民主黨偉大的同路人

（原載於：http://dadazim.com/journal/2013/01/dp-is-great/）

劉慧卿話社民連同人力一樣都唔係佢地既同路人，變左用完即棄的一次性飛機杯。當初陶君行點都唔同意狙擊民主黨，不惜同人反哂面，可惜係偉大的民主黨心目中，依然不是同路人，仲暗示佢地係北京的助力。

無仇報架喇，俾佢選到，就係神仙啦。人地講仕途，你就走去講理念，自以為大仁大義顧全大局，根本就所托非人。好似話要包容一般大陸水客雙非自由行之類，唔好「無野搵野黎搞」、唔好去狙擊佢地啦…….一樣係自作多情，人地就黎掠奪式消費，你就一廂情願話香港可以感化大陸，真係傻的嗎！唔通大陸B飲完支美素佳兒，就會突然感動流涕，大徹大悟，知道民主文明的重要；佢地父母又會從此轉性，對香港人好點嗎？再講一次，真係傻的嗎，更是搵全香港黎搞。

民主黨就是將自己當作民主唯一入口商，除此之外，你們爭取既都係A貨民主。社民連果種基進示威風格、提倡相對激進的社會財富分配，在偉大的民主黨眼中都是不入流的。好似係某啲大中華大一統同胞情結上腦既社運名流眼中，李旺陽六四才是legitimate agenda；你地走去搞水貨、雙非、中港矛盾，純粹是無風起浪、捨本逐末，搞埋啲irrelevant agenda。

好似民主黨咁，你有名望有資源，點解唔搞呀，民生喎、實事喎，唔係一向好驚市民覺得你地唔做野的嗎？搓胸勤都撲出去抽水啦，劉慧卿仲係講緊果啲無路線無願景既「我地要爭取民主」，咪同民建聯果種「爭取主義」無分別。

你要去攬住一個實際上已經irrelevant的議題去沈淪，我梗係唔可惜，死光光啦。最搞笑又悲涼的是社民連當民主黨同路人，同人力以及不恥民主黨的市民「撐到行」，背後又咪係果套為團結而相同、無左民主黨就無民主中國的痴線「中港痾屎都要同步」論。

不過無所謂啦，社民連既會員係好大仁大義的，應該唔會同民主代理計較的，反而爭取本土利益的就是自治撚，走出黎就好「法西斯」。真是好野。

作者：盧斯達@無待堂

閱讀後覺得好，請多多讚好及分享～：）