（photo via cc Flickr user chinogypsie）
睇完《不要驚動佢地既愛情》一文，我諗起左一段本來應該埋藏係心底既悲慘往事……
我曾經邂逅過一名hardcore耶青仔，我要強調，係極度hardcore，姐係一星期返幾次教會，對教會有無限貢獻果一種。我自己呢，嚴格黎講都唔係咩信徒，只係得閒無野做跟朋友仔返下教會，呢樣野都係令我同佢最後出問題既主因。
好多人唔明我點解揀佢，其實都係貪佢乖乖仔，不好嫖賭飲盪吹咁囉。當初撻著都係因為跟左佢返教會，詳細過程都係類似TVB師奶劇，唔多講啦。至於表白呢，真係得啖笑：「我覺得你係上帝安排比我既對象，上帝一定會祝福我地。」又唔知點解果下覺得幾嗒糖，就開始左。
好記得開始左唔夠一兩日，傾傾下電話果陣，佢突然間問我，你覺得我地點樣先可以好好相處落去？我答佢：「我地岩岩先開始，我諗慢慢磨合下，就會搵到方法咖喇。」
點知佢語氣極度認真堅定咁同我講：
「你錯啦，相處之道係有標準答案咖：
愛是恆久忍耐，又有恩慈，
愛是不嫉妒，
愛是不自誇，不張狂，不做害羞的事，不求自己的益處，
不輕易發怒，不計算別人的惡，不喜歡不義，只喜歡真理，
凡事包容，凡事相信，凡事盼望，凡事忍耐，
愛是永不止息
拍拖就係咁咖喇，你明白未呀？」
佢竟然係條街度講講下電話，無啦啦成個愛的篇章背左出黎，我果下忍笑忍得幾辛苦。
到左我生日果陣，成班朋友係度恥笑我，你估佢會送新約定舊約聖經比你，我心諗，唔係掛，大佬我真係喊三聲咖。結果呢，我收到張寫住金句既生日卡，呢個都唔係咩問題，重點係份禮物竟然係一個鐘！係一個寫住聖經金句既鐘！本來為左佢我都開始戒粗口一段時間（拿當然分左手又另一回事），果下我真係忍唔住心入面爆左句：「我＿！生日送鐘你都做得出！」
咁我地既關係由幾時開始變差咖呢？係由一場交開始。本身我都一排無返教會，所以祟拜果陣成日揭聖經揭到鬼咁慢，結果就比佢大鬧喇：「你係咪好少係屋企睇聖經？你根本都唔夠虔誠！你點做我女朋友？」其實一開始佢都知道我信唔晒，但佢當時都接受左，我以為佢唔會再介意，結果我係大錯特錯。無靈修又鬧，食飯前唔記得祈禱又鬧，同佢講下高登D好笑野又話我思想比魔鬼污染，日日淨係同我講：「你咁樣落去上唔到天堂咖喇。」
最後我覺得大家價值觀實在相差太遠，決定分手，佢仲當正我係魔鬼比佢既試煉。我終於知道點解咁多信徒堅持揀返信徒做男女朋友，老老實實，一個信徒同一個非信徒，就好似兩個凸字咁，係永遠都合唔埋。所以各位姊妹，如果你本身唔係信主既，亦唔打算「受男朋友感化」而信主，同信徒拍拖之前，諗清諗楚啦，唔好害人害己。
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2013年1月9日
