倒楣的程翔與陳淨心同坐

政治 / 最新文章綜覽

(原載於:思.寫

(HKBNnews 截圖)

 

本來呢,想研究一下梁愛詩口中「好多國家都有篩選機制」的究竟有哪些「國家」,不過今日看到在議事論事「一嘟爆紅」的陳淨心又有精彩演出,咁梗係睇個後生的淨心bb養眼得多啦。

事先聲明,兩段片夾埋超過20分鐘,對分秒必爭的香港人來說,可以做很多有意義的事,各位真的要非常非常非常得閒,才好足本重溫,仲要最好不要在公眾場所睇,否則別人見到你好想忍笑又忍唔到個樣,會以為你有乜問題。正因為不少香港人分分鐘幾百萬上落,無聊的我把上下半場最精彩片段的time code列出,務求令大家不會錯過最頂癮部分,係咪好貼心先?

場口是香港寬頻新聞的清談節目《大議題》,嘉賓除了潮州spice girl外,還有資深新聞工作者程翔,談論到香港記者北京被毆、新聞自由收窄、中央干預香港加增、真假普選等。

先來「程翔遇上淨心bb」 part 1

 

1:46 陳:係咪劉曉波呀?(佢)屋企人(劉霞)係受到國家特別保…照顧

過去一個周末有留意新聞的人都知,記者是跟隨愛國保釣船長楊匡試圖探訪劉霞時被打,你仲要爆一句「係咪劉曉波」? 妳有無發夢到咁呀?另外,劉霞是被監視、軟禁、落街買餸都唔得,人身自由蕩然無存,妳夠膽死話係受到國家特別「照顧」?外傭睇住少主叫照顧、富豪包養女星也叫照顧,就是未聽過劉霞原來也是被國家「特別照顧」咁溫馨喎(辣妹還說漏了個「保」字在先,唔通想講其實劉霞係受到 「保護」咁惹笑??)

 

***5:13 邊啲人係「國寶」呀?(程:你未聽過「國保」呢個字咩)我剩係知熊貓係「國寶」咋喎,即係打人嗰班係「國寶」?你咁樣講嘢都得㗎?***

(此乃全場最精彩一幕,故以***顯示)程翔提到「國家專政機器」,包括法庭公安軍隊武警以及相信是打記者的「國保」(公安部國內安全保衛局,前身為政治保衛局,專門對付異見人士及上訪者等)。其實普羅大眾未必聽過這個詞彙,但這個節目討論的是嚴肅議題,程翔怎會無端端飛咗去四川講熊貓呀?!妳估而家《笑聲救地球》和《開心主流派》,乜太教用厚顏炒餸再講開心字典搞爛gag呀?!無人能知曉天下事,妳唔識扮鵪鶉無人會怪妳,但自我露底就真的無人救到妳。下次搵妳同黃興桂講波,桂神話「卡斯拿斯好少痾蛋咁失禮喎」,我估辣妹會直斥桂神「你即係話嗰個咩斯…拿斯係『雞』呀?你咁講嘢都得嘅咩?!」

我敢肯定,在新聞界接有數十年豐富經驗的程翔,這一刻實在也招架不住,因此只能用發自內心的冷笑回應!

 

8:56 程:(講去年蘋果記者問胡錦濤知否港人想平反六四)記者問胡錦濤六四嘅問題,就俾人帶埋一邊
陳:胡錦濤若果公開發言,佢應該有啲說話想帶出嚟。

阿姐,妳到底住喺香港定冥王星呀,當時胡錦濤去睇地盤,乜鬼都無講過,究竟妳有無做功課架。再說一遍,唔知,唔緊要,唔係單單新聞你要記得;但唔知就唔去亂駁。假,係自己丟!!

 

10:04 程:你了解咗個情況先至好嚟講嘢嘛

程翔用了最文明的語言、最溫馴的態度,寸爆陳淨心唔知走上嚟做乜。

 

再來part 2

 

2:11 程:1949年之後中共犯了三次左的錯誤…1967暴動左派分清敵我…92年鄧小平南巡提到「警惕右,但主要防左」…

4:44 陳:程先生講嗰啲「唔知」左呀右呀,呢啲我就唔係好識嘅。最緊要係有工做、繁榮穩定、安居樂業,唔會分你左右咁樣嘅。

程翔由1:55至3:50講到「左派思想再抬頭」的前因後果,我真想當時有另一部攝影機拍著辣妹在這接近兩分鐘的面容反應。我擔保陳淨心聽得懂程翔所說的每 一個中文字,卻沒有0.000000000001%明白對方在講乜。情況就如一個哲學博士侃侃而談笛卡兒、尼采和佛洛依德,坐在嬰兒車上bb所回應的,就是撒下一堆便便。突然覺得,多次強調「讀law」的梁安琪(唔係四姨太)當年質問陶君行「究竟你係左派定泛民」,水平其實也不太低。

我實在不知道電視台找陳淨心與程翔對談,除了電視台英文簡稱「bbtv」與「淨心bb」相類之外,到底原因何在。你要找個土共去「平衡」,元秋、tree根,大 把人俾你揀,所以我想到唯一的原因,根本就是整蠱spice girl與愛港力。可憐的是,今舖卻是「殃及程翔」,程兄隨時以後不肯再上來做節目。1

 

7:25 陳:以我所知,2017有普選,係咪?

嗱, 你以為我又會借辣妹的無知去揶揄「係人都知2017有普選啦」,那就大錯特錯了。我認為這是陳淨心在整個節目中最有智慧的一句。2017真的有普選嗎?當「300幾萬選民咁鬼多」(咁英美法德澳紐台日選舉真係唔知點算)、「好多國家都有預選」(委內瑞拉?布基納法索?千里達?危地馬拉?法屬圭亞那?)、有預選不等於開倒車(阿媽亦不一定係女人)等理論相繼出籠,「真普選」根本比阿仙奴再奪英超錦標更加絕望,spice girl 在此其實是用了一種語帶譏諷鄙視的設問修辭技巧,表達出骨子裡對「2017真係有普選」實有巨大質疑,這總算在補時階段攻入「破蛋」的一球,為 「愛港力」挽回點點面子。

 

這幾年國家財政預算案最令人側目的一欄,是國庫裡用來維持社會和諧、打擊反動勢力、堅固愛國陣營的「維穩費」,比 每日派海監漁政船瞄準日本仔戰艦戰機的國防開支還要高。7千幾億維穩費,其實應該幾鬆動,但每次看見陳淨心之流一而再、再而三的精彩演出,若果給習近平見 到,不知會否覺得自己光顧了黑店,明明付出了買林寶堅尼的價錢,換來的卻是一輛甩皮甩骨的三手「錢七」???

 

  1. 編按:未必啦~大家素來知道程翔真材實料,有淨心BBG 吸引下觀眾,大幅拉高收視唷 []

作者:撒拉夫

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 33361
Date: 2013-03-12 13:24:18
Generated at: 2020-10-29 15:37:16
Permalink: https://www.vjmedia.com.hk/articles/2013/03/12/33361/倒楣的程翔與陳淨心同坐