今晚，香港會點？

《元旦倒梁劇本》

蘋果日報吹雞叫市民元旦日上街倒梁，公民黨民主黨對彈劾梁振英的取態是「觀望」，即係觀下先又望下先，若果彈劾不成，兩黨就可大發悲情宣言，大前提是兩黨都不會參與彈劾，又即係彈劾必不成功，兩黨的取向很清楚，其實就是不想梁振英下台。

於是，既要聲稱倒梁，但又同時力保梁的江山，劇本如下：

一罵二哭三妥協 –>說倒梁但不彈劾 –>發動上街熱鬧哄哄 –>如常排鴨仔上街街 –>遊行至政府總部示威區 –>開心圓滿 –>泛民發表慷慨激昂又例牌的倒模式演說 –> 社運界接管 –> 有人宣布絕食 –> 政總歡樂今宵 –> 政府揾個官出嚟表示遺撼乜乜物物（都係果幾句啦～） –> 這時候，大家最期待的畫面出現了！！！！！

「今日！我地喺呢度！呢度！有大家，係咪呀！（記得遞 Mic 向公眾：係！）… 大家嘅表態係咪好清楚呀！（觀眾雷動：係！）…今日，我地要暫時退下，但今日嘅結束，係為下一輪嘅戰鬥作準備！係咪呀！（觀眾：好！！！）…大家都要過年，我地無權、亦唔應該阻住大家過年嘅！係咪呀！（觀眾：係！）…..好喇大家守秩序，慢慢散去…..（群眾閃光燈不絕，難捨難離地慢慢散場）」………..

跟住第二日「我地嘅蘋果日報」頭條：《全民震怒‧誓倒梁共！》

好嘢，收工 ~~~

— 摘自網上

話說，today I had a very Hong Kong day。

今朝早返公司實習，因緣際會同一位南亞裔大律師寒喧幾句，好奇心驅使下上bar list查查，發覺原來佢來頭唔小。佢係香港第一個，亦暫時係唯一一個菲律賓藉既女大狀。佢八十年代黎到香港，本身係一位會計師，後來覺得做會計好悶，走左去法庭做傳譯員。係上司鼓勵下，佢苦讀法律，考獲大律師資格，從此矢志為香港的菲律賓人和南亞裔人爭取法律權益。

Lunch hour既時侯我去左中環砵甸乍街既一間細麵店食飯。個度好多人，好熱鬧。帶位、落單、收銀、廚房既伙計個個一腳踢，好似好混亂咁，但係佢地其實好有效率，而且仲可以一路做野，一路同熟客有講有笑。帶位既哥哥仔帶左我去同兩位南亞裔女士搭枱。我一坐低，其中一位女士就用純正既廣東話嗌左一碗細蓉加油菜。佢個friend又想自己用廣東話嗌，但係佢應該係初學佢個friend又想自己用廣東話嗌，但係佢應該係初學，唔係好講得到。個伙計就同佢講笑：「拿！你唔好講住，等你個friend講多次你聽先！」

我就叫左碗雙併炸醬水餃麵。碗麵黎個陣，我見到有兩隻水餃。大家可能覺得得兩隻好少。但係唔係，隻水餃有成大半隻手掌咁大，而且真係好足料，一咬開，成口都係雲耳，甘荀，豬肉同蝦。埋單三十一蚊。中環，今時今日既香港，算係咁啦！

食完返到office開iPhone睇下新聞，不禁有D感慨。今日既香港，我真係唔知道我以後仲有冇機會可以經歷得番今朝既野。地產霸權下，街坊小舖一間一間被逼走。外傭居港權案，催生出對少數族裔既仇視。人權？法治？民主？真係學阿源講：不要再說了。

有人話，香港今日搞成咁，問題自香港回歸時起。Come on James，其實諗真D，由《中英聯合聲明》開始，香港已經開始陷入危機。《基本法起草委員會》訂下功能組別，分組點票；臨時立法會時期通過既法律……香港今日既問題，伏線早已係回歸前埋下。冰封三尺，非一日之寒。只能怪香港受殖民地主義下既教育同政治制度下影響，政治意識向來普遍薄弱，又不乏討厭政治既犬儒主義者。至於社運界同泛民既多年黎既抗爭「成效 」，大家更加係有目共睹。老實講，聽日既遊行，參行得既，有邊個唔想CY落台，聽日立即普選？但係，真係，真係，真係，我完全諗唔到一個樂觀既理由。我曾經天真咁相信過香港社運式既「快樂抗爭」，香港民主黨式既「和平理性非暴力」，但係快樂抗爭、和平理性非暴力過後，我地究竟成功爭取過D咩呢？

聽日，我真係唔知香港會變成點。願愛香港的人為香港祈禱。God Bless Hong Kong.

（photo via cc Flickr user das farbamt）

作者：向東一江春水

閱讀後覺得好，請多多讚好及分享～：）