「漫畫呢行你唔明架喇~」 - 專訪鄺世傑

(原載於:Heterogeneous’s Page

「漫畫呢行你唔明架喇~」 - 專訪鄺世傑

 

鄺世傑,香港著名漫畫家,廣告插畫師,漫畫教師等等等等,亦是著名漫畫《李小龍》作家上官小寶的兒子,其筆下或其監制經典著名作品包括《拳皇系列》,《首都高速》,《刀殺神》等等。其中改編電玩遊戲的漫畫《拳皇97》結果一期更創下十多萬銷量的創舉,而其特別版封面(每期都會有不同物料和技術制作不同的封面特別版,靈感來自閃卡)更是一種用心創新的銷售發行概念,深受當年不少讀者歡迎。

當年還在唸四年級的我受身邊同學介紹看《拳皇》,到了星期六的報攤,只見到報攤早已排了一大條長龍,全都在等侯《拳皇》的特別版,而最癲瘋時期,讀者需要早一星期預訂,甚至報販會要求必須把平裝普通版買下才能買特別版,來一個捆綁式銷售,對於當時每天只有五蚊零用錢的我,雖然是十分吃力,但仍然會堅持每一個星期六乖乖地把廿多三十元交到報販手上,除了因為喜歡這個電動遊戲外,漫畫當中的故事人設宿命感強,故事背景有歷史神話故事作支持,人物眾多且富有不少有趣支線故事,加上吸引富創意的封面,贈品,惹笑的專欄,拳皇週報,讀者畫板……(下刪千百樣好處…)只記得1998我第一次到灣仔的書展,看到兩層樓高的八神庵,而互相輝映的是兩層高的龍虎門,那一刻我只好說一句拳皇港漫中的一句〝他媽的!〞,原來我睇緊果本漫畫係咁「把砲」!

 

鄺世傑自小從中學起已經在兼職在公司為漫畫畫封面的工作,其後到了澳州修讀會計,當時他沒有想過漫畫會成為他的終身職業,當他回港後,正好公司需要全面電腦化,全公司甚至全地球當時都對於photoshop,電腦和新式的印刷技術都處於摸索階段,鄺世傑便順理成章學成回港後便回公司負責電腦化的工作,基本上當年整本書排版和特別版制作都是一腳踢,一個封面甚至花上兩三個月時間不停試驗,而在1998書展那一年,因為當年為了《拳皇97》結局到《98》第一期,在一星期內只睡了七個小時。

當年拳皇版權人人得以奪之;《拳皇98》當中首20期的故事把一名配角無名小子真吾回到過去重新修煉作主線以及當中的boss級敵人怒加的宿命交代令我看得目不轉睛,是突破亦是亮點;原來當中大有文章:當年SNK要求《拳皇98》故事首20期不能出現兩位最重要的男主角:草薙京,八神庵,而且往後出現的只能是94年版本的草薙八神,加上當年種種外行人對創作的制肘,改稿,其後更得悉版權會賣給另外一家公司,因此鄺氏決定對《拳皇98》來一個黯淡的總結,而我亦都沒有多看往後一兩年的《拳皇》系列…

 

如今事隔十五年,我可以有機會跟拳皇港漫來再來一個伸延訪問,實在榮幸,亦慰解我多年對拳皇的情義結。為左訪問之前唔好得失主人家,我班門弄斧咁準備左幾個懶係有深度關於港漫市場學營銷方案進諫,希望可以幫下「大家覺得而家港漫唔掂」既局面…豈料…

 

其實係咪因為市場上只係得打書,得一種風格,所以…

呢個係一個誤解!好多係會覺得而家港漫銷量下跌係因為市場上得打書或者社團書,呢個係錯既觀念,如果市場上有多d唔同故事種類既書,唔代表會多人睇左漫畫,銷量下跌唔係淨係香港既問題,台灣一早已經淪陷,連租漫畫既鋪頭都無得做,其實涉及好多原因,其一係因為互聯網已經可以睇漫畫,互聯網盜版漫畫令銷售既市場越來越細,互聯網影響好大,其實日本都係出現緊呢個情況,只係日本既市場實在太大。漫畫同電視一樣係有慣性收視,無可否認而家有打書今時今日仲賣到一萬以上因為有慣性收視;如果有新元素,唔代表一定會好睇,重點係要講有無心機去寫個故仔,當然仲會有好多因素影響…

以前做漫畫,風光日子既時候,一線既漫畫可以賺到好多錢,但係而家就算一線都只可以叫到搵到食,都莫講而家d 三四線漫畫,以前佢地都仲叫可以搵到食,而家三四線漫畫如果唔係畫到一線咁好睇或者有長期既捧場客,根本就唔會有人買來睇。

 

咁如果將港漫動畫化,將佢放在香港甚至大陸市場呢,會唔會可以吸引到多d人來睇?

動畫的確係可以將多人吸引到去睇返漫畫,呢個方法係work的,但在香港唔可行,因為做動畫既成本實在太高,而且中國大陸對外資或者對動畫創作既審查都好嚴,當然會出現好多制肘,如果只係放在香港放,市場太細,成本太高,效益唔大

 

咁如果將漫畫中既角色商品化呢去吸引人睇漫畫呢?

