短評梁振英的公屋政策

（轉載以釐清評論對象）

極度憤怒！梁振英份施政報告話「2012-13年度起5年內落成約75,000個新公屋單位」，除返咪即係平均每年得15,000個，短期內根本就冇增建公屋！之前仲放風話增加到每年20,000個單位，又係度欺騙基層人士！

「在2018年起的5年內，公屋的總供應以至少100,000個單位為產量目標」哦！原來要等五年先每年建屋20,000個單位！？五年後你都落左台啦！宜家講乜都得！宜家超過20萬宗輪候公屋個案！要捱貴租到幾時？仲要信你會做實事？

「房屋署會加強取締濫用公屋，加上租戶自願遷出，每年平均可淨回收約7 000多個單位，加上約15 000個新單位，每年可供編配的單位超過22 000個」之前林鄭話要取締劏房，宜家就轉左要取締濫用公屋。乜房署以前唔做野架？要梁振英上台房署先識得打擊濫用公屋。香港無租金管制，變相咪又係迫返d人出去捱貴租！樓價同租金分分鐘仲升得勁過宜家！

1997 至 2006 年的公屋興建量為 244,300 個，平均每年供應 24,430 個單位，梁振英唔敢得罪地產商，仲差過老董，下台啦你！

作者：林兆彬

前學聯副秘書長，註冊社工，業餘時事漫畫工作者，自由撰稿人，二次創作愛好者。夢想是能夠讓世界變得美好。

閱讀後覺得好，請多多讚好及分享～：）