（原載於：端木鳴輕甜日記）
愛家共融祈禱音樂會網站截圖）
今個星期日，播道會恩福堂（即係蘇穎智支持陳茂波梁美芬嗰個恩福堂）同阡陌社區浸信會（即係林以諾）吹大雞響政總外面攪個「愛家共融祈禱音樂會」（大會網站）。佢地今次登全版報紙廣告，又動員教友不停send whatsapp散播訊息。佢地講嘅嘢包括同志平權會攪到香港道德淪亡、所謂逆向歧視會令基督徒郁啲就俾人告，同埋佢地嘅好興嘅殺著 － 撒旦攻擊… （報導）
協辦嘅仲有紀律部隊團契、播道會同福堂、播道會港福堂、香港國際全備福音商人團契、香港家長聯會。支持單位包括以勒基金、維護家庭基金、影音使團（即係攪出方舟鬧劇嗰個影音使團）。
睇參與教會同組織名單，咪就係香港基督教右翼嘅名單，其中播道會恩福堂係大旗手，恩福堂蘇穎智之前響立法會話同志平權會令大學生變性奴、要同志唔受家暴傷害冇可能，大家應該仲有印象。仲有，以勒基金就係成日叫人同高官祈禱嗰個組織。
呢次明光社冇份攪，不過同時間另一個反同志平權嘅網上聯署就係佢地加埋阡陌社區浸信會同影音使團攪嘅（聯署網址）。
基督教右翼班人呢種做法，好符合佢地嘅市場定位 － 保守又思想簡單嘅嗰批中產同有錢人。大家唔好忘記播道會嘅牧師言論，政治上係建制到爆，恩福堂蘇穎智就幫陳茂波梁美芬呢兩個極品拉票，港福堂吳宗文就公開抹黑五區公投、叫人唔好信有外國背景嘅教會，反國教事件就走出嚟維穩批評反國教運動。
呢班人嘅策略同美國嗰班基督教右翼有啲似，就係同保守政治勢力結盟，捉住所謂嘅性道德議題嚟團結保守信徒，幫佢地嘅政治盟友拉票。上面提到，播道會幫陳茂波梁美芬拉票、以勒基金歌頌高官，其實都係差唔多。
不過，香港嘅基督教右翼比美國嘅更不堪，佢地服務嘅係香港嘅維穩系統，維護呢個民主法治日日倒退嘅制度。如果響新約時代，呢班人就exactly有做法利賽人嘅潛質，滿口經文律法，實際上係為政權服務，而自己就榮華富貴。
你試下上網check下呢班人為香港嘅民主、人權、法治、弱勢社群講過啲咩、做過啲咩？佢地最多就係話民主好重要，但民主唔係絕對冇問題，所以要包容，要為掌權嘅祈禱之類，用呢啲似是而非嘅道理麻醉一班「討厭政治」嘅保守教徒，等佢地響自己個世界感覺良好。到關鍵時候，班右翼就會歸邊反公投、支持國教、同偽中產建制拉票囉。
佢地口口聲聲話愛同包容，實情係煽動教眾仇視同志。其實就算有反歧視法例，佢地係唔會郁啲就被指歧視同志。耶教徒如果真係咁驚，真係咁想有反對同性性愛同埋婚姻嘅言論空間嘅話，應該係爭取豁免權，而唔係反對立法。
香港有幾多耶教徒？得嗰二三十萬，你唔鍾意嘅嘢就要其餘幾百萬人都跟你嗰套，唔係咁霸氣吓嘛？
講真其實好多大宗派都唔buy佢地呢種利用同志議題高調製造恐慌仇恨嘅做法，所以你唔會見其他大教會加入。
我本身對耶教冇咩反感，不過我本身對班右翼好睇唔高眼，女友又不停收到佢個老闆同埋啲hardcore耶教朋友whatsapp，不勝其煩，所以有感而發。
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2013年1月11日
