無綫《東張西望》係做專訪定拍戲？

（編按 : 尖碼之聲明白傳媒在成功保留巴士總站後對組織和人物進行採訪，他們只希望透過這類專訪讓更多市民清楚事件來龍去脈，因此都盡量與各傳媒機構配合，盡量避免推掉採訪。但同時地不欲「出風頭」，更不希望被傳媒扭曲他們的心態和過去多年的做事風格，因此撰文宣洩對有關事件的不滿。經作者同意在本報刊出。）

無線《東張西望》畫面（轉載原因屬釐清評論對象）

週四晚再有有關尖碼的訪問，聽到《東張西望》已經心知唔荒有好嘢，我哋已經商議咗一堆「啱師奶口味」嘅說話內容，結果就好似形容民＿＿嗰句「沒有最無恥，只有更無恥」咁，「沒有最垃圾，只有更垃圾」。

同製作組見面做準備時，佢哋話隻「故仔」係想「幾個年青人去保衛巴士總站」，我哋已經多番強調「我哋唔細架啦！」（編按：作者已經四字頭；作者澄清，係「就嚟」四字頭），先至肯刪去「年青人」。跟住係咁問「成功爭取係咪好開心好興奮」，我哋不斷話「開心不過是完成咗一個任務」、「放低重擔，如釋重負」之類，個應該係編導嘅友仔（ROLL機期間佢會側邊提出問題）依然係咁問我哋「有乜好開心好興奮嘅事同觀眾分享」，我哋都只係重覆嗰啲說話，呢條友仔好唔耐煩咁，俾我收到嘅訊號係佢連「如釋重負而有嘅喜悅」都唔想收貨，硬係要有一種「好開心好興奮」嘅情況出街。少少火起一句車埋去「唔好意思，你想有嘅嗰種心情係絕對無，唔好再追問」，佢先面黑黑唔再問。

佢哋呢啲提問已經令我起晒疑心–>到底想拍乜呀？SET 好故仔要我哋「演戲」呀。繼而就係構想出佢哋要求拍嘅畫面，係完全膠味濃郁。衰啲講係俾啲觀眾笑下「有班傻仔憨居居保咗個巴士總站返嚟，依家就『好開心好興奮』啦」嗰隻。

跟住一個「膠位」就確定呢班製作組不可理喻。做晒訪問就要拍定啲「過場嘢」，無端端叫我哋「不如攞部相機出嚟拍下『影巴士』」　嗰一刻即時叮.叮.叮.叮.叮.。即係佢哋SET咗嘅「劇本」係以「巴膠」嚟做approaching，即係以「巴膠留巴總」嚟播出街啦。於是乎拍咗唔夠5秒就OurTV上身大叫「喂，唔得，CUT機，膠味咁濃郁點做呀？！」佢哋死死氣停機，而個「應該係編導嘅友仔」面都黑埋，問我哋有乜問題，我話「唔好拍到巴膠咁得唔得呀」？！結果就要我哋响度「扮」傾計，但係又都要我哋指下啲巴士之類。心諗….佢哋想「巴膠approach」即係搞禍晒我哋，所以我哋死都唔點指

卒之拍咗2-3mins又停機，製作組無晒聲氣，又無話走。個接頭嘅「記者」係咁問我哋個心有乜感受可以講，又問「保到巴士總站有乜開心嘢可以講下」，我哋都係講返啲「多謝市民支持」「如釋重負」「歷史因素覺得值得保留」然後就由碼頭棚底移去麥當奴對出拍埋最後幾個shot就收工。

成件事有合理理由相信，《東張西望》製作組應該係「寫好劇本」要受訪者跟「劇本」去演。嚴肅啲講根本連「訪問」二字扯不上關係，甚至連最基本的尊重受訪問對象完全都無。而集中响我哋嘅訪問而言，响呢班人心中同「巴士」有關嘅topic只能用「巴膠」嚟approach，即係將成件事朝負面去做。真係多撚謝晒啦！！！

《東張西望》製作組你哋要膠係你嘅事！！四年多以來我哋係認真做事。

今晚嘅production唔跟「劇本」、滿足唔到你哋啲膠口味要求而唔想出就由得佢！！！！！

作者：林鴻達

Jacky Lim，香港土產但祖家四代來自馬來西亞砂朥越州古晉市。縱使2012年8月8日成功爭取保留尖沙咀碼頭巴士總站，但未能歸隱，唔只因為「仲有手尾跟」，更體會到香港真係一個 Dying City!! 社區發展動力培育政策會員，參與社會議題、政策研究倡議；報刊時事評論撰稿，文章可見《蘋果日報》、馬來西亞《東方日報》、新加坡《聯合早報》

閱讀後覺得好，請多多讚好及分享～：）