友誼之光

第一次聽友誼之光，係係睇尋秦記既時候聽到。當時感覺覺得好搞笑，因為古天樂唱到甩哂beat，唱既感情亦都令人發笑；

真真正正聽友誼之光，大約係一兩年前，當時覺得肥媽唱得好奇怪，唔知點解要好地地破壞左首歌；
直到今日，六年中學生涯完結，腦海中唔知點解經常浮現友誼之光既歌詞，呢幾日亦係咁狂播呢首歌，只因感受太深。

人生於世上有幾個知己　多少友誼能長存 ？

相信好多人都聽過，中學識既朋友通常會係你一世既老死。
中學時期，會有人陪你一齊發癲，做埋好多好多係常人眼中既無聊事，即使身邊人覺得你我gay情無限，但係大家都會樂此不疲。
你我可能會因為想法不同或誤解而鬧架甚至打架，但事後仍然係老死，互相恥笑大家既醜事。
上堂太悶，吹水係少不免既指定動作。由最正常既互相討論，到互相攞彼此既緋聞／舊情／戀情黎開玩笑；大家亦可以因為一啲好無聊既小事而笑到失控。
但呢D情感，已成過去，不知怎去再復尋。
不過，我深信，呢D美好既回憶，會一直長存。

今日別離共你雙雙兩握手　友誼常在你我心裡

去到last day，即使平時大家幾唔太鍾意大家，去到最後卻會互相祝福留念。
至於朋友方面，大家會比平時更感性同熱情奔放。
平時已經做埋好多好gay既行為，但係去到last day會更gay，可能會要求愛的抱抱；
平時大家玩到癲哂，臉上只有笑容既人，可能會因為唔捨得而痛哭；
之不過，大家都知道，總有一日要離別，再唔捨得都要分開，
但係不論如何，彼此的友誼，永遠在心中，歷久不衰。

今天且有暫別　他朝也定能聚首　縱使不能會面　始終也是朋友

可能公開試之後，大家都會有唔同既新環境，新既生活圈子，
但今天既暫別，他朝我地仍有不同機會再相見，即使感覺可能真係唔同。
又或者有人以後因為生活會令大家不能會面，但大家既情誼唔會因而改變。
正如友誼之光既歌詞：
說有萬里山　隔阻兩地遙
不須見面　心中也知曉
友誼改不了

也許今日大家可能要分開，但願彼此友誼長存。

作者：Zero

閱讀後覺得好，請多多讚好及分享～：）