家陣枝區旗好難掛咩？！

（最新補充：https://www.facebook.com/photo.php?fbid=310641725712627&set=p.310641725712627&type=1&theater）

首先回吓帶，話說舊年七月，有條友1無無聊聊發現咗獅子銀行張新一百蚊紙，背面個圖案枝區旗搞錯咗……哎呀，唔止，係倒轉咗嚟掛添呀陰功！

（低清轉載截圖，點擊進入明報網站閱讀）

呢條友話，其實都唔係第一次見，好多學校、酒店，甚至政府部門都會掛錯咁話喎。佢仲同啲記者解釋得好清楚究竟點錯法，哦，原來只要認住朵洋紫荊係只有一片花瓣直指正上方，咁就唔會錯架啦。

點知啲人都係唔聽書嘅，尤其話自己愛護香港果啲力量呢，成鬼日都鍾意要大家倒吊架！

（取自庫斯克facebook，2012年12月11日。蒙准許使用。）

（低清轉載以釐清評論對象。點擊進入《蘋果》網站看全文）

究竟呢班人係唔睇報紙唔睇電視冇聽過果條無聊友解釋吖，定係佢地連基本圖案認知都有問題呢？口口聲聲話自己愛護香港，連自己枝招牌旗都掛得錯，愛極有限啦老友！哦……或者又唔怪得佢地嘅，係有人叫佢地愛護嘅，好似黃子華話齋，茄哩啡有糧出就係因為佢「嚟咗」之嘛，出現咗咯，你叫佢做清兵咪清兵，死大佬咪死大佬囉。姓陸果位先生吹雞咯，先仆出嚟效忠之嘛，啲戲唔係發自內心，難免有錯漏架喇。裙拉褲甩尚且難免，何況區區一塊紅布？睇開啲啦！

不過，又未必個個都有果條無聊友咁眼利嘅，最衰都係設計果個啦，整朵花旋轉對稱嘅 － 睇怕果啲力量嘅人都唔明咩叫旋轉對稱架喇 － 又唔見有人掛錯呢枝旗？

（羅柏斯攝）

補多句，有啲人咁樣解釋倒掛旗幟架～～～

1. 編按：《明報》那位受訪者的名字與本文作者好相似………… [↩]

作者：慶生

慶生，唔係好乖嘅基督徒，前中學教師，篤爆匯豐錯版100蚊紙始作俑者，曾經留學日本，而家係freelance日語教師。 此外亦係行動不便嘅拐杖友，最近新寫專題：「椅杖遊蹤」系列，希望喚起大家關注呢個常人唔為意嘅咫尺天涯。

閱讀後覺得好，請多多讚好及分享～：）