阿凡達與左膠

阿凡達

 

記得2009年,電影阿凡達係香港上映,一度被左膠奉為圭臬,個個睇完都話感動到要喊出黎。當時佢地係香港主導反高鐵運動,係中環苦行、保衛菜園村,話要係資本主義既香港,黎一場阿凡達式既保衛戰。

點解左膠當時咁鍾意阿凡達,成日用套戲黎做反高鐵既抗爭文宣?無他,阿凡達既主題,圍繞批判資本主義,反對大商家掠奪天然資源,剝削弱者既生存空間,又宣揚回歸大自然既綠色生活,同佢地既思想岩晒KEY。

時至今日,中共對香港實施人口殖民既策略,經已畫公仔畫出腸,而人海戰術既影響亦經已陸續浮面,威脅香港本地人既生存空間。如果情況繼續落去,香港必步西藏,新疆後塵,全面淪陷。到時就算有真普選都冇用。中共黨員八千五百萬人,只要派1-2%黎到香港,已經係講緊成八十五萬至一百七十萬人。無論經單程證又好,優才計劃又好,黎讀大學又好,佢地落到黎香港攞身份證投票俾建制派,或者加入政府,足以將所有泛民主派擠出香港政界。呢一日究竟幾時會到?唔知,不過相信指日可待。

香港面臨住一場咁嚴峻既殖民危機,點解左膠又唔話要黎一場阿凡達式既保衛戰呢?相反,佢地不停鼓吹包容大陸人,話佢地其實都係弱勢,都係中共政權既受害者黎。而當本土派一有人出黎話要源頭減人,就即刻將其打為排外、歧視,法西斯。而我其實真係唔明白,係阿凡達電影尾段,Navi人為左保衛家園,同人類決戰,見人就劈,勇武非常,最後終於打贏,將人類逐出潘朵拉星,你班友個陣又唔話咁係鼓吹排外法西斯?個班人類士兵呀,其實都係受害者黎,係資本主義既制度下被逼打份工,參與剝削弱者既行動,就咁俾Navi星人劈死,真係好慘呀!Navi人應該對抗既,係資本主義制度,而唔係個班「弱勢」既人類士兵呀!

而且Navi人係人,人類都係人,點解Navi人又唔可以大愛包容一下班人類,同佢地一齊共享潘朵拉星既資源呢?Navi人唔係應該增加配套設施,等多D人類可以黎潘朵拉星生活架咩?仲有呀, 點解唔嘗試用Navi人既綠色文化黎感化人類,而要趕人走咁排外呀!

有冇左翼人可以出黎答下我,以你地今日批評本土派既準則,阿凡達呢套戲咁法西斯,究竟你地當年點解要用呢套戲做文宣?

 

作者:向東一江春水

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 51617
Date: 2013-10-13 00:00:54
Generated at: 2020-06-03 23:53:27
Permalink: https://www.vjmedia.com.hk/articles/2013/10/13/51617/阿凡達與左膠