怪獸是怎樣煉成的

（原載於：http://hellotingyan.com/blog/?p=295）

首先，我想同大家講一個故事。

Anthony係我呀媽個同事個仔，而家讀緊中三，因為佢讀唔掂書，呀媽驚佢考唔到入大學，而家已經提早考慮送個仔去外國。Anthony自幼已經十八般武藝，演奏級鋼琴、小提琴、游水，多到我都唔想再數，最後老豆老母亦成功谷到佢入名校。係佢好細個既時候屋企就有條規定：對住老豆老母唔可以講中文，一定要用英文溝通，練得一口流利英文。佢屋企最搞野既係，由Anthony出世到而家，屋企從來無買過一部電視機，每日就係返學上興趣班補習班做功課溫習，娛樂呢？佢老豆老母話上興趣班已經係娛樂，覺得咁樣做可以令佢專心讀書。咁最後佢做咩讀唔掂？因為佢已經比人谷到傻左，對學習無晒興趣。

黎到呢個位，正常人會比三個反應我：車，又係呢種故仔，悶唔悶D！哇，個小朋友真係慘過賣火柴的小男孩！哇，D家長真係好變態囉！

每次見到呢D Case，討論都係傾向親切問候班家長，同埋同情班小朋友，但係好似無咩人深究，到底係咩原因逼使呢種家長誕生。不如，先講下點解Anthony老豆老母要咁樣逼個仔。

因為，佢想個仔考入名校囉。

因為，佢想個仔成績好，入到大學，有美好將來囉。

因為，佢覺得咁樣先可以將最好既野比晒個仔囉。

而家D家長，如果想谷個仔入名校，一定會逼佢上多D乜班物班train下佢。點解咁講，我唔直接答你，我用例子答你。上年睇過單新聞，係講升小面試有乜野刁鑽面試題，其中一條：

「如果你媽媽給你十顆糖，兩張糖紙可以換一顆糖，問你最後最多吃多少顆糖？」

（ontv 截圖）

哇，乜一個升小學得幾歲既學生要咁好邏輯咖，我唔覺得幼稚園教育會足夠我去答到呢條問題。過到骨既，得兩個可能性，你係天才，或者你受過訓練，我諗絕大部分答到既細路都係後者。報紙佬形容佢做「大學生殺手」係完全無錯，果陣我係Facebook post左出黎，都有大把friend唔識做。我深信，如果學校D面試問題可以正常返少少，仲邊有人會去參加面試班。

除左學校面試題目變態，而家D家長搏晒老命整厚仔女疊Portfolio，佢地既心態唔難理解，當個個份Porfolio都好似黃頁咁厚既時候，你好似宣傳單張咁薄切切，自然覺得仔女邊夠人鬥。好多家長以為咁樣谷仔女，先可以令學校認為自己緊張仔女成長，記得有一年DBS個校長出黎解話，叫D家長唔好逼班細路上咁多興趣班，我地係唔收港孩咖！之不過，無人彩佢，風氣如常。事實上，我又唔係好信香港D學校面試果陣會完全唔睇，十項全能既細路，話唔定第日可以為校爭光，收到梗係收左先啦。

然後個問題又返返去點解家長想個仔入名校，好多家長認為名校先可以提供最好既教育，呢種錯誤concept我會話係社會同傳媒造成既。每年報學校果排，仲會係新聞見到好多，喂今年乜乜名校門口又排長龍呀，幾多人爭一個位呀，然後又訪問下D港媽點解想入名校，答案都離不開間學校好好，將來點樣可以幫到個仔。然後到放榜喇，又係影住班個仔得米入到名校既港媽點happy法，淨係入到普通學校果D就喊晒口咁。

傳媒會話比你聽一個訊息，入到名校，你個仔將來就會好成功咖喇，入左D無人識既學校，就好似你個仔呢世就會玩完咁。名校branding可以咁成功，完全係果種守舊到死既名牌效應。

我老母班同事唔知點解對「名校」呢樣野好趨之若鶩，佢最熟果班friend基本上得我一個唔係讀名校，亦都得我一個由細到大都無比人谷過，佢班friend都試過因為呢樣野而challenge佢。我老母從來唔會逼我上興趣班，唯一一次逼我補習都只係中五果陣叫我去拎下D tips。咁佢同事班仔女有咩下場？

