HKTV 編劇阿羅:「我地係撐自己前途!」

(原載於:刺青雜誌

HKTV 編劇阿羅:「我地係撐自己前途!」

 

綽號「阿羅」的林逸瀚,在2011年11月1日加入當時仍為CTI的香港電視,是第一批加入香港電視的員工。香港電視申請免費電視牌照失敗後,宣布裁員320人,他是其中一員。刺青編輯哈羅特與阿羅相識多年,這次特地邀請他接受訪問,分享在HKTV的創作路,以及對公司失落牌照的心聲。

 

踏上編劇之路

筆者和阿羅在城大相識,一年後不約而同地為了追尋夢想而退學。阿羅追尋的是一個編劇夢:「中學時期已經鍾意做創作,自己會寫小說,但就冇諗過做編劇,直至接觸到知專搞既編劇及媒體創作課程。」他回憶在知專讀書時,很幸運地遇上恩師鮑偉聰,鮑見他讀書認真,畢業後主動聯絡他:「有冇興趣寫大陸劇?」他當然抓住這個機會,就此踏上編劇之路。當時適逢王維基成立新電視台,大肆拉攏編劇,成為城中熱話;鮑正是在那段時間加盟王維基的新台。後來鮑致電他,叫他嘗試應徵見習編劇一職。

他坦言應徵王維基的新台是「唔輪到佢揀」:「據我所知,無綫係2008至11年都冇請過見習編劇。個行業其實好窄,青黃不接,好少新人入行。」阿羅獲CTI聘請為見習編劇,其後晉升為初級編劇,一做就是三年。直至本星期三,他成為HKTV三百多位被裁員工的一份子,年末約滿後正式失業。這些都是後話。

 

在港視做編劇的歲月

阿羅從公司前輩口中得知,HKTV與TVB在拍劇方面有極大程度上的不同。他形容TVB的劇集在走一個「製作主導」模式:「TVB拍劇以前係監製度橋,好多時從製作方便行先,要就演員檔期,直接啲講係上頭想捧邊個;例如黎耀祥有六個月檔期,上頭叫你拍佢啦,班編劇就要諗一套佢做主角既戲,唔可以寫女人主導、後宮爭寵。為左方便,又好少考慮實景。」

相反,HKTV走的是「創作主導」路線,劇集由籌備階段至落實,全部由創作組話事。「例如我地想拍古裝,有軍隊大戰,製作考慮一定say no。」但創作主導下就有可能,只要創作組聯絡CG公司、內地片場,預備一份合理的計劃書和預算表,公司覺得可行就可以開拍。「王維基好少ban橋,佢只會諗兩樣野:觀眾覺得好唔好睇?同埋要洗公司幾多錢?」

叫阿羅最深刻的,是創作一套名為《惡毒老人同盟》的處境喜劇。「呢套係笑片,全部由入行唔夠兩三年既年輕編劇去主導討論,決定笑位,有好多高登術語,後生既觀眾一定搵到共鳴,唔會覺得同電視機入面既故仔脫節。我地落足心機去度,一路度一路笑,唔介意收夜,晚晚加班都樂在其中。」是什麼驅使他們如此拼搏?「我地始終有夢想,想做一套好既劇做開山作,比香港市民認同。」自願OT,還享受過程,不知各位讀者又有沒有試過?

 

與王維基渡過的兩個新年

筆者請阿羅憶述與王維基接觸的經歷,無獨有偶地,他舉出的兩個事例都發生在農曆新年。「唔計員工大會,第一次真正接觸係2012年新年,佢邀請全體編劇去佢屋企拜年。當時我係全組唯一一個trainee,當然被介紹啦。」那次他看見王維基同員工打成一片,但也有信念與員工分享,就是想改變電視行業。

另一次在2013年農曆正月初三,他們交了一份40頁故事大綱給王,年初四復工時,他竟然全部看完,做了筆記,每個字跟他們討論。「我地好敏感,擔心老細係咪想干預我地創作自由呀?係咪唔想開劇呀?後尾先知道唔係,老細只係想俾壓力我地,想件事做得更加好。後來我地根據老細既意見修改,佢都收到。」

 

失落牌照以後……

港視因失落牌照而大規模裁員,但不少員工在此時此刻仍支持老闆,令港人嘖嘖稱奇,心想一間公司要好到什麼地步,員工才會被裁後仍站在老闆一方。阿羅強調,大家絕非單純支持王維基一人:「我地唔止係撐老闆,撐公司,我地係撐緊自己前途、撐緊香港市民既電視娛樂!我地係為左vision,mission做野,vision就係香港劇集會愈黎愈好,透過競爭同創新,透過大量新編劇入行,透過而家終於有人肯大額投資。」一個王維基出現後,他見到TVB都多了願意花費工本的劇集,例如《衝上雲霄2》(筆者按:不覺得《衝2》除靚人靚景外有何出色)。「冇左HKTV,如果now同cable都唔開劇,對我地呢行,對觀眾都唔係好事。」

