前幾日特登請假，去換領已過期既回鄉證。
有關回鄉證，最廣為人知既莫過於佢張相，因為出左名麻煩，規則又多，除左你個樣一定要「四正」之外，連背景顏色都十分講究，最近仲多左一樣，就係要燒碟，種種規矩令你驚歎中國人喺留難人既手段上真係處於世界先進地位。
事前，已經有人告誡我，如果去到中旅社先影相，就千祈唔好幫襯門口外既艇仔，一定要幫襯中旅社裡面果檔官方指定影相舖，否則張相分分鐘過唔到關。而相反，雖然官方指定果影出黎既同街外影既差唔多，但就幾乎張張都可以過關，所以有人指責，呢個新規定係中旅社特登留難非官方認可既照片，令到有啲機構可以做獨市生意。
而另一樣更有力既證據係，原來幫襯官方果檔，係唔使燒碟既！當你影完之後，就只會有四張一模一樣既相（通常都係木無表情，因為你影相時操作阿姐一定會不停呼喝你「唔好笑！」，我就聽到不遠處有幾個阿婆喺度呻「又要碌大眼又唔準笑，影死人相咩! 影死人相就唔笑嘞」），再加一個神秘barcode，令到私相授受既傳聞更加似層層。咁事實係咪咁呢？以下係我一啲睇法。
「一定得」之謎
以下為中旅社「相片拍攝要求」：1
近期（六個月以內）的彩色相片
相片背景色彩為純白色，無漸變、不得有陰影、其他人或物體
申請人應保持坐姿端正，雙肩水平，正視照相機
申請人神態自然，眼睛自然睜開，頭髮不得遮擋眼眉及眼睛，要露出雙耳，不得化濃妝
申請人宜著深色有領服裝，不得穿著制式服裝及白色服裝
申請人不得戴有色眼鏡（疾病原因除外），不宜戴粗框眼鏡，眼鏡框不得遮擋眼睛，鏡片無反光
申請人不得使用頭部覆蓋物（宗教、醫療和文化需要時請提供證明文件且覆蓋物不得遮擋臉部或造成陰影），非永久性飾物不得遮擋臉部；髮髻過高或豎起的頭髮容易影響檢測結果，導致檢測不合格
照明光線均勻，臉部不得有陰影、亮斑
人像對焦準確，層次清晰、色彩真實
不得對人像特徵（傷疤、痣、髮型等）進行技術處理
嘩，真係影結婚相都冇咁多要求，連眼耳口鼻既距離都咁講究，難怪失敗率咁高，但點解官方影相舖又可以咁把炮造到「一定得」呢？
其實當我們影相前，已有個惡死阿姐提點你，應該要除咗啲乜野(例如眼鏡、花色外套等)，又或者要點你點搞好自己個樣(例如撥好頭髮，髮尾唔好遮耳仔等)，阿姐一日大大話話影幾百張相，自己經驗老到，大大減低你失敗既機會。而更重要既係，果部機出黎每一張相，都要經過一個檢測軟件，要個軟件覺得你張靚仔相合格，阿姐先會俾張相你，否則阿姐喺詛咒完你之後要你再拍多次。所以幫襯官方「一定得」既秘密，就係呢個檢測軟件。
點解唔使燒碟？
最近呢次照片風波，其中一個爭論點就係，點解要申請人燒碟呢？呢個應該係中旅社方面喺處理你個證件時，張相係會入落database度，而為左慳人手，唔想張張都再scan入去，所以先至要申請人燒碟提供一個相片檔案。
咁點解官方影相又唔使燒碟呢？
喺我影完相等緊檢測軟件結果時，我見到螢幕下方有一行細字:「照片副本已存檔: xxxxxxxxx.jpg」。換而言之，其實喺你拍照時，你張相既jpg file已經有一個copy，可能同時已傳到去中旅社個server度，所以你就唔使燒碟啦～～
聽到呢度，你係咪覺得官方同影相舖之間，真係冇問題呢？
其實，呢個情況就同香港政府成日講既「自由市場」一樣，表面上，官方同商家之間好似冇乜利益傾斜，因為顧客係有權選擇其他供應商，而官方指定果間好似同其他人企喺同一條起跑線上，只係佢做得比較好所以多人揀。但其實，只要大家細心啲諗，就發現中間既玄機。
點解官方指定果間，個檢測軟件咁準呢? 係咪有人之前俾左料，話左俾佢知道檢測既準則，等佢可以做到個100%準確既檢測軟件呢？同埋喺新政策推出之前，呢間野係咪同官方做左好多次既測試，等佢可以改進到個軟件至完美呢？
另外，如果真係如我所料，個file係copy左去中旅社個server度，咁點解淨得呢間可以駁上去，而唔係間間都得呢？
就係因為一啲少少行政上既手段，就可以做到有啲商家做到幾乎獨市生意，但由於官方並冇明目張膽咁送大禮，所以大家都冇藉口嘈到佢，到最後，「聰明」既大眾為左方便行事，都會揀左被選中既果一間。
以上既嘢只係我自己既臆測，但大家不妨諗下，我地成日講既「自由市場」，究竟真係有幾自由呢？
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2013年1月15日
