巴士公司一邊鳩搶新區客,一邊屌走舊區客

巴士大典 Nwfb1601 圖片

 

唔知大家有無試過,明明平日好地地坐開一條巴士路線,都幾多人坐,但突然之間走去減班(唔係脫班!),結果搞到連續N日都逼到上唔到車,最終被逼去選擇其他交通工具(包括萬惡的黨鐵)。

今次輪到邊區唔好彩?就係來往西環至大角咀、旺角、深水埗一帶嘅朋友啦。經常來往兩地嘅乘客應該都清楚,與其坐黨鐵去到中環再轉車,倒不如坐巴士905經西隧直出直入仲快、靚、正。可惜,由呢個星期開始,如果你放工時間要由西環去旺角,我都係勸你有定心理準備,隨時要等大半個鐘先上到車(真係要講聲「隨緣」啦 ~)。

點解會咁?點解?點解?明明905好多人搭架,做乜會搞到咁?因為巴士公司對某部分區域好好人,開左條專線服務佢地,但同時就抽走左905放工時間5班車。你無睇錯,係5班車。1班車原本可以載120人,即係而家放工時間,905就載少左600人!

邊條新線咁巴閉,可以搶走905嘅5班車?就係905A。唔好以為905A同905個號碼咁似,佢地嘅服務區域就差唔多。905係九龍服務區域包括大角咀、旺角、太子、深水埗、長沙灣、美孚及荔枝角(即係荔灣,而唔係荔枝角黨鐵站該區)。不過因為路線太冗長,沿路又有黨鐵,所以905起碼有80%客源都係來自大角咀、旺角、太子、深水埗呢四個區域,而長沙灣至荔枝角一段就只佔不足20%。

至於905A,最諷刺嘅就係,佢完全唔服務905主力客源範圍。啱丫,長沙灣、美孚、荔枝角係好多人住,而905一直以來因為車程長,所以推哂呢堆居民搭黨鐵。加上長沙灣東京街嘅麗智邨、麗翠苑入伙,咁而家巴士公司係放工時間開條905A,可以由港島區直達長沙灣,想搶返呢堆客,都好似好合理,right?

問題係,當原本905放工時間都好爆嘅時候,你仲要抽走佢5架車,唔經佢主力服務嘅範圍,即係變相原本依靠905去大角咀、旺角、深水埗之乘客(佔全905起碼80%),係一個鐘頭裡面少左5班車,而對佢地來講,905A係無用嘅(因為都唔經佢地落車嘅地方,搭條毛咩)……

呢堆忠實嘅巴士Fans,發覺905疏咗咁多、難上車咗咁多之後,都識變通嘅。要我日日都等半粒鐘先上到905,咁我落去搭黨鐵無咁嬲啦。如果長毛係「屌票」的話,咁巴士公司就係「屌」緊舊客落黨鐵。

 

*****************

 

即係咁,我唔反對你開辦新路線,服務新地區又或者以往忽略咗嘅區域。但唔該唔好搞到而家條905A咁三不像好唔好?不然,呢種叫「鳩搶客」,新客又搶唔到幾多,舊客又俾你屌走一大堆。到時無哂客,唔好喊住走過來話要加價。

一、 以放工時間來計,港島區要試真正嘅通勤需求,當然要做最多客嘅一段,即係大部分西隧路線都會途經嘅灣仔至上環一段。偏偏,巴士公司就拉埋條905A入去西環,兜多15分鐘,咁你九龍幾快都無用啦。西環唔係無客,但你入得去西環,就要預左放棄灣仔至中環一段嘅客,唔可能貪心地做哂兩邊。

二、 不過,905A又一定要服務西環喎。點解?因為巴士公司度縮,諗住抽走905嘅5班車,轉去開905A。既然905港島區嘅主力服務範圍係西環,咁905A就更無可能飛走西環啦。結果呢條905A由灣仔去到西隧,隨時要40-45分鐘,試問灣仔、中環嘅朋友,會唔會理你?

三、 以為過左海到九龍就變神仙?錯!巴士公司為咗做長沙灣麗智邨幾棟新樓,而將條905A走去行東京街。問題係,東京街總係唔順燈,變咗咁樣行對美孚、荔灣來講都係慢。特別係正黨鐵站隔離嘅區域,你唔可以用天水圍、北區式兜哂十幾個屋村先上公路嘅概念去劃新路線。即係話,呢條905A偽特快線,只係對來往西環至長沙灣嘅乘客有著數,如果來往中環至美孚,905A依然輸比黨鐵一大截。咁呢條線開來做乜呢?載空氣?

搞成咁,邊個最開心?唔駛問,一定係黨鐵。

 

作者:公共運輸研究組

公共運輸研究組
一群觀察到香港公共運輸問題的年青人,決定走出來,為香港做點事。希望加入你的討論,為香港創建更完善的,香港人引以為傲的公共運輸系統。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 204060
Date: 2020-02-24 06:51:18
Generated at: 2020-03-30 02:42:21
Permalink: https://www.vjmedia.com.hk/articles/2020/02/24/204060/巴士公司一邊鳩搶新區客,一邊屌走舊區客