作者: 小盛女
小盛女
小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

無論係拉麵、車仔麵、擔擔麵、喇沙,甚至係公仔麵或者杯麵,Mike都好鍾意飲晒啲湯,因為覺得夠濃夠咸好好味,而我就極少飲,頂多都係飲一兩啖,可能係因為由細到大阿媽都同我講呢啲係味精湯嚟,無益,叫我唔好飲。所以當我同Mike一齊食麵嘅時候,我成日都會叫佢唔好飲啲湯,不過我有張良計,佢有過牆梯,當就嚟食完碗麵嘅時候,佢就會好醒目咁淨係夾一兩條麵碎落個大湯匙度,然後放滿湯,我一話佢飲湯佢就好理直氣壯咁話:「啲麵未食哂喎!」

「Brenda,其實你返工有無化妝㗎?」腦細Michael突然問。「我淨係查咗少少有色防曬咋。」我說。「佢不嬲都無化妝㗎啦,80後青春吖嘛。」70後同事May說。「下!乜你連唇膏都唔查㗎?唔係掛?」90後同事Bibi驚訝地說,無啦啦佢又答嗲。

我就係鍾意聽Twins 嘅歌

好多時聽Twins嘅歌會令我諗返起以前學生時期嘅生活係幾咁開心,嗰陣真係可以話係天真無邪,無憂無慮,唔使成日諗人哋到底諗緊乜,佢講呢句說話係真心定想串我?呢個人對我咁好有咩目的?點樣先可以上到位?頂多都係驚默書唔及格,測驗考試唔識答,或者係呷醋best_friend好似同另一個同學仔friend啲。

「初初睇陳凱琳都覺得佢幾靚,但係而家個樣好似越睇越怪。」我邊揭八卦雜誌邊說。「係囉,好怪,都唔靚嘅。」男友Mike說。然後無幾耐佢就send咗佢同陳凱琳嘅合照畀我睇,事緣係佢公司咁啱搵咗佢拍嘢,所以有機會集郵,話晒都係明星,如果換轉係我,我都會影,好正常啫。過咗幾日我哋一齊出街食飯,唔知點解佢又講起張相。「嗰日我話想同佢影相,跟住即刻個個都爭住影。」Mike說。「下?即係你係第一個主動話想同佢影相?我以為係人人都影所以你先順便影埋一份。」

話明戰衣,點都要形容下畀大家知係點,我真心覺得條裙係唔錯,雖然只係喺H&M買,係一條黑色嘅背心連身裙,長度到膝頭哥上面,上窄下有少少散開,最堅係胸對上嘅都係黑色seethrough,當中有啲黑色圓波波,若隱若現,似有嘢望其實又望唔到嘢咁款,個style係成熟得嚟又有啲cute,堅係一條好有心計嘅裙嚟。

話說阿Mike諗住儲多啲錢同我結婚、買樓,組織小家庭,所以佢就轉咗去而家呢間公司度做,人工當然高啲,但係比以前辛苦一百倍,其實以前都已經好辛苦。有幾辛苦?就係連續成個月每日都瘋狂OT,有時甚至OT到凌晨,就算唔凌晨都成11、12點,仲要係未食飯㗎喎!公司根本就係唔夠人,仲要不停接job,senior辭職就走去請個junior返嚟頂就算,甚至唔請,慳皮到死,冒求chur到所有員工氣絕身亡為止。

我幾點收工關你叉事咩!

「你呢排係咪好得閒?我見你成日都好早收工,琴日六點幾已經唔見你。」人事部Macy說。「我放六點,六點半我先走㗎喎,而且準時收工都正常啫。」我說。「無,想睇下你係咪好得閒咋嘛,以前你成日都好夜收。」Macy說。

話說小妹以前係讀女校,諗返起以前中學嘅生活都好開心㗎,仲識到班好姊妹,不過硬係覺得爭咁啲嘢,就係無拍過拖。雖則每個人嘅性格都唔同,但讀女校唔多唔少都會有啲影響,你諗下六年嚟日日都淨係同女仔相處喎,雖然都有幾個阿sir,但係有幾可會同佢哋講嘢先?而且男老師同男同學係好大差距,根本都唔同,長時間咁樣真係會唔係幾識同男仔相處,所以女校嘅人出到去(大部分)一係就好摺一係就好主動,即係所謂嘅姣,而我就係屬於前者,即係慢熱,靜嗰類。

邊個話男人唔會呷醋?

