【外賣仔日記】如何成為外賣仔(或女)2020 修訂版

 

 

疫情肆虐好多公司都蝕錢裁員,唔少人都搵我話有無工可以介紹下,咁我係做送外賣架姐,橫掂我都見到各間外賣公司都請緊人,不如我一次過講下呢一份工啦。

首先要講吓一樣比較特別嘅嘢,係同其他工作唔係幾同嘅。一般好多嘅工作都係首先會要你面試,然後返屋企等待消息嘅。但係現時主要比較請得多外賣員嘅嗰三個外賣平台都係接近唔會響你見工嗰陣同你面試嘅,如果有人叫你上去office見工呢,其實已經接近100%請你,即時同你簽埋約架啦,咁你可能會問,一間公司請人一定會對嚟見工嘅人有要求架喎,點解呢幾間公司可以唔洗in,直接請你架呢?佢哋主要係響你網上申請嗰一刻已經做咗一輪篩選,只要你響份申請表上面填嘅嘢唔係太識合佢哋嘅話嘅,有時好啲嘅咪send嗰email或者sms又或者whatsapp通知聲你話你唔識合乜乜乜,有時咪直接無回音囉。咁都好嘅,咁就唔會浪費時間同金錢去獲得不接納呢個結果啦。不過而家要做到唔係太識合佢哋嘅話都幾難,所以而家近幾乎係你一去申請就請硬你咁濟。

所以既然咁多間公司都接近請硬你咁濟,咁我都響度講下份工嘅工作內容啦,咁就令到大家可以了解下份工作啱唔啱你做啦,咁就毋須返咗幾日之後話不合適然後辭職啦。放心,我都考過公開試嘅,都知道你哋考完試搵工憂慮緊啲乜嘢嘅。

咁響呢篇文章主要係會講下以下呢三大外賣平台Foodpanda(俗稱熊貓),deliveroo(俗稱袋鼠)同埋UberEATS嘅

咁份工係要做咩架呢?係咪即係茶餐廳送外賣咁呢?男女都啱做?洗唔洗識路架?有無咩要求架呢?洗唔洗18歲以上先可以申請?

 

簡單答咗啲比較多人問嘅問題先

 

問:係咪男女都啱做?

答:係

 

問:洗唔洗識路架?

答:唔洗

 

問:洗唔洗18歲以上先可以申請?

答:熊貓步兵唔使夠18,袋鼠同埋UberEATS 要

 

首先每次講呢份工都會有一個比較多人問嘅問題係話,「我洗唔洗識路架?」其實呢份工係唔駛識路都okay架,咁當然啦,你唔識路,最起碼有個google map閱讀嘅能力嘅畢竟單外賣嘅送貨地址你唔識去,起碼識得打開個google map 睇下個送貨地址嘅位置先啦。同埋第二多人問嘅問題係係咪男女都啱做,其實步兵都主要係攞住食物行路,太重嘅外賣又可以搵公司叫多個人嚟幫手,真係男女都啱架喎

啲外賣平台其實佢哋唔係只係負責一間餐廳嘅外賣服務嘅,佢哋話係同時間係做緊成個區超過50間甚至乎係100間以上嘅餐廳外賣服務,咁所以你每一日返工其實係無需要返到去公司打卡點名架,其實只需要打開公司嗰手機app響你指定嘅工作範圍打卡就得架啦,再簡單啲講即係落咗巴士/小巴/地鐵,你個GPS到咗指定範圍就可以打卡。

而你之後要去攞嘢食嘅餐廳,同埋送貨客人嘅地址,全部都會響嗰app到顯示俾你架,如果唔識去嗰個地址嘅話唔緊要架,佢入面會有個制俾你將嗰個你目前要前往嘅地址傳送去google map到架啦,所以你一定識得去嘅。咁你可能會問,唔會幾時都咁多外賣送架嘛,咁如果我冇嘢做嗰陣要做咩架?其實呢份工最好嘅地方就係無嘢做嗰陣你做咩都得架,平時我響無單嗰陣就會行入商場入面搵位坐架喇,咁有冷氣嗎。只係需要記住,電話響提醒你話你知有單嗰陣記得做嘢就得啦。仲有返工最好帶返個耳機啦,咁唔駛響條街齋行咁悶嘛。