慘慘豬，好多都讀唔到書，去左外國升學。

咁比佢地睇死既小妹呢？入左大學。

佢班friend花左咁多心血「培訓」自己小朋友，最後梗係覺得鬱鬱寡歡。其實好多人都誤信左一條社會吹捧既公式：名校≡最好既教育≡成功。事實上，讀呢D學校好鬼大壓力，如果你overcome到咁當然無問題，但頂唔順既話你就會痴左線，唔係所有小朋友都適合讀呢種學校。老母話，想我讀得開開心心，所以先無谷我上名校。

之後又去到另一個問題，唔理最後入到名校定普通學校，全世界都繼續參加好多興趣班。好多家長有一種奇怪思維，以為人人都參加興趣班，自己仔女唔參加，一定好蝕底。然後出面D興趣學校又會包裝得自己好好，講埋晒「發掘子女潛能」「啟發子女智慧」、呢種陳腔濫調既句子，大佬，又唔知點解有人信咖喎。事實上，都個個都識彈鋼琴既時候，當我聽到你仔女係演奏級果陣，除左「哦」，我唔知仲可以比咩反應。音樂本來係一件令人愉快既事，但而家好多小朋友考完演奏級之後，就無再拎件樂器出黎玩。Why？麻木、討厭。而家香港D細路學音樂已經唔會知道咩叫做音樂，佢只會當左呢種係責任同義務。

咁做咩仲要去上興趣班？都係一句，人學我唔學，好蝕底。香港人，一向最怕執輸行頭慘過敗家。

不得不提既係，補習。家長請補習老師，離不開兩個原因，仔女成績唔夠好，返工唔得閒睇仔女做功課。前者我都仲覺得合理，後者我就唔明白喇，

到底係邊個話細路份功課一定要全部岩晒拎滿分？

以前我老母好少理我D功課，所以唔會拎好高分，錯咪錯囉，望住個交叉你先會識反省下自己有咩問題。而家就係搞到D小朋友太倚懶，諗都廢事諗，講一句：「我唔識做喎。」等屋企人或者補習個姐姐講個答案比我聽咪得囉。

講開又講，而家D學校又係心理變態既，幫手谷埋一份，小朋友D功課越黎越難到hihi，根本唔係人做既。

而且，香港教育制度競爭實在太激烈，由小學、中學、大學乜鬼野學位都要爭，除非你屋企有米可以送你去外國讀書，公開試唔掂就入唔到大學。然後個社會又暗地裡宣揚緊一個訊息：「係香港，如果你入唔到大學，你人生就玩完。」當班父母深信入唔到大學條路就一定會好難行，咪唯有係咁谷D細路。

講到怪獸家長，雖然聽到悶，但都要講下果種令人驚嚇既教養模式。坊間有好多所謂parenting skill公式，家長唔會理佢岩唔岩，總之就跟左先。父母以前細個捱窮捱苦，到自己生左細路又想將最好既野比晒佢。結果，我唔知呢代D小朋友係咪真係幸福過對上果代，至少係父母眼中就一定係。

然後，飯來張口，中學生不懂剝蕉皮。
仲有，哭訴不懂吃橙，洗衫不知用洗粉。

當你批評呢班家長，佢地又會好中意答你：「大大下佢就識咖啦，慢慢學啦。」但係果D乜乜七七興趣又唔見你叫佢慢慢學。

用左咁多口水，其實我想講既係，一味指住班家長鬧，其實係忽略左問題既癥結。香港有怪獸家長，唔單止係佢地出問題，仲有教育制度同社會風氣。如果你問我會唔會生小朋友，暫時我會答：「唔生。」因為我本來就覺得，香港既環境係唔適合小朋友成長。

最後，唔知有無人真係咁傻豬走去計條數，答案係19粒（都有朋友話20粒可以係合理答案）。不過Sorry，答中無獎。

作者：婷欣

你好，我係風月亭亭長：）

閱讀後覺得好，請多多讚好及分享～：）