「十五年車齡限制」政策　涉及巨大利益瓜葛？

（原載於：http://jackyhtlim.blogspot.hk/2013/10/restrictedcar15years2.html）

立法會環境事務委員會於今日下午開會，討論「淘汰歐盟四期以前柴油商業車輛」計劃，即係「換車資助」+ 「十五年車齡限制」。其中換車資助方案回應部份業界要求提供資助比例，總預算由100億「加碼」至117億。

呢個計劃响5月25日舉行過公聽會，會上我同環保署助理署長莫偉全打到飛起。莫偉全當日不斷提出理據話換車係唯一方法：

1. 專利巴士以外嘅車種難以加裝/改裝「尿素鼓」(對應我以施政報告提出的質疑)。我就回應「貨車底盤嘅空間比巴士更闊更多，即係根本更容易處理」
2. 有個別車種，例如輕型貨車的未必可以加裝「尿素鼓」。我就回應「咁就更換引擎吧。英國、美國、澳洲都有咁做，亦證實可行」。
   佢再話「問過車廠同代理，回覆『不可行』」。我就回應「覆你話得做少幾多生意呀，涉及龐大利益梗係回覆話唔得啦。政府應該自己做純技術研究，唔係出咁多糧俾你莫偉全做乜」
3. 有啲車齡太舊唔能夠加裝「尿素鼓」或更換引擎。我就回應「我問過一個SCR （即「尿素鼓」）嘅供應商，佢話「舊到一部用吉拿引擎嘅珍寶巴士都可以改到，但做PROGRAM SETTING要花相當多時間」；另外就以一部車齡35年的退役中巴MCW運往澳洲後「將二戰後設計嘅吉拿6LXB更換上美國環境局EPA11標準嘅CUMMINS ISBe6.7 220ps」

結果當日公聽會會議主席何秀蘭要求當局提交有關研究加裝「尿素鼓」或更換引擎的研究報告，但到今日都仲未見到。

其實當局身上嘅疑團就係「點解有個平嘅方法都能達到目的而偏唔用，而一定要用個貴嘅方法」。相信大家都覺得好吊詭吧！換車資助和強制換車，最大得益者當然就係汽車代理。政府係咪進行利益輸送？簡直係一條小學雞程度嘅問題。至於有無官員會涉及貪污，呢個就「留名食花生」吧。

另一個吊詭嘅情況，就係支持換車嘅運輸業經營者，既不顧代理商過去都有「襯火打劫」加價嘅歷史，另一方面就不斷要求政府加碼。

加價構成的購置成本影響是「人人有份」，但點解支持換車的人「衰過兩次」(07和09年)今次仲要「重覆錯誤」? 除了$$之外，可有其他嗎?

就算不提中共嘅殖民入侵計劃，即係「咁啱得咁蹺」舊年10月開始「放風」前後「中國重汽」貨車就宣佈進軍香港市場；與及共匪响今年1月14日公佈的《機動車強制報廢標准規定》車齡限制又是與當局的「15年」。以上兩個疑團都足夠證明成個計劃係「鬼到唔鬼」啦。

所以前日就向環境事務委員會提交書面意見

但立法會秘書處又疑似玩嘢，遲遲不上載至今日會議議程網頁。直到今早致電秘書處交涉之後不足一小時就出現了。

呢個計劃涉及到公帑可能遭受貪污挪用、與及小本經營者的生計問題，所以絕對唔可以俾佢展開。

延伸閱讀
《蘋果日報》交通新政的利益輸送
施政報告車齡限制計劃
審計署繼續為霸權政策抬轎

作者：林鴻達

Jacky Lim，香港土產但祖家四代來自馬來西亞砂朥越州古晉市。縱使2012年8月8日成功爭取保留尖沙咀碼頭巴士總站，但未能歸隱，唔只因為「仲有手尾跟」，更體會到香港真係一個 Dying City!! 社區發展動力培育政策會員，參與社會議題、政策研究倡議；報刊時事評論撰稿，文章可見《蘋果日報》、馬來西亞《東方日報》、新加坡《聯合早報》

閱讀後覺得好，請多多讚好及分享～：）