【塔羅個案】港女旅行完即刻被人飛,原因震驚了七百萬人!

文教 / 最新文章綜覽

 

Daniel 係一個好仔。佢畢業後,一直忙於工作,去到近年先開始思考男女關係嘅事情;咁佢嘅交友圈子唔算闊,隨住舊同學聚會多咗,佢同一個女同學互生好感,開始拍拖。

聽到呢度,好正路係咪?係咪覺得比我個 Content Farm 一樣嘅題目呃咗入黎?

乖,你睇埋先。

咁話說喺佢地拍拖就黎過 Probation…我意思係三個月嘅時候,Daniel 生日,個女仔就提議不如去台北快閃旅行,當彼此抖個氣又好、試下同居生活 For 4 days 都好……Daniel 處男出征,即使本來對台北其實興趣唔大,但係女朋友拍哂心口話「我提出嘅旅行,所有野我 Plan 哂!」咁樣充滿誠意,Daniel 就覺得,好吖,唔緊要吖,當去食下野都好,陪下女朋友都好。

Daniel 份工唔算好高人工,但勝在理財有道,算略有積蓄;相反女朋友做野就比較 Jumpy,畢業之後好似無一份工做得長過半年,所以荷包就比較緊拙。Daniel 建議「不如住得平啲,機票揀廉航就算啦」,原意都係唔想女友太破費。

「去旅行就唔好咁寒酸啦?」女友嘖咗一聲,「明唔明咩叫應駛得駛呀?」

Daniel 一呆,個心有少少想講一句「我頂你,你有咁大個頭咩?」,但係佢呢句說話淨係同咗我講啫,當時佢答佢女友當然就順攤得多,「咁…妳話事啦。」

不過旅程尚未開始,Daniel 已經躁底。朝早 11 點機,女朋友夠膽死 9 點半都未到機場,仲賴 Daniel「如果你有車咪好囉」咁樣唔黎接佢;好彩當日有團大陸人麻麻煩煩,搞到 Boarding Time Delay,件事先叫無咁樣衰。

好啦,喺飛機上面女朋友明明要坐窗口位,但又每隔 20 分鐘就要行出去拎一拎行李,搞到走廊位個哥哥仔西面西到太平洋……Daniel 雖然覺得超級唔好意思,都唯有算數,唔通旅程未開始就得罪女朋友搞到攞苦黎辛咩?

到左台北,諗住 Check in,先發現女朋友唱少咗台幣,女朋友話「驚咩啫,有信用卡」,Daniel 又不禁皺一皺眉,咁去得台北一定想食啲小店攤檔,Daniel 心諗就算有信用卡都未必一卡通行,同埋一開始講好咗每人唱幾多錢,點解去到最尾女朋友咩都當耳邊風?

Daniel 腦海冒起一句:去旅行果然係了解一個人最好嘅方法。

開始旅程,去搵野食,點知去到間舖,先發現人地當日例休;由於呢間餐廳都需要佢地轉幾程車先黎到,去到發現無開,女朋友即刻發脾氣。

「點解會無開架?你無 Check 架咩?」
「你話你 Plan,啲行程你都無 Send 過比我睇,我又點知咁多呢?」Daniel 躁躁地,上網搵間餐廳資料,就算未入餐廳 Facebook,Google 都已經大大隻字寫住「星期幾休市」嘅資料。如果女朋友有用對眼去睇嘢,真係無理由會見唔到啲營業時間資料。

聽到 Daniel 咁講,女朋友好嬲,「去旅行你唔駛負責任嘅?係因為你咩都唔理我先要臨急臨忙 Plan 咋,平時做野得你忙呀?我都忙架!」
「喂明明係你話……」係你話比驚喜我,叫我唔好 Plan 唔好理,交比你決定……Daniel 深呼吸,都費時再講落去。

第二日,係 Daniel 正日生日。原本 Daniel 以為自己生日啦,尋晚應該同女朋友好 Sweet 咁過啦,不過日頭嗌完交之後,真係鬼有心情咩,結果成晚喺度覆朋友的 Birthday Message,早早就瞓咗。