不過有樣嘢要注意啦,返工就一定要帶返嗰流動充電器啦(俗稱尿袋),因為你要keep住公司嗰app嘅運作架嘛,咁無電點算呢。

各公司返工,報更,請假,臨時加更,工作內容同埋其他行政嘅指引

咁呢三大平台全部都係純粹以件薪計算人工,咁又其中兩間,佢哋返工係要報更嘅,唔係你話返就返嘅。同埋三間公司佢哋嘅工作內容都有少少唔同嘅。

 

Foodpanda

先講熊貓,熊貓步兵可供申請年齡係16歲,唔係18歲,佢哋係簽自僱約嘅

跟住講下報更,佢哋報更方法係用公司嘅電子更表app去報更嘅,你只需要打開公司個電子更表app,響佢哋提供嘅日期同埋時間,選擇返你想返工嘅時間同埋日期就得啦。熊貓係採用負責制報更,如果你選擇咗嘅更,你係必須要返嘅,如果真係報更之後有事唔得閒,都唔係無方法嘅,就要放返出去電子更表app入面等人接更啦,只不過但係如果無人接你更,咁就嗰一更仍然係計你攞咗嘅,咁即係你要返工嘅時間無返工啦。

另外啦,熊貓係有支付現金嘅外賣單嘅,所以收咗食客嘅錢之後就小心保管啦,記住唔好唔見呀,你負責架,你要每個星期入返俾熊貓,然後send返張入數紙去俾熊貓嗰會計就得啦,最好就每日收工之後將收完嘅錢入咗銀行保管先啦,咁就唔會驚唔見啦。

至於衣著方面,熊貓有件公司Tee,穿著與否隨你,其他無限制,下身著短褲涼鞋又或者拖鞋都得

 

deliveroo

跟住講袋鼠,袋鼠可供申請年齡係18歲,佢哋係簽自僱約嘅

跟住講下報更,佢哋報更方法都係係用公司提供嘅電子更表系統去報更嘅,每小時為一個更,返幾點收幾點自己選擇,袋鼠請假係簡單過熊貓好多嘅,首先如果報更後臨時有事嘅話,有兩個方法可以處理你個更,第一,響嗰一更開始前24小時踢走佢,就咁撳個制就得,所以一早知道返唔到,就24小時取消咗佢啦。咁如果臨時先知道返唔到呢?例如唔舒服之類嘅原因?袋鼠講明,可以尋找一名替代人幫你開工,簡單嚟講,即係可以搵替工呀。不過人工都係照出俾你,所以點同替工傾出糧呢啲問題就要自己處理啦

至於袋鼠全部嘅外賣單嗰客都係俾信用卡,咁就唔使收錢啦,除非個客俾貼士你啦。

至於衣著方面,袋鼠有件公司Tee,穿著與否隨你,其他無限制,下身著短褲涼鞋又或者拖鞋都得。

 

UberEATS

到最後,UberEATS

可供申請年齡係18歲,佢哋係簽自僱約嘅

由於佢係高舉自由上線,所以返工時間係由你決定嘅,毋須報更,中意幾時上線開工都得

佢係係逐單計人工嘅,所以要好識搵位上線,唔係一定要限死響邊條街到等嘅,但係就唔好響啲偏僻嘅地方上線啦,都無餐廳可以俾外賣你送,至於邊度會多外賣單呢,入職之後UberEATS會有貼士俾你架啦,至於每一日有幾多單外賣送呢,下面我會詳細講。

UberEATS係有支付現金嘅外賣單嘅,但係呢間公司對於處理現金單有啲特別,如果食客所俾嘅現金數量可以足夠響你人工到扣到嘅話,你就咩都唔洗做,亦都有得負數嘅,如果負數,你係可以隨時用Visa 或者 MasterCard 響app 入面俾返啲收到嘅款項俾UberEATS ,但係如果個戶口收到嘅現金數量多過你嘅人工好多,佢就會要求你響限期內俾返某個數量嘅金額俾UberEATS,如果限期後仍然未有支付,UberEATS會暫停俾現金單你做,並且需要你用Visa 或者 MasterCard 俾返啲收到嘅款項俾UberEATS 先可以繼續做現金單。

至於衣著方面,UberEATS零衣著要求,但係請你留意,你係響街上面工作,衣著請符合香港法例,切勿國王的新衣,敬請留意。

 

