗乜,或者呢d就係所謂既generationgap啦,唔了解,唔願意去了解,郁d就想將d野由有變無,佢話無左就無發生過,即係唔存在喎。煩野點可以唔存在,唔s…
  • 【辦公室之男親女愛】如果有人匿名打上公司 HR 爆料揭發奸情,你會點做? by HR 扮工週記
    話說有一日小編收到一個電話,電話另一邊嘅男人自稱係匿名嘅爆料男。佢話公司嘅家英哥同道德妹有奸情,仲話家英哥已經有家室,係唔應該咁做,所以想我哋人事部阻止佢哋繼續錯落去,仲話家英哥個老婆都知道左,隨時會上黎公司捉奸………
  • 偷食的人有難了:我用GPS追蹤男友(一) by B612
    從來都唔會主動講密碼俾我聽,就連喺我面前解鎖手機都會遮遮掩掩。唔係身有屎嘅,怕咩俾人知?佢越係神神秘秘,我就越覺得佢想要嘅,唔止係私隱咁簡單。果然,一齊咗未夠兩年,就發生咗一連串令我哋無辦法繼續一齊嘅事………
歡迎讚好我們的facebook page,免費資訊源源送上。