大學之道，在搵著數

（photo via cc Flickr user 石川 Shihchuan）

1)
Grace是學校裡的風頭躉，幾乎全天候身邊都會有幾個男同學在服侍。收兵收到可以組軍既佢試過做project既時候有十幾個人、三四組同佢一齊做，每次黎圖書館都有如大軍壓境。

她很懂得利用自己的天生本錢：間中向那些情竇初開、手都未拖過的男生嗲兩句或者著件低胸走下光，要麼在Facebook上無病呻吟，而不幸地總會有人中招並且身先士卒為她速遞宵夜、斟茶遞水，然後得到一聲懶cutie的多聲以及你真係好人啊一類廢到無倫的話接著被打發走。

她一直對自己的兵仔聲稱沒有男朋友，但在聖誕party中有人目睹她任由某個學長抽水，而坊間傳聞她那份只有高材生才能做出來的FYP是全靠那位關係良好的炮友學長。

2)
住進hall裡半個月而從未見過的Roommate在第一次見面的夜晚就塞給朋友三舊水 － 喂，攞去食個宵夜。最初朋友並不明白他的用意，直到眼尾望到走廊不遠處站了一個穿著睡衣的學妹。那一刻他明白到食宵夜是個暗號，或者是啪啪啪的擬聲詞。

朋友並沒有像大部份AV情節一樣得到除了金錢以外的任何甜頭，而他的Roommate則繼續示範如何用錢解決其他需求。一千幾百蚊一份功課，只要你出得起，大量清貧學子願意餓狗搶屎一樣爭住幫你做，仲保證唔A唔收錢。甚至如果你出得起錢，你大可以做一個fee rider － 不是free rider － 總有人願意以額外的工作量來換取回報。而朋友的Roommate靠著雄厚的資金個個sem都過3爆4同時仲可以晚晚落老蘭溝女。

而當其他同學受盡學業、搵工、兼職煎熬而覺得溝女非常吃力的時候，朋友的Roommate正在他老豆送的Benz上苦惱緊帶邊條女去歐洲旅遊。他完全唔洗煩今個月需唔需要慳啲錢買禮物比女朋友或者拍拖拍到無錢之類的問題，而當大部份男性大學生都在期待出黎做野之後先會有餘錢去蒲去溝女，他卻擔心第日接手Daddy盤生意之後會小咗時間玩女。

3)
『我唔會同無利用價值既人做朋友。』

這句說話出自大學某個社團的committee之口，她是一個你一眼就會覺得她一定成功的人，情況就如有些人你一眼就覺得佢一定係個仆街－當然，我唔係指果位committee係仆街。

她憑藉高超的交際手腕而使得她的人生高潮一浪接一浪：ibank的internship、城中名人的推薦信、某uncle介紹去跨國集團做MT，她比周星馳更成功詮釋唔同蠢人做朋友這句說話。

在一次分享會中，這位charming的未來社會棟樑大談成功心得，其中最重要的就是不要跟沒有利用價值的人做朋友，為甚麼？

『因為佢地會成為你既負累，拖累你一步一步向上爬。I mean，每個社會都會有人犧牲有人墊底，你想踩住人上定係比人踩住上？

唔好同無能力、無人脈、或者無家底既人做朋友，唔好浪費時間係佢地身上，因為咁樣亦係浪費緊你自己既時間。話唔定當你同佢地Whatsapp緊既時候人地已經周圍send緊CV，你係應該刪左佢地電話同Facebook，因為呢啲人對你既事業同人生唔會有幫助。』

4)
阿珊是個普通的大學 生，唯一不同是她Facebook和Instagram上有數千個follower。平日食個飯也要影相與fans同步的她對男朋友唯一的要求是：唔可以窮 － 『我係model黎，唔通要我同佢一齊捱茶餐廳？比人見到點算？』

喜歡以lomo風格配搭豪華背景來突顯自己女神形象的她最喜歡在網上分享出入馬會、遊艇的照片。當然，家住公屋的她不可能擁有這些，所以她找男朋友一向以有錢仔為目標，也全靠這些男朋友，她才能在Facebook和Instagram上繼續扮演她的ABC有錢女角色。

香港社會的功利主義入侵大學校園早已不是新鮮事，種種社會的醜惡正在大學裡變成常態，甚至到一個地步是，你沒有利用價值，你就沒有存在價值。

在這個扭曲的社會面前，我們卑微得只能夠夢想擁有一個安樂窩。沒有大學生相信乜鳩尊嚴理想，大家最關心的出黎做野搵幾多錢、幾時買到樓，大學變成一個互相搵著數的地方，因為社會告訴我們錢、權力、地位可以定義一個人所有的價值。

作者：堂前燕

在網絡撰寫小說及文章。

閱讀後覺得好，請多多讚好及分享～：）