呢個係一個誤解!好多人以為商品化可以幫到本漫畫可以多d人睇但係其實係無乜用,我地做過好多次商品化既試驗,其實商品化只可以將一d受歡迎既漫畫,利用埋漫畫既剩餘價值,例如你有一百蚊,你用左二十蚊買本漫畫,而商品化產品就係將你本身剩返既八十蚊都賺埋;但係相反,你出商品,係完全幫唔到本漫畫可以有多d銷量。我睇過一位香港漫畫家既訪問,佢出過一系列好好賣既商品公仔,但係佢d漫畫都係賣得唔好;

另外一個錯誤既觀念係日本動漫商品化可以成功,因為日本出名漫畫既銷售量,覆蓋量講緊係全球幾百萬本,當中就算得10%人會去買佢地商品都有幾十萬人去買佢既商品,所以佢可以用果10%人都可以收取可觀既利潤。

 

咁如果我地請日本既漫畫家作號召來香港出港漫,那麼可行嗎?

呢個想法只係你地讀者一廂情願既想法,日本一個唔算最紅既漫畫家佢既賺緊幾百萬,最紅既賺緊甚至幾千萬,你可以請到佢來香港幫你畫只係賺到幾十萬既漫畫嗎?呢個想法可以,但係現實唔會出現到,大陸個市場夠大就可以,將來可能有機會會出現呢個情況…如果佢對外資同對創作放寬既話!不然所有作品都只係《喜羊羊》咁都係兒童作品,但我想做既係香港長篇漫畫。

 

咁如果而家將漫畫放在電話app比人比錢下載去睇呢?

呢個係一個好大既誤解!!好多行內人覺得因為係平裝薄裝d人唔會買,就出本精裝本,其實唔係形式既問題!井上雄彥而家如果出新既slam dunk故事,就算出落廁紙度都大把人爭度買;更加唔關係咪ipad既問題,你本野好睇就自然有人睇!不過只家咁多免費app睇漫畫,加上而家人人咁忙,漫畫而家唔係同行內競爭,而係要同其他娛樂爭,而家一個人有咁多娛樂,可能佢一日得半個鐘睇漫畫,佢地要睇就只會搵最好既睇,所以唔關用咩形式去出漫畫,而係你本漫畫係唔係最好睇同埋值唔值買得睇。

 

鄺世傑更道:

我教書果時作文題目問學生覺得港漫同日漫有咩分別,佢地竟然答我「港漫要俾錢,日漫唔洗俾錢」,竟然而家既學生係覺得漫畫係唔洗比錢買,所以你地有個誤解係日漫係好好賣,其實係錯。而家係有更多人覺得日漫係唔洗比錢就睇到,其實而家香港已經好少公司去買日本漫畫既版權,好多都係台灣買左順便寄來香港賣,現在香港最暢銷既漫畫《天下》一期賣緊三萬本左右,但係日漫在香港最多只賣到幾千本,所以日本漫畫在香港好賣只係一個錯覺,係好多人睇但無乜人買。

在我而言,而家買漫畫已經好似買hi fi天碟cd一樣,要係一件好既作品,令人覺得值得收藏,咁先會令人有買既衝動,買來已經唔係為左睇,而係為左去成為珍藏,所以而家做漫畫係要令到佢好睇,要有value。

 

咁香港平裝薄裝漫畫會唔會令到佢無珍藏價值…

呢個係個誤解!!你儲郵票得一張添啦!珍藏價值唔關係咩形式平台做媒介,亦唔關精裝本定平裝既問題。

 

呢個訪問可能會令鄺世傑覺得同緊一個牛皮燈籠傾計之外,亦都令我諗起電影《回魂夜》中李力持既一句對白:「唔好下下話錯先得㗎…你比次話岩呀~你比我岩一次咁多吖,你比返小小面我呢…」

而我亦鼓起最後勇氣問佢…

咁最後我見到有d新既港漫用返畫集形式,一本書出幾個故事出版,呢個會唔會增加到漫畫銷量既方法?

呢個方法我覺得係work既,的確抵食夾大件係可以令人買漫畫既其中一個方法,但係整體所有畫集內既故事同手法仍然係最緊要吸引人買來睇既原因。

 

「呼…終於叫做岩半條…」

 

作者:Heterogeneous

Heterogeneous
heterogeneous KK[͵hɛtəˋrɑdʒənəs]DJ[͵hetəˋrɔdʒənəs] 1,異種的,異質的,由不同成分形成的 每月一tee藉抒發對身邊的感受忠於表現自己 小弟對印tee仍在學習,歡迎交流 FB PAGE: https://www.facebook.com/heterogeneous1m1t

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 50307
Date: 2013-09-30 13:17:54
Generated at: 2022-12-06 11:04:48
Permalink: https://www.vjmedia.com.hk/articles/2013/09/30/50307/「漫畫呢行你唔明架喇~」---專訪鄺世傑