有次就係因為我拎嘢嘅時候唔小心掂到個電話,whatsapp藍tick咗,但我根本無睇到個message,當然就無覆到,然後佢就自編自導自演咗一個我偷食嘅故事,仲講到似層層,怒火中燒咁款,鬧咗我一大餐(呢啲事絕對唔係淨係女人先會做)。其實我本身已經好少會喺同朋友食飯嘅時候玩電話,特別係只有兩個人嘅時候,因為感覺唔係好尊重,難得約出嚟見面,如果要我望著你玩電話,咁又有咩意思?將心比己,所以我都唔會咁做。

每個人都有唔同嘅喜好,可能有人鍾意玩水上活動,有人鍾意玩音樂,有人淨係鍾意打機。如果無傷大雅又唔係太過份嘅話,其實都唔需要為另一半去改變自己嘅喜好,因為可以喺空餘時間做自己喜歡嘅事其實真係幸福。扣除食、瞓、工作同交通嘅時間,其實私人時間已經所餘無幾,如果不幸要加班,更加係精神同肉體上都有心無力,有時間都只係想用嚟休息,所以能夠自由自在咁做自己鍾意做嘅事其實好難得。可惜人越大,反而越容易放棄。

揀水鞋同揀男友一樣咁難

水鞋都有好多款,我揀嘅時候主要係著重個款好無睇、長度、重量、透氣度同舒適度等等。好現實,揀水鞋同揀男朋友一樣,第一樣一定係睇樣,唔係話唔著重內在,唔係話一定要好靚,只係如果你第一眼望落去對水鞋度已經完全無好感,我肯定就算個售貨員之後無論點sell你都好,都係唔會成功。至於好唔好睇呢家嘢其實好主觀,正所謂情人眼裡出西施,有人鍾意五顏六色夠繽紛,有人鍾意淨色夠沉實,有人鍾意有花紋,我個人就鍾意黑色,型得嚟又唔怕污糟。

「你洗碗要隔渣呀,唔係會整塞條渠㗎!」經理說。「阿姐我洗咗碗咁多年使你教!我不嬲都係咁洗㗎啦,有乜問題呀!」洗碗火雞姐說。「唔隔渣條渠會塞,塞咗係咪你通?」經理說。

「免加一怎麼夠!多送我兩個菜吧!還有這個不太好吃,幫我取消,否則我不會再來!」客人A說又說。

其實我真係好嬲,我嬲佢點解要同我講可以準時收工,我嬲佢公司點解會咁多嘢做,搞到佢晚晚凌晨,甚至朝早先收工,我嬲佢同事點解唔幫佢分擔下,我嬲佢點解唔反抗腦細,但我最嬲係佢無好好愛惜自己身體。我係好嬲,但係我又可以點做?理性同我講我係唔可以嬲,加班佢都唔想,腦細唔放人,可以點?我唔可以比佢份工影響我哋嘅關係,我唔可以輸畀呢個小三(份工),而且等咗個幾鐘,都係想見一面,食餐飯,如果我仲嬲,咁咪更加嘥咗啲時間?

唔好以為外國人就一定對人好nice,最初幾日真係無人同我講嘢,我英文又唔係好,淆底症發作,驚講得樣衰畀人笑,於是更加唔敢主動聊人講嘢,變咗個啞人。但係嗰陣得我一個人,如果我唔主動啲,真係無人幫到我,唯有豁出去,以反正柒咗都無人知嘅心態去聊人傾計,點知又真係work喎,仲因為教佢哋講廣東話粗口而無啦啦friend咗,題外話其實佢哋英文grammar都成日錯,根本唔會介意你講得好唔好,只要你夠膽講就得。

Ken哥係公司嘅老臣子,負責採購同管倉,可以話係一人之下,萬人之上,除咗腦細,無人搞得掂佢,個個都要睇佢面色。十次有九次我見親佢都係大大聲咁鬧緊人,真係好彩我唔係直接隸屬佢。除咗黑面,佢仲有一大特色,就係無論發生咩事都一定會大大聲凶咗人先,就算後來發現原來係自己錯,佢都唔會講sorry㗎喎,點都可以賴落你度鬧你,總之你錯佢就鬧你,佢錯都係鬧你。

頁 1 / 12123456789101112