生日出去有咩做?Daniel 經歷首天一役,都已不敢心存厚望,結果女朋友所謂安排好嘅行程,係去買衫,藥妝,西門町買一啲香港誠品都有得賣嘅野。

Daniel 望住我,「神婆,我喺旅行當中第一次明白咩叫放空。」

我笑到收唔到聲。

結果當晚點呢?女朋友今次好叻女,訂咗間靚靚餐廳食飯,但去到現場,女朋友同接待個姐姐講「三位」嘅時候,Daniel 好驚訝。

「三位?」
「我有個好朋友原來喺台灣做野呀,所以咪叫埋佢黎。」

Daniel 有少少嬲,先斬後奏都算,自己生日你唔問過我就叫個唔識嘅人黎,「仲要遲到差唔多半個鐘。」

呢位所謂好朋友,其實只係女朋友嘅舊同學,聽佢地傾計真係連「朋友」都稱唔上。「好耐無見呀~」「你靚咗好多~」「你幾時黎台灣架?」

……連幾時過黎台灣做野都唔知,好朋友喎。

Daniel 默不作聲地食完一餐飯,然後埋單時,兩條女望住佢。

「即係條八婆唔識我都想屈我請食飯。」Daniel 苦笑,「我請又有咩所謂?但係成餐飯佢同我講咗兩句野都無。」

「咩都彈,咩都唔好,去台灣要食港式茶餐廳,行程完全無諗過我鍾意啲咩,連生日快樂都係返到酒店先醒起未同我講。」Daniel 嘆氣,「日日西口西方面,公眾場所大大聲講野,用廣東話話啲台灣人唔文明,明明識講國語,去買野偏偏扮哂野講英文。」

「明明佢喺香港都唔係咁。」

是的,Daniel 去完呢個旅行之後,無幾耐就同女朋友分左手了。一次半次當自己唔好彩,但 Daniel 是以結婚為大前題去同女朋友交往的,「我想像唔到將來同佢生活會係點,不如都係唔好阻人發達,我放生佢,佢放生我,咩都好啦。」

Daniel 黎到問嘅問題,就係女朋友分手之後會唔會唔開心、過得唔好之類。我望住副牌,個女仔到而家都覺得係 Daniel 有問題唔體貼唔諒解唔包容下略五百字,我點點頭,望住 Daniel。

「放心,佢會過得好好,你分手分得啱呀。」

根本就唔夾,點行落去先?

 

【塔羅牌個案分享】

後生女教友畀已婚傳教士搞大個肚唔認數
「我想分手,佢話唔好,不如去開房;然後我覺得佢仲愛我」
你話想生仔我咪唔避孕囉,我家下有咗你就叫我落?
名校老師婚外情的故事
四年入面,我睇住個客拍拖、結婚再離婚。
中環高薪厚職女強人求愛篇:我一覽眾山小,但係⋯⋯
女人就黎三十歲仲係 A0 係咪就叫有問題?
中女不諱言「我有 SP,但我唔會同我老公離婚」

 

 

關於作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

我有回應

則留言

閱讀後覺得好,請多多讚好及分享~:)

其他熱門文章

  • 如果你令女兒相信自己係公主…… by Dr. T
    我們先不要討論好男仔存在與否,姪女我見過,全面每部位都有幾粒暗瘡另加單眼皮/扁鼻/冇眉娘呢個組合相信好難歸類為大美人。特別的地方是姪女非常了解自己是叻女這個道理,所以亦對號入座地認為自己不是張愛玲就是林燕妮,最愛用organic香薰油自硏手…
  • 劣質調情 by 文士琛
    當初我一直以為他們都是單身的。為什麼?因為他們每天都在肆無忌憚地打情罵俏。我公司陰盛陽衰,眾女的焦點都落在一個叫阿臣的男同事身上。阿臣二十多歲,外形普通過普通,而他的確是那種日夜碌著手機追趕潮流玩意一有空就睇波賭波的典型港男。作為一個adm…
  • 「我老豆叫我delete左個facebook account」 by 宇治金時
    「老豆其實都係一個月前先知道有facebook呢樣野。佢根本跟唔到個時代,更加唔知我諗乜,或者呢d就係所謂既generationgap啦,唔了解,唔願意去了解,郁d就想將d野由有變無,佢話無左就無發生過,即係唔存在喎。煩野點可以唔存在,唔s…
  • 【辦公室之男親女愛】如果有人匿名打上公司 HR 爆料揭發奸情,你會點做? by HR 扮工週記
    話說有一日小編收到一個電話,電話另一邊嘅男人自稱係匿名嘅爆料男。佢話公司嘅家英哥同道德妹有奸情,仲話家英哥已經有家室,係唔應該咁做,所以想我哋人事部阻止佢哋繼續錯落去,仲話家英哥個老婆都知道左,隨時會上黎公司捉奸………
  • 偷食的人有難了:我用GPS追蹤男友(一) by B612
    從來都唔會主動講密碼俾我聽,就連喺我面前解鎖手機都會遮遮掩掩。唔係身有屎嘅,怕咩俾人知?佢越係神神秘秘,我就越覺得佢想要嘅,唔止係私隱咁簡單。果然,一齊咗未夠兩年,就發生咗一連串令我哋無辦法繼續一齊嘅事………
歡迎讚好我們的facebook page,免費資訊源源送上。