尖東肥貓忌廉哥

（原載於：http://jackyhtlim.blogspot.hk/2012/12/blog-post_22.html）

攝於2011年12月一個早上。當時忌廉哥還未「紅」

呢隻肥貓依家眾所＿知，但相信大多數都係因為佢曾經懷疑被擄走上報而先認識。我鍾意周街撩貓玩，早幾年因為工作關係响尖東一帶出沒已經見過呢隻肥嘢！

近期的確紅爆，紅到拍廣告、出月曆，甚至出書。今晚本來會經過尖東打算路過探望下佢哋兩公婆，點知去到人頭湧湧，但其實都見怪不怪了。碰上記者老友才知道新書開售。同佢兩隻肥嘢影相之餘都有幫襯返一本：）

與其話係書，不如話圖冊比較合適，但都有文字介紹忌廉哥嘅故事。其中一章講到佢嘅身世，可以話係貓版醜小鴨 － 老豆老母係 Breeder （養殖場）所養，打算配「較值錢」嘅Blue-grey 出嚟，點知嗰胎零零舍舍出咗隻「無咁值錢」嘅Creamy Colour，前半生受盡白眼同欺凌。直到高生高太收養咗佢，同擺响舖頭之後就成隻生猛晒，似返隻貓！呢段「貓生經歷」，更加佐證要加快立法杜絕寵物販賣，遏止啲Breeder 為求賺錢迫使啲貓狗做「生仔機器」，甚至有更多初生寵物重演忌廉哥的前半生。

所謂「貓」紅事非多，有說法指高生高太視忌廉哥同妹妹為招財貓搖錢樹，亦有人指高生高太根本不會愛護動物，拍廣告印月曆出書搵埋唔少。我無意考究亦唔想評論，但上星期日出席青衣城一個動物組織的活動，賣月曆嘅收益會撥歸有關組織，條數公佈晒出嚟。至於賣書嘅收益，我有問過高生，佢亦好直接同我講，一切由發行商發落。

或者換另一個角度去睇，日本都有隻 Maru 嘅貓紅爆Youtube，同樣有拍廣告出商品，為何日本人可以咁做而香港人唔得？

但既然隻肥嘢唔怕人，算係樂意為人帶來歡樂，何須執著呢？亦好現實講句，買貓糧都要錢，忌廉哥亦步入中年身體要緊，更是業主可會…………你懂的！

不過，大家去搵隻貓嚟尋求歡樂嘅同時，亦應該注意應該如何對待、保護佢。佢唔怕人唔代表可以任你魚肉，唔好話「你摸佢又摸」隨時搞到佢惹到皮膚病所以要絕對禁止之外，太多人哄埋去而有嘅心理壓力。所以唔好成堆人圍住佢 ，更加唔好大呼小叫。影相勿用閃燈呢個亦係常識，依家求其搵部電話嘅影相功能都Night Mode 可以加大光圈，暗得滯影唔到唔該下次請早，在日間拍攝。人哋養隻貓俾你玩唔係奉旨，雖則高生亦曾經向我明言「最緊要大家開心」，但我還是建議「係咁意買枝水或者一包香口膠」，體現香港人嗰種禮尚往來互相尊重嘅精神吧！

作者：林鴻達

Jacky Lim，香港土產但祖家四代來自馬來西亞砂朥越州古晉市。縱使2012年8月8日成功爭取保留尖沙咀碼頭巴士總站，但未能歸隱，唔只因為「仲有手尾跟」，更體會到香港真係一個 Dying City!! 社區發展動力培育政策會員，參與社會議題、政策研究倡議；報刊時事評論撰稿，文章可見《蘋果日報》、馬來西亞《東方日報》、新加坡《聯合早報》

閱讀後覺得好，請多多讚好及分享～：）