裁員當日的員工大會,阿羅聽到一位負責「跑景」(安排外景作拍劇之用)的小員工跟王維基說:「老細,我只係一個跑景既小小員工。以前我唔洗跑咁多景,黎左HKTV之後我跑好多,因為你地要用實景拍攝。但我覺得值得,因為質素真係好左,但而家冇左呢個機會喇。老細,希望你會東山再起。」王維基在其後的記者會表示自己有哭過,正正是被那位小員工的話所感動。「我同其他同事都覺得,我地係創造緊電視奇蹟,大家做緊一個歷史任務。」

HKTV未獲發牌,阿羅認為從微觀而言,市民損失的是高質素的電視劇集;在創意行業而言,也未知另外兩間新免費電視台會否提供新的career給年輕人。

但他感嘆,這次香港的損失不至於此:「我覺得係冇左個夢想。一個人好努力想做好一件事,但竟然因為一啲講唔出既原因而遭到打壓。創作人最講夢想,而家最有心果個都衰左,後生仔仲邊有動力拍片?香港文化係靠電視劇、流行曲帶起,而家冇左一個咁好既平台,未來係少咗一種軟實力。」

 

阿羅給讀者的話:

「最後,我都想呼籲香港市民係10月20號企出黎。某程度上我覺得政府已經蝦到我地市民想心口。我地唔止係冇左個電視台,冇得睇認真制作、更多元化既電視劇咁簡單,而係我地冇左公義,陰謀論睇,如果今次香港電視網絡不獲發牌係政治打壓的話,我地更加冇左創作自由。我引用蘇局長一句說話:「循序漸進」,先是教育,再是電視台,下一步是什麼,不敢想像!我唔係陰謀論者,希望以上所說的只係想像!」

 

後記

訪問在HKTV的員工飯堂進行,未正式開始前,遠方的房間傳來一陣歡呼聲。我問阿羅那兒發生什麼事,他笑說應該是一套劇集的試映會剛完結。每完成一套劇集,HKTV都會邀請員工出席試映會;當日筆者聽到的歡呼聲,正好反映員工對公司劇集的信心。但願終有一天,我們也能觀賞到HKTV的劇集;但願香港創意工業不死。

 

作者:刺青雜誌

刺青雜誌
網址:http://www.punchmagazine.hk/ 刺青雜誌,年青人的網上雜誌,兩週一期,希望把我們面對生活的奇想與騷動帶向大眾。歡迎投稿,請電郵至[email protected]

閱讀後覺得好,請多多讚好及分享~:)

其他熱門文章

  • 【遊戲介紹】耍帥動作射擊遊戲 《Gungrave G.O.R.E》無限子彈變型棺材爽爆殺敵 by 五木
    主打耍帥和爽爆的動作遊戲,除了《Devil May Cry》外,還有另一個系列《Gungrave》(銃神)。新 […]…
  • 「𠒇」字係咩嚟?——港姐冠軍帶出嘅哲學問題 by 散彈一號
    試想象下,喺未有電腦嘅年代,如果你見到某張手寫嘅form上面,有人寫自己個名係「陳曼𠒇」咁啦。你會唔會即刻覺得自己唔識讀呢隻字,即刻走去查字典睇下個字點讀? 應該唔會掛。你第一個反應,可能會心諗:「嘩,呢個人寫個『兒』字寫得咁樣衰嘅。」…
  • 【憂傷的嫖客】「環保吹」 by 菠蘿
    某天下午,就在我們對一樓一場所集中地進行實地考察的時候,遇見了一行三人、正在「洗樓」的嫖客小隊。所謂洗樓,就是嫖客在一樓一鳳姐集中的大厦,向每個鳳姐單位門口按鐘、逐個審視,直至他們遇上合眼緣的鳳姐,與她們進行交易為止。而這三人有別於一般的嫖…
  • 講起「蔡康年」,你諗起乜野? by 齋老味
    曾經係當紅DJ,因為施念慈報警話俾佢打,立即被貶為人渣,無得做DJ走曬樣,從此淪為TVB專用低能或變態角色。近年因為有高清台,無記多咗財經節目,先知佢原來而家係財經主持。…
  • 《鋼鍊》「等價交換」根本不是真理 by 方潤
    很多人提及《鋼》,都是提及等價交換原理,甚至以為《鋼》就是教人等價交換,其實是大謬。因為《鋼》的每一集都有這段開場白,由主角兩兄弟讀出:「人不作出犧牲,就不會得到任何回報,想得到一樣東西,就必須付出同等的代價。這就是煉金術的基本原則 - 「…
  • 解構精神心理治療——輔導個案概念化(Case conceptualization) by 西多士
    如果問大家對「輔導」一詞想起甚麼?可能會聯想到精神疾病,情緒困擾,婚姻問題,家庭暴力等。其實,「輔導」並不如有些人想得這般負面的。先說說「輔導心理學(counselling_psychology)」吧。!它是「應用心理學(applied_p…
歡迎讚好我們的facebook page,免費資訊源源送上。

文章資訊

ID: 52311
Date: 2013-10-20 03:11:13
Generated at: 2022-12-02 12:10:28
Permalink: https://www.vjmedia.com.hk/articles/2013/10/20/52311/hktv-編劇阿羅:「我地係撐自己前途!」