你教我如何答六四的問題,你才不會批鬥我好嗎?

 

 

你教我如何答六四的問題,你才不會批鬥我好嗎?

今個星期,補習天王被廉署調查,指佢有機會「洩漏試題」。可見,我地呢一代,為左搵考試既「正確答案」,有d人可以幾無所不用其極。

咁,對「你知唔知六四係咩」呢條通識題,你會有咩答案呢?

六四,對一d香港人黎講,好似好重要。重要到一個地步,係如果年輕人「唔知咩叫六四」,就係年輕人好冇用,對歷史冷感,冇常識。

有時候我會諗,咁佢地如果冇經歷過六四,冇上一代果種情緒,係咪錯呢?正如你出世到而家,都冇見過阿爺阿嫲,你靠你屋企人講,你阿爺阿嫲有幾好,但你去到佢死忌佢墳前你冇你父輩咁大感覺,有幾出奇?

由於香港眾志一條「00後唔識六四」的短片,又令果堆六、七十後忽然好似好緊張六四咁。六四神聖不可侵犯,我明白。正如我唔會同粉絲講,佢既偶像有幾衰一樣。我認識的明星不多,但很多明星在我服務的電台留下的「青史」,我相信都有很多人心中知道,但唔會係fans面前講出口。邊個歌星十問九唔應,邊個歌星問佢野好似聽唔明人講野咁,邊個歌星應承左人睇劇本後尾唔睇,呢d我地都知,但一定唔會同fans講。因為,講感情,就唔係講理性既。同fans 拗佢偶像好衰,你冇贏既空間。

對千禧後一代,落咁重手既藥,為既係咩?我只係知道,香港眾志呢一步,好簡單,只係想鞏固返佢地既有既支持者,覺得00後好快忘記事情,所以呢班「記得既人」,就需要人支持啦。結果,係籌款結果上,眾志得到好多香港人既支持,根據報道有成33萬左右。

至於,果個街訪經過幾多剪接,有冇引導性?擺明用電影切入,再引學生講政治,有冇採訪道德?明明話打格仔先畀出,又唔同人打,等個中學生畀人起底,然後承受強大輿論壓力,係咪一切都在眾志計算同掌握之中?唔重要啦,反正籌左錢啦。冇問題啦。

我只係知道,我係一個教書既人,我係會自省既。一班人,如果集體對一件事都無知,我會問,究竟呢件事係點教既呢?呢件事係咪個社會都覺得好「重要」,而新一代唔知係咪好「不該」呢?正如有一個網友講,香港咁多成年人,點解會揀公審「點解你唔知」, 而唔係問自己呢一代「點解冇人話佢知」,唔問搞左六四教育宣傳二十九年既支聯會,你地「點講畀年輕人知」?

最近,有一個自稱00後既網友問我,究竟「佢地要點答,d大人先唔會公審」佢地。我當下唔識反應,對住個fb messenger 成五分鐘,我都答唔到。明明香港眾志呢件事,就係要用一個高度剪輯既街訪,去面譜化00後對六四都無知。而問題係,對冇見過,冇感受過件事既人,究竟你要佢地畀咩反應先夠呢?

正如,有位前輩網友就話,唔識六四,好大逆不道啦,係咪?咁,佢地同時都唔識新加坡冷藏行動、西藏1959起義、王震新疆大鎮壓、台灣228又係咪好錯呢?如果佢地唔識,使唔使拍片笑佢地呢?

而,如果有人認為,千禧後一代對六四只不過係其中一宗歷史事件,等於三年零八個月對於80後都係一宗歷史事件一樣。五十後既,佢地記得,以前嗰代連用日本電器、聽日本歌都唔得,而家唔係日本電器唔用添。所以,時代一定會變。大家又接唔接受到,時代真係會咁變?

對住果個自稱00後既網友,我想答佢地,如果你唔想畀人公審,咁,唔好隨便接受唔識既人既街訪,唔好隨便係網上面講野咪得囉。

你唔上網講野,唔會死架,係咪?反正,我聽唔少人講,話果d kol 畀人批鬥,果d 學聯既人畀人鬧,係因為佢講錯野,所以就要置佢地於死地丫嘛。邊個叫你無啦啦一個唔識既人黎問你野,你都去答佢呢?你知道,呢個香港,最中意blame the victim 架。

唔公開答,唔係最好既解決方法咩?反正,呢個網路世界,係冇真理,只有強權架之嘛。

係面書,就有人好唔同意「唔公開答」呢個答案啦。佢話:

「健吾,其實點解要唔公開答」?點解唔可以俾班00後堂堂正正做返自己?社會憑乜野公審佢地?佢地記唔記得六四,認唔認識六四係源自上一代的教育有無做好,同埋社會各界有幾重視呢件事…如果全個社會氛圍都係重視六四的, 家長學校有強調六四的歷史意義的,00後自然會知…就好似有啲家長年年都帶仔女去燭光晚會,咁呢班小朋友長大後就一定知道六四係點樣一回事。點解唔可以答,佢唔知道?」

 

另外,又有網友話,六四好多所謂真相,都冇講出黎。

話畀佢地知,真相係咩咪得囉。

當年天安門5月底時,主流學生領袖準備撤退避免被正在進城的解放軍屠殺時,柴玲果班就主張唔走希望流血大屠殺發生。果時香港就搞民主歌聲獻中華,籌一大堆錢上去,大壯了唔走派的力量,最後就死人了。香港人怕97共產黨來,自己唔想死,就畀錢推北京學生市民去死,諗住搏掂左自己就搞掂,衰左又唔係死自己。這就是六四的本土聯繫。每年悼念六四,就係每年悼念吓當年畀你推去挑洪興機結果畀洪興斬死左個條靚,路邊超渡吓哭哭啼啼吓自己好過D咁囉。

