大佬同社運友 撐得起佔頜中環個台?回應戴耀廷佔領中環爭普選(三之二)

(photo via cc Flickr user Kiwi He)

 

知道日月神報每個星期日都會登戴教授同唔同社會人士對話系列,小弟當然就睇咗佢有咩未公開過嘅想法先再落筆。雖然教授喺操作上諗得俾我預期中深入,但係對於實際組織嘅策略實在係太過樂觀。

搞咗成三十幾年民主運動,泛民各個山頭之間嘅新仇舊恨簡直係厚過黃頁。而公民社會團體同政團之間嘅互信,去到2010年政改一役之後可謂跌到去冰點。加上而家左膠同自治_一齊去鬥搶本土旗幟,仲有泛民主流、社記同人力之間嘅間互相大鬥法到而家都冇停過。成盤泛民都散到冇朋友果陣,你叫班領袖同組織者點樣唔拎各自本數薄去埋位傾一個香港開埠以嚟未發生過嘅公民抗命行動?如果自問有呢個能耐同手腕的話,恭喜你,你已經有做特首嘅條件(可惜我睇唔到有邊個有)。

要真係搞得成佔領中環,就要領袖同組織者暫時放低窩裡鬥呢個中國人搞政治嘅特質,先有可能去推動成件事;仲要係真心放低果隻,而唔係口和心不和,檯底都仲要互相放暗箭。我就覺得,呢個堅係難過登天。

 

另外,今日嘅日月神報專題裡面,講咗一­個都幾中嘅Point,就係點解要參與者附和領袖?冇錯,泛民領袖嘅號召力同政治光環已經遠遠唔及以前。而家議會路線日漸褪色,議題運動百花齊放。做咗幾十年領袖嘅大佬輩,又點樣適應時勢去推動群眾爭取普選?而我嘅答案係:唔睇好。

泛民嘅議會或者政團領袖,喺出席好多遊行示威當中都俾公眾一個感覺或者錯覺,就係佢哋嚟一嚟講兩句就走,好少留到最後去執頭執尾。大家見開真係會遊行留守同堵路留到最尾嘅領袖,只真係剩得社記嘅長毛同阿牛。戴教授而家唔只要求領袖好似陶國能1咁Showhand參與,仲要留守埋一份同埋自首。唉,呢個香港好現實嫁,有律師牌嘅打一堂收幾十萬,有專業牌照嘅又怕畫花個底(最少我只見到陶君行同吳文遠唔怕),教書嘅仲要整除牌……

領袖變得越嚟越錫身,導致決策結果趨向保守,其實都算係令到泛民由2005年之後都突破唔到重圍,甚至係流失支持者嘅原因。如果戴教授諗唔到點樣解決泛民政團領袖只要蒲頭,沒有畫押嘅可能性,其實都係會令到運動嘅道德號召力減弱。因為群眾感受唔到領袖對佢哋嘅一份尊重同埋同佢哋一齊行呢個感覺,而彩又係佢哋攞到盡的話,其實對於新一代民主運動參與者係完全唔討好。

 

關於領袖嘅反思,就真係不得不提教授提過嘅萬人共議政改方案。將呢個喺古雅典城邦嘅理想帶到今日嘅香港,實在係參與式民主嘅最好實驗。但係對於習慣咗圍埋傾掂數嘅大佬嚟講,呢個簡直係挑戰佢哋認知嘅極限。假若萬人共議咗個共識政改方案,仲要有民間公投授權果陣,大佬又俾非中聯辦嘅北京中間人邀請去談判,佢哋又會唔會傾完之後再同群眾相討,再搞民間公投?

呢啲位其實認真政治危險,但係歷史中某啲大佬就慣咗圍內同民調決定一切。所以,如果真係搞得出佔領中環嘅,談判嘅對象就應該係果一萬個簽咗投名狀嘅行動者,而唔係冇簽嘅領袖。當然,以中共嘅「拉一派、打一派、孤立一派」嘅戰略,我真係好怕最後都係會談判決定一切,到時中環萬名參加者就真係情緒崩潰。

 

好喇,我好似講到佔領中環靠大佬唔掂,咁靠做組織者又點?公民社會聯席通常以議題嚟聚人同團體,今次戴教授搞呢舊嘢應該係超出晒所有團體嘅mandate。咁即係又要經過一輪團體裡面傾,先至可以決定join、endorse、support定係唔惦。就算真係各自團體都join埋一份,大家可以點樣work with同run到個行動先係最考驗各個團體領袖嘅氣度。

今次真係搞的話,情況同反國教運動嘅聯盟操作完全唔同。雖然議題本身依然單一,但係對於普選嘅想像(即係選舉模式嘅分別),各個團體甚至個人都有唔同,故此「爭取普選」唔會好似「撤回國教科」咁樣有一個容易量化嘅目的。唔好睇少呢個ambiguity ,好多時群體之間嘅誤會就係因為呢啲位而起。

 

最後,我都係要返番去一個「合作」嘅胸襟呢個難以解決嘅問題:「如果要左翼21同香港自治運動合作策劃同籌備成個佔領中環,你估有冇可能?」有呢個胸襟去容納議題上同自己南轅北轍嘅人,一齊去搞佔領中環爭普選的話,成個佔領嘢先會有可能會搞得成。如果唔係的話,大家都係返屋企瞓覺,因為我哋連民主政治中最基本嘅包容都冇。

至於點解我對於搞個組織嘅身體出嚟去Run佔領中環情有獨鍾?其實真係好實際。下星期最後一篇,我就會開估呢個最實際嘅因素,同埋實際操作會遇到嘅困難。

 

 

  1. 編按:卓號「賭撚」的前高登會員,顧名思義不多解釋了 []

作者:巫堃泰

巫堃泰
屯門區議會民選議員(2020-2023),香港大學法學(人權法) 碩士,香港機場發展關注網絡發言人。曾參與香港電台節目評論時政,並經營民間網上電視台。熱衷公共政策及管治研究,從過去到現在積極參與公民社會組織及倡議,創造多項時政惡搞產品,期望用創意改變社會。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 31707
Date: 2013-02-18 10:27:13
Generated at: 2020-06-05 19:35:21
Permalink: https://www.vjmedia.com.hk/articles/2013/02/18/31707/大佬同社運友 撐得起佔頜中環個台?回應戴耀廷