人工

人工我相信都會有好多人想知啦

先講下袋鼠

人工係逐單計嘅,每一單嘅人工以一個算式計算,條算式係包括計算你嘅送遞距離以及時間,但係無論點計都好,最少都$35 一張單,但係實際係海鮮價,即係話啲單好多都會過$35 一張(公司數據話得1% 嘅單係貼住$35 一張),張單實際幾錢,派張單俾你個陣會見到,俾埋餐廳同顧客地址你,你認為價錢同張單嘅內容合適就可以接啦,唔鍾意可以無條件踢咗佢。甚至接咗,但係響餐廳等太耐阻礙你時間,都可以踢,但係只有成功送遞嘅訂單先有錢收到,任何情況下踢咗嘅單就無。

到熊貓

人工係逐單計嘅,每一單嘅人工係根據唔同地區有唔同價錢,每隔一段時間就會更新,每次都有增減,但係你必須要接受9成佢派俾你嘅訂單,你先可以有一個好靚仔嘅人工,否則每張單劃一一個非常低嘅價錢。即係無得揀單做。無論幾阻礙你時間都好。

詳細嘅單錢計算,熊貓外送員資訊網站(tag9that https://www.pandarider.hk/?lang=zh)不定時更新

到UberEats,佢嘅人工係逐單計嘅,平均每日單響冇獎金嘅情況下大約係$30 – $40,但係每一日嘅午市同埋晚市都會有額外嘅獎金嘅,你預計午市同埋晚市嘅單計埋獎金你會有$40 一單啦。至於你每一日有幾多單就睇下呢一張由UberEats提供嘅指引啦,繁忙地區真係可能有機會會有架,但係步兵多數都係11-13單左右啦,如果你做全日嘅話

來源 「UberEATS拍擋網上支緩平台」

 

新人獎金

有一樣好緊要嘅嘢就係新人獎金啦,其實幾乎間間公司都有,其實你只要入職後返一兩日工都已經會達到新人獎金要求,嗰度都有過百蚊架。

但係要有新人獎金,必須要響填入職申請表上面填寫介紹人但係要有新人獎金,必須要響填入職申請表上面填寫介紹人但係要有新人獎金,必須要響填入職申請表上面填寫介紹人(好重要,所以要講三次,因為關乎到你份獎金)

咁你哋放心,我哋絕對有介紹人俾大家填嘅,想要介紹人填落份申請表到就PM我個page《外賣仔 遊歷記》問我啦,三間公司都有介紹人可以俾到大家架

 

工作地區

咁到最後如果真係會做,工作地區有咩可以揀呢,如果做袋鼠或者熊貓,多數港島區係最容易有位嘅,主要原因係因為越來越多人響港島嗌嘢食,所以係咁請人都唔係幾夠。九龍都有位架,只不過少啲,相比起港島,都可以試下申請啦,不過新界就真係一般啦。

至於UberEATS,你就梗係想響最多單嘅地區上線以獲取最多嘅訂單以賺取更多啦。邊度多單就真係要睇返 「UberEATS拍擋網上支緩平台」(tag9that: http://hkubereats.com/)上面有寫邊度會比較多單嘅,而UberEATS Telegram 頻道都會經常宣布邊一區爆緊單,咁就唔驚冇單啦。

 

關於工作嘅一啲要注意嘅事項

你睇完呢篇文,你可能會覺得,行路姐,輕鬆啦。但係其實有啲嘢你係需要注意架

夏天真係會流好多汗架,記住帶多啲水,飲多啲水呀,同埋有好多地方都有得斟水架,飲晒就去斟水啦。同埋真係要有充足睡眠呀,因為你真係要企響條街成日,行成日架,一定要有充足睡眠呀。最後,記住著波鞋,或者舒服嘅鞋,因為行得多呀

好啦,應該講哂要講嘅嘢啦,如果要填寫介紹人去攞新人獎金,又或者有咩問題想問都可以pm我嗰page《外賣仔 遊歷記》問我啦。

 

專題:【外賣仔日記】

 

 

作者:外賣仔

外賣仔

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 205089
Date: 2020-03-26 22:36:38
Generated at: 2020-06-06 09:40:41
Permalink: https://www.vjmedia.com.hk/articles/2020/03/26/205089/【外賣仔日記】如何成為外賣仔(或女)2020-修訂版