知唔知八蚊對香港人有幾重要？

八蚊夢熊（林婷欣攝）

問：點解Whatsapp要收八蚊？你知唔知八蚊可以做到好多野咖？

答：今日我肚餓落到麥記，身上只有四個兩蚊銀，我發現我只係買到0.38個廿一蚊特價餐。算，行去街口間小食店，勉強買到幾粒魚蛋醫肚。我突然係度沉思，到底八蚊可以做到乜野呢？想換電話？八蚊可以買到0.0015部iPhone。唔想做ifanboy？八蚊都可以買到0.0016部Note 2。或者講下我最常搭既277x巴士線啦，由粉嶺搭出藍田，用八蚊都可以搭到0.59程。想一路搭巴士一路食夢熊花生，你都淨係買到0.26本陽光時務週刊乍！

問： Whatsapp一向都唔收錢，突然又話收，你話係咪好狡猾先？

答： Whatsapp從來無講過自己係永久免費，一開始只係想吸納用戶而Free比你地。人地開發程式都要錢，維持服務又係錢，你當人係大慈善家？以前send sms要幾毫子一個，任send sms plan都要幾蚊一個月，佢而家壟斷左個市場理應可以進一步獅子開大口，但而家只係收你八蚊，都算係幾合理。

問：拿，而家唔止係錢既問題啦，我係不滿Whatsapp已經成為左奸商！

答：其實呢，所謂無商不奸，你落到樓下梗有一間係你附近，咁點解香港霸權你唔反，淨係反Whatsapp霸權？係咪因為Whatsapp先係切身之事？香港人，小事放大，大事懶理，香港地產霸權有幾咁嚴重，你諗下你樓下個商場既小店近幾年唔見左幾多？又被逼遷左幾多？當領匯對香港小商家趕盡殺絕，你有而家一半咁憤怒香港都唔洗死得咁快啦。奸商李+X年中都呃你唔少錢，又何止果八蚊？

問：點解iPhone用戶著數過Android用家咁多，佢係咪歧視Android？

答：我唔直接答你，我用例子答你，一樣味道一樣質素既一串魚蛋，地方A賣五蚊，地方B賣十蚊，咁地方B既居民係咪比人歧視緊？唔同平台，唔同用家特徵，根本已經係唔同市場，無得比較，用唔同既收費政策都係好正常不過既事。

問：我唔理，我仲係好唔gur，好憤怒，我要繼續鬧爆佢。

答：你心甘情願肯比錢咪比，唔gur咪唔好用囉，你大可以轉用其他，不過方唔方便就見人見智。又唔肯比又想繼續用既，你都係898等expire算吧啦。香港人，鬧少幾句，睇多幾份報紙，關心下香港仲好啦。

作者：婷欣

你好，我係風月亭亭長：）