【試堂後感】龍小菌?不如演戲啦~

(圖片為部份筆記局部攝影,轉載以釐清評論對象,為免涉侵權不會提供全份筆記供讀者參考)

話說龍小菌為左一名「失聰歌迷」而除低面罩,以真面目示人,而呢件事亦令開始慢慢沉寂既龍小菌忽然再次人氣急升。

一直以黎,個人都認為龍小菌只不過係「又要威,又要戴頭盔」,欠缺自信心,先一直以幪臉打扮示人;作風上,只覺佢只不過搞噱頭,以幪臉打扮換取注意;更甚而言,佢曾經前言不對後語──佢曾經表示,幪臉係為左保住教職,但當佢辭職之後,反而冇因為冇再做老師而除低面罩。

 

而當我得知龍小菌將會去某大型補習社教中文之後,我當堂嚇一跳,然後得啖笑。去片:

 

短短既一分三十八秒,筆者已經搵到兩個疑點:

1. 佢自稱之前一直以幪臉打扮示人係因為唔想出現以貌取人既情況出現,但點解要到佢減肥成功先以真面目示人?況且,Susan Boyle、林育群等歌手同樣其貌不揚,但有冇因為佢地既外表而阻礙佢地既音樂事業?佢地又有冇因為外表既不足而戴罩?

2. 佢自稱係band5中學同教院畢業,呢兩樣並唔係一個問題;但當佢自信滿滿地宣稱自己會考奪A時,卻對自己高考科中化既成績隻字不提。依家既DSE已經唔係會考年代咁簡單,會考年代中文有A亦唔一定代表可以應付DSE年代既中文,而且新學制下既中文亦涉及中國文化,係欠缺成績證明下,加上只得一年教學經驗,更甚已經有近一年時間冇執起教鞭,補佢真係可以有助自己既中文科水平?

 

當然如果連佢既堂都未上就一面倒咁叫人唔好補龍小菌既話,講到底又真係對佢有D唔公平。因此為公平起見,本人決定親自上佢既免費試堂,睇下佢同其他老師又有咩分別。上完堂之後,我發現當中有五個地方令人質疑:

1.龍小菌對新高中課程既認識

 

係佢既講義同宣傳單張上,都有標榜作抒情文攞五星既技巧。眾所周知,舊制既5*係最高級別;低係新學制中,5*則只係第二高既級別。龍小菌話要教學生寫抒情文攞5*,係自嘲自己冇能力令學生作文攞5**,還是突顯左佢對新高中課程既認知程度仍有不足呢?若然係後者的話,當佢連新高中課程最基本既事情都未能搞清搞楚時,又點樣有能力教好學生呢?

 

2.教學內容簡單

係佢所教既內容入面,其中一部分係教學生用修辭手法造句。

 

當中,佢教左用明喻、擬物、排比、疊字、頂真、誇張、對偶、借代、對比同埋引用造句。你我甚至龍小菌本人都知,以上既修辭手法,早就係中二三既時候學哂。當時,佢話要教我地用修辭手法造句係因為希望學生可以寫多D,從而增加自己作文時既信心,同埋令自己既中文更好。但係,既然我地早就學哂以上修辭手法時,點解又要重新再教我地一次?況且,修辭手法造句方面,學生本身都可以自己操練遣詞造句,只要自己肯寫多D,唔需要補習都可以有所進步,又有咩必要俾620蚊去學D自己都識做既事呢?此外,學生去補習,其中一個原因係因為希望學多D平日返學學唔到既技巧同知識,若然龍小菌日後只教番D一早學過既知識,不但浪費時間,亦浪費金錢。

 

3.藉教學自吹自擂

 

係課堂後段,龍小菌教學生文言文。以上呢一篇,相信係佢自己親自創作既文言文。我見過有人用文言文進行二次創作,自已親自原創,則第一次見到1。我唔係中文系學生,亦唔係中文老師,所以唔敢話佢呢篇文言文有冇文筆上既錯誤;但唯一肯定的係,哪怕某個人唔識睇文言文,只要知道邊個係龍小菌,佢應該可以至少解到當中八成既內容,因為一黎文章偏向淺白,二黎佢係「教學」中,借機作自我宣傳,例如一再強調自己「教而優則咏」,同埋以另一種方式講番自己會考中文攞A既經過。

 

4.利用補習自我宣傳

冇錯,唔知點解,佢自己出既自傳簡介可以係佢自己既講義出現。如果呢本書純粹係教下學生點學好中文反而都冇所謂,但係《我係龍小菌》又同學習中文有咩關係?咁做又同自我宣傳有咩分別?

 

5.培訓學生成為考試機器?

龍小菌宣稱自己「真誠教學 嶄新演繹」,真唔真誠教學依家講就言之尚早,但係試堂入面,我就睇唔到嶄新演繹。係教作文個陣,佢用左今年中文DSE卷二既第一條--題目內容大意係寫一次活動,令我體會到「己所不欲,勿施於人」既道理。

佢自己既示範:

(按圖放大)

 

我冇能力評論咁寫會點,但知道以上示範係龍小菌老作既。明明冇經歷過,又要扮到「我今日真係學左好多野」咁,邊到黎既嶄新演繹 ?講到底,佢只不過又係一個教學生寫埋D飛機文既老師。不幸的話,最後學生只會淪為一部部為左攞5**而麻木既寫作機器,又如何真正咁學好中文?

 

總結而言,如果你想中伏的話,可以去某大型補習社付上六百二十大元,一嘗佢既「嶄新演繹」。除左以上之外,我亦想同佢講:「你不要再唱歌/教書,去演戲吧!我有錢開拍電影既話,你來做電影既女主角,英皇的老闆應該簽她做演員,現在的花旦真不似樣。」 講真個句,憑佢之前既一舉一動,佢真係好有潛質去做影后。

 

  1. 嗯~本報作者「大文豪」林非就可以隨手寫到通順文言文

作者:Zero

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 43519
Date: 2013-07-13 13:43:25
Generated at: 2019-02-17 08:56:56
Permalink: https://www.vjmedia.com.hk/articles/2013/07/13/43519/【試堂後感】龍小菌?不如演戲啦~