BT 攝
自稱自己公信第一、中立持平的《明報》，其實一個拾荒長者被食環署欺壓，類似事件都唔係第一次發生，咁細單野你地都咁地認真，要搵埋記者同攝記做採訪，本來就好值得欣賞。
但係，你除咗利用左我做你地故事引子，然後仲刪除左我第一身告訴你們的所見所聞，仲冇講到事件嘅前因，然後直接將一個「食環署選擇性執法」轉變成「拾荒長者造成環境衛生問題」，再荒謬到找一些有利益衝突，自己也有阻街的店子老板，去指責婆婆阻街，已到達否荒謬的經典。
還有，貴報既然到塲，只針對一個老人家，竟然連老人家住邊，人地家居都環境如何惡劣都形容埋，但偏唔講一下成條街的大小店子，包括嘉咸街的排檔、酒吧、茶餐廳、五金店、花店、西餐廳、超級市場阻街極普遍的實況隻字不提，例如：「附近店鋪的阻街情況也很普遍」、「受訪的茶餐廳也有阻街情況！」
貴報真係連12隻字都無位？？？？
即係咁！我呢人又好認真，我放工後真係走左落去探婆婆，仲傾左成半個鐘頭，問左佢好多野。
明報呀明報！你地記者到底有冇詢問過婆婆這個當事人？又有冇詢問佢一個最簡單而又原則性問題？
*******************************
我問：「婆婆，你去邊度拾咁多紙皮架？」大家估唔估到佢點答我？
婆婆話：「我唔洗四圍拾架，係左右隔離d鋪頭做生意掉出來比我，佢地求其掉低就走，成日要我執手尾，連垃圾都要幫佢地執埋，掉到一地都係，你睇下呢d垃圾，有時連飯盒都有呀！」
**********************************
即係話，基本上婆婆係幫手處理其他鋪頭掉出來的廢紙，亦即係話就算呢個婆婆唔喺度，轉頭都會有另有位婆婆過來執嘢，咁我想知，到底係有雞先定蛋先？又到底係婆婆搬啲嘢過嚟「影響市容」，還是婆婆在「整理市容」？
另外題外話，婆婆唔喺茶餐廳所指，那種有樓又有大把錢的「病態拾荒」老人囉（呢一種講法真係好賤），婆婆就係那種草根出身，只有$1090生果金，沒有攞綜援，依靠執紙皮為生的老人家，兒子也只是基層工作，她下星期眼睛就要入院做手術，都係要排街症那種一基層人士。
而三番四次的投訴，也是來自對面馬路的賣印刷油墨的店子，基本上，附近不同的店子，包括佳寶超級市場也給他投訴，亦即是典型的投訴常客，店舖老闆自己也說連申訴專員公署都投訴埋，呢啲人都唔係野少啦，而食環署個指三個月有十個投訴，明報又有詢問食環署是否單一的投訴呢？
明報，辦報紙辦到要跟住facebook去跑新聞已經夠可笑，若果你真是自認（恥笑中）公信力第一，呢D咁簡單既野，點解我一個普通人都會疑問同發掘得到，而你哋又無做到呢？明報若果你們有預設立場，你要講自己的故事唔緊要，但唔使搵一個七十幾歲，雙眼有白內障，腰也彎曲了，好天曬落雨淋的一個基層婆婆落手囉！！
人有人格。報有報格。
延伸閱讀：
BT 與經常投訴的茶餐廳負責人對質(2012.1208)
這位茶餐廳老闆自己阻街，開店後搬哂枱櫈出街做生意，連
明報報導(2012.1206) 市民護拾紙皮老婦 街坊紛指阻街
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2012年12月8日
