郊野公園是港英埋下的炸彈

(原載於:KURSKHK.net

露營看日出,人生一大快事,但我不應因為愛上自然美景而不識大體!

露營看日出,人生一大快事,但我不應因為愛上自然美景而不識大體!

 

其實郊野公園都係英國人埋下嘅炸彈。

首先,麥理浩攪出個郊野公園計劃,勁宣傳郊遊樂趣同愛護大自然,跟住中小學童軍,中學愛丁堡公爵獎勵計劃(回歸偉大祖國後叫AYP)成日帶啲青少年去行山露營,後來樂思會引入毅行者行者,香港人慣咗放假去行埋啲咩麥理浩徑同衛奕信徑(淨係個名已經大逆不道),咁咪一個二個都懷念港英囉。果啲行山徑同營地又鬼咁靚,入埋啲咩世界大十,攪到郊野公園好似神聖不可侵犯咁。

咩expedition, 咩wild camping, 咩conservation,根本唔符合我國國情。我國國情係「人有多大膽,地有多大產」同「向大自然要地」嘛,而家成個國家最緊要係發展,所以華北沙漠化、所有河道都污染到唔飲得咁滯、周圍都係癌症村都冇辦法。而領導唔怕,佢地有特供飲食、可以有專屬渡假區或者出國玩。

而家梁同志班子同佢啲金主開到口話要「發展」郊野公園,你地香港人點解咁唔識大體響度嘈?要你地啲郊野公園地嚟發展就好似拆你祖墳咁。郊野公園發展少少駛死咩?咩話?點解唔發展丁地、golf court、閒置軍事用地?痴線架你地?收番丁地,咁啲原居民點賣丁權出去俾地產商起豪宅呀?收番golf court,咁啲有錢人去邊度打golf呀?收番啲空置軍事用地,咁解放軍第時增兵香港住邊呀?呢啲都係香港嘅特供地皮嚟架,唔郁得架。

實不相瞞,我就係果啲俾港英荼毒既港人,童軍、愛丁堡、毅行者、露營我都玩過。我一直以為郊野公園保育大自然、為普羅市民提供免費娛樂、為香港淨化空氣同水源係德政,而家先明白原來又係港英埋下嘅另一個炸彈,令人心回歸唔到,仲阻住香港發展!

我見到梁同志班子、劉皇叔、陳啟宗開口話要發展郊野公園覺得忿怒,係我唔啱。我等蟻民,為咗一己私慾阻礙香港發展,罪該萬死!理應反醒!

 

作者:庫斯克

庫斯克
通識教師、blogger。自由主義者。現正為《e-zone》、《香港經濟日報通識版》及《香港電台通識網》供稿,文章亦見於《明報星期日生活》。 http://www.facebook.com/kursk1943

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 49442
Date: 2013-09-18 17:21:43
Generated at: 2020-11-26 04:14:50
Permalink: https://www.vjmedia.com.hk/articles/2013/09/18/49442/郊野公園是港英埋下的炸彈