【塔羅個案】個客話想成為 Top Sales 但係兩份工都比人炒,一齊黎睇下佢點開口得罪人

文教 / 最新文章綜覽

 

 

一開口就得罪人,其實真係幾大鑊。

有啲人本身黑心或者口賤,呢啲唔計啦,佢本身就係想令你唔好受先會口臭;最慘係自己好真心或者好膠咁,說話甫出口就令人黑人問號甚至覺得「Are you serious?」,但係本人完全唔知自己衰咩……呢一種人,都幾慘。

今次個案事主化名 Mable,廿幾歲女,DSE 完左就出黎做野,做炒散做兼職,主要都係 Sales 方面嘅工作。

「我有師姐做 Sales 做到上 Burberry,好似好好搵!」Mable 好似見到一條財路喺前面咁樣對眼發光,「所以我人生目標係想做名店 Top Sales!」

我聽到呢度,心中敬意油然而生。名店嘅嘢,我舖頭近利園,由樓下啲 Chanel 妹豬,去到 Times Square 各大服飾連鎖店,其實有唔少員工黎搵過我(多謝你地一傳十十傳八!),咁做名店或者有少少牌子嘅 Sales 到底好唔好做,而家個市……過得去啦,唔會有一份工係「筍工」的,遇著一班係人類唔搞屎棍嘅同事就已經係職場福音了,如果要做「Top Sales」到底要花幾多苦功,我真係想像唔到。

「咁你而家間公司做左幾耐?」我開始洗牌,Mable 而家做邊個 Brand 唔係重點,睇下佢份工有無前景先係問題所在。

「呀……剛剛比人炒左。」Mable 答「之前喺旺角賣手機殼。」

……嗯?

唔係有咩階級之分,不過由旺角某店舖賣手機殼,去到入到有牌子舖頭做,再去到名店,再成為 Top Sales……呢條路,好似有啲長。

咁人有長遠目標係好嘅,我咁同自己講。

「咁點解你比人炒?而家搵工未?」
「我比八婆客投訴囉,頂。然後老細話我把口唔識 Sell,話我得罪人喎。」
「當時情況係點?」我要搞清楚到底係無理解僱,定係 Mable 真係有問題。
「個客係中女,問我 iPhone 8 有咩款,我咪指比佢睇;佢問我有無得意啲嘅,我咪同佢講你呢個歲數唔應該用 Cute 野,咁之嘛!」

我倒抽一大口涼氣,『咁之嘛』你都講得出?喂個客揀咩你咪比咩佢,喜好嘅野,你理得人啫!

「呀又其實你咁同個客講野,又真係唔係太好聽。」我苦笑,內心滴哂汗,「你自己覺得無問題?」

「有咩問題先?我份人優點係真囉!例如你今日著黑色衫同裙,好似屋企死左人咁,我都會想叫你換返啲鮮色衫架!同埋你又唔係尖面,塊面咁肥,一係你去整容,打尖瘦面,如果唔係太成熟嘅顏色你 Carry 唔到囉!」

嘩。

嘩嘩嘩。

我聽到雙眼放大,然後爆笑。係,係爆笑,我無嬲,因為會講得出呢啲說話嘅人,得罪講句,真係保重!屋企死左人,叫人整容你都講得出,我真係完全想像唔到你點樣可以行去「名店 Top Sales」呢條路。

你問我有無教佢講野?咪玩啦,我何德何能幫人教女,阿女有氣勢,阿女有骨氣,誓必會殺出一條新血路。不過係唔係做 Sales 發跡,我就唔擔保啦,事關副牌開出黎,其實前線對客工作真係唔適合佢,但係問多幾個工作範疇,一係佢自己唔鍾意,一係佢就做唔黎。

佢見到事事不順,有少少灰。

「算啦,我做 KOL 算啦,講下年青人睇法咁。」

我對眼,再次放空。

喂呀女,你真係保重呀,雖然我應該唔會好想再幫你開牌(時間是留給有緣人 der),但係如果你真係咁做人落去,真係望你傻人有傻福唔好出事架咋。

 

【塔羅牌個案分享】

我以為個客擔心病母健康,原來佢只係想快啲分身家
唔係乜野工作都可以上 JobsDB Apply 嘅,例如 DJ 或者 KOL…
男朋友同你求婚,原因唔係因為佢愛你,而係……
因為老公婚宴當晚令到賓客開懷大笑,老婆而家想悔婚(?!)
適婚年齡女多男少,令到部份男士開始 FF 覺得自己條件特別好

 

 

作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

閱讀後覺得好,請多多讚好及分享~:)

其他熱門文章

  • 【遊戲新聞】最強多人喪屍遊戲 《Left 4 Dead 2》相隔十年推出最後大改版 by 五木
    經典遊戲《Left 4 Dead 2》推出超過十年,話佢係最強多人喪屍遊戲應該都無乜異議(雖然我覺得一代正啲) […]…
  • 攝灶罅 by MT Mabel
    現今女性愈來愈多單身、拍散拖、遲婚、甚至係再婚又再分,問題在哪?先不談外表,皆因樣貌和身材絕對可以用錢解決。抽脂、隆胸、削臉、拉皮、開眼角、下巴增新…揮一揮荷包,一頭半個月就變成馬蹄露咁靚啦,完全不是問題!但有兩種特徵,分別叫「大鼻」和「避…
  • 失戀時,朋友講嘅野,聽下好喇! by 壞孩子
    佢地唔係你,唔知你個心有幾多掙扎,唔知你同個ex嘅經歷同佢俾你嘅感覺,就算你講左,佢地都係當故仔咁聽。而且,朋友為免你傻落去,通常都會叫你放手,話個人唔值得你等或者挽留。但你聽完,就算心知肚明,你鬼做到咁灑脫,如果你得,朋友就唔洗成日睇住你…
  • 中同聚會——一直未解開的心結 by P's虐心者
    那是歇斯底里的遺憾,我常夢到自己能夠回到中學,改變這一個事實,「和班裡的同學打成一片」可惜再也不能,一生人只有一次就讀中學的機會......…
  • 暖男養成記 by 三個水
    暖男好似太陽咁,俾人溫暖,體貼,顧家,更甚者鍾意貓貓狗狗。囡囡抱怨同學hea做project、教授openbook考試難或者補習辛苦,普通毒L淨係識合埋把口,或者同囡囡講道理,「係咁架啦,讀書(做野)係咁辛苦啦」。囡囡即刻收聲。而暖男就會好…
  • 【真人真事】小表妹的胎前記憶 by 表姐
    「你仲記唔記得喺媽咪個肚果陣係點架?」 「唔記得啦」 「再之前呢?未去媽咪個肚之前你喺邊架?」 「喺個天度」…
歡迎讚好我們的facebook page,免費資訊源源送上。

文章資訊

ID: 189294
Date: 2019-01-17 05:53:32
Generated at: 2020-09-24 12:15:44
Permalink: https://www.vjmedia.com.hk/articles/2019/01/17/189294/【塔羅個案】個客話想成為-top-sales-但係兩份工都比人炒