2013年DSE通識科練習卷之試後感（卷一）

（photo via cc Flickr user Alex France）

是咁的，係岩岩既星期四，我已經做左考評局新鮮出爐既最新一份通識科練習卷，對住呢份自稱題目少左既卷，我想問聲：傻的嗎？

係講個三題之前，先講番呢份練習卷既分布。比起上年DSE個份卷，練習卷總共有7個小分題，比DSE個份卷少左2個小分題。睇落去考評局好似知衰，肯聽下學界講調整題目數量，避免學生答唔哂既情況。但事實上，呢7小題入面，分布竟然變左4，8，8，6，8，6，8。咪姐係變相要答多2條c題！咁都叫回應左第一屆DSE通識科題目太多既問題？係冇加時既情況下，考評局真係覺得大部分學生可以因此做得哂呢份練習卷？再講下時間分布個到，岩岩先開始習慣40分鐘做一大題，依家個分布改成咁，你覺得我點可以先可以確保3條都做得哂？（用家經驗：40分鐘做一大題真係未必可以做哂）

另外，係今次既練習卷入面，竟然得番1條可以執多幾分既4分題，取而代之整多幾條要時間諗，寫好野又未必可以高分既6/8分題，考評局係唔係想整死d考生？最弊既係，如果正式考個陣又好唔平均地亂咁斬d題目，學生辛辛苦苦咁操卷，到頭黎竟然白費心機，咁學生努力咁操題目又有咩用？其實講到底，第二屆考DSE既學生同做第二批白老鼠有乜分別？

再講番練習卷個3題，第一題整條Old news唔_識串既議題，我都覺得算叫大路，都叫還可以，所以第一條都冇乜特別；而第二條人體器官買賣，開始做a題個陣都覺得正常，但一去到b題，問題竟然問人體器官買賣點樣反映全球化既陰暗面！雖然係人都知呢題係要講全球化所帶黎既負面影響，但我想問點答先叫對題？點答先叫中point？依家考緊通識定中文？

整左條奇奇怪怪既題目都算，第3題d資料同3b個題會唔會太過9唔搭8？係，資料係反映左年青人少參加社區活動，3b個題都係問年青人參與社區活動，但睇清楚d，3b既問題係「通識科多大程度有助提升青年人對社區事務的參與」，痂Q線！條問題同資料幾乎冇乜關係，咁同做PAPER2有咩分別？考評局係咁同人講通識唔可以吹水，但諷刺地出左條吹水題；最離譜既係，呢條問題係唔係想引導學生答很大程度同意，借機表揚自己搞通識搞得好成功？so9rry，我答左很小程度同意，你吹咩？

另外，因為上年好多考生話對政治不太熟識，導致一大班人攬炒，結果考評局「從善如流」所以冇左政治議題。雖然我認同考生唔係高登仔，能知天下萬事，但部分政治議題／時事只不過係好基本既常識黎架wor，考生自己唔關心，衰d講句係你自己既責任，點解要考評局就你地唔出政治議題？其實我對環境科技既議題近乎一無所知，又唔見考評局唔出有關環境科技既問題？如果考評局係要為左遷就班學生削足適履，咁通識科考黎把鬼？

作者：Zero

閱讀後覺得好，請多多讚好及分享～：）