你仲記唔記得,李卓人有簽悔過書事件?根據網路百科既說法,1989年北京學運期間,李卓人帶住香港人1200萬港元既捐款上京,離開既時候「被捐」,要簽署悔過書後才獲釋,而捐款則被充公。又講真,民主歌聲獻中華,話就話籌左1200萬。我估,李卓人都唔會拎晒1200萬現金上去既。咁拎左幾多呢?2012年6月既六四特集,信報就話李卓人當時帶住200萬。2018年既時候呢,李卓人就同明周講,佢當時係帶住100萬捐款上去北京,給扣起來時,收條寫的是二百萬。扣留的錢比我帶去的多,是因為那是在天安門的學生之前籌募的錢,都交給了我。

究竟係1200萬,200萬定係100萬?幾多係香港人既錢,d錢去左邊,其實有幾多人會再去問?

 

直接d講啦。如果果一個被訪既中學生說法屬實,明明佢話要打格仔先出得個訪問,咁好簡單:佢知道呢個訪問,會有機會畀佢帶黎麻煩。我覺得好好,好欣慰,起碼呢個女學生,至少應該可以感覺兩件事:佢feel到訪問者會跣佢,仲有佢知道上左網d野會好麻煩。佢係聰明既。

有網友話:本來,話連樣都唔公開嘅,點知最後就出埋人樣咪一樣畀人批鬥。而最大問題係,你要知嗰個係六四問題先識醒水揀唔答,唔係問問下飲飲食食,突然一嘢跳去問六四,一樣防不勝防。最後,明哲保身就任何陌生人都唔答!

其實,我冇咩憤怒既感覺。我最大既感覺,係好可惜。我一直以為,眾志會建構一個形象,係同泛民唔同既。但似乎係今次六四中學生街訪事件中,佢變成左同泛民差唔多既人。正如,六四當日,我係飛機上面,睇返一套舊戲,叫《穿prada 的惡魔》。主角Andy本來取笑果d係名雜誌入面,恨著靚衫,恨入名利圈既紐約女仔。但慢慢,因為惡魔上司Miranda 一次又一次既同化,之後佢變左同Miranda 一樣既人。

以前,我記得係雨傘,有人同我講過,話希望自己長大後,唔好變成佢地都睇唔起既大人。

唔知,講呢句說話果個人,仲記唔記得佢幾時,係邊度同我講既呢?

 

 

關於作者:健吾

健吾
宣揚仇恨一點也不有型。這個世界,幸好還有愛。健吾專欄作家、記者、編輯……商業電台節目《人民大道中》、《903國民教育》、《光明頂》主持,香港中文大學日本研究學系講師。著書超過十本,最新的是《日本亂象》(北京人民大學出版社)、《100個在情場止蝕離場的理由(上))、《京都--貼近生活之旅》(圓桌精英出版)、《健吾收音機III——說好的幸福呢?》(CUP出版)等等。email:[email protected] |Facebook: facebook.com/kengopage |微博:t.sina.com.cn/kengowrites

我有回應

則留言

閱讀後覺得好,請多多讚好及分享~:)

其他熱門文章

  • 如果你令女兒相信自己係公主…… by Dr. T
    我們先不要討論好男仔存在與否,姪女我見過,全面每部位都有幾粒暗瘡另加單眼皮/扁鼻/冇眉娘呢個組合相信好難歸類為大美人。特別的地方是姪女非常了解自己是叻女這個道理,所以亦對號入座地認為自己不是張愛玲就是林燕妮,最愛用organic香薰油自硏手…
  • 劣質調情 by 文士琛
    當初我一直以為他們都是單身的。為什麼?因為他們每天都在肆無忌憚地打情罵俏。我公司陰盛陽衰,眾女的焦點都落在一個叫阿臣的男同事身上。阿臣二十多歲,外形普通過普通,而他的確是那種日夜碌著手機追趕潮流玩意一有空就睇波賭波的典型港男。作為一個adm…
  • 「我老豆叫我delete左個facebook account」 by 宇治金時
    「老豆其實都係一個月前先知道有facebook呢樣野。佢根本跟唔到個時代,更加唔知我諗乜,或者呢d就係所謂既generationgap啦,唔了解,唔願意去了解,郁d就想將d野由有變無,佢話無左就無發生過,即係唔存在喎。煩野點可以唔存在,唔s…
  • 【辦公室之男親女愛】如果有人匿名打上公司 HR 爆料揭發奸情,你會點做? by HR 扮工週記
    話說有一日小編收到一個電話,電話另一邊嘅男人自稱係匿名嘅爆料男。佢話公司嘅家英哥同道德妹有奸情,仲話家英哥已經有家室,係唔應該咁做,所以想我哋人事部阻止佢哋繼續錯落去,仲話家英哥個老婆都知道左,隨時會上黎公司捉奸………
  • 偷食的人有難了:我用GPS追蹤男友(一) by B612
    從來都唔會主動講密碼俾我聽,就連喺我面前解鎖手機都會遮遮掩掩。唔係身有屎嘅,怕咩俾人知?佢越係神神秘秘,我就越覺得佢想要嘅,唔止係私隱咁簡單。果然,一齊咗未夠兩年,就發生咗一連串令我哋無辦法繼續一齊嘅事………
歡迎讚好我們的facebook page,免費資訊源源送上。