（原載於：KURSKHK.net ）
（《志明與春嬌》截圖）
呢個世界真係冇人阻止到蔣麗芸，佢又有新笑料（政情：刺激生育 蔣麗芸獻房策）。好，既然蔣麗芸今次講到要鼓勵性愛咁出位，我就認真分析一下佢嘅建議（引文節錄報導）：
1. 去酒店「開房」就可以確保有足夠空間，但當佢知道開房勝地九龍塘理想酒店都因為不敵地產霸權無奈結業時，就話佢嘅九龍西選區內有唔少時鐘酒店，當中尤以佐敦區最多。
阿Ann建議，政府倒不如向部分無牌經營嘅時鐘酒店發出正式牌照，等人可以光明正大地光顧時鐘酒店「造人」，從而增加生育率。
其實蔣麗芸有一半岩一半錯。
先講錯嘅地方：我真係唔知香港會有人去「開房」造人。啲人去開房嘅目的係咩？係造愛，唔係造人。要造人，通常都係結咗婚，你有幾何見有夫婦去時鐘酒店玩？你貪果度夠正經夠乾淨？
再講岩嘅地方：事實上香港人拍拖，要搵個地方比較大動作地談情十分困難，君不見全港稍為有私隱空間嘅公園每晚坐無虛席？如果發多啲時鐘酒店牌，理論上同電視發牌一樣，有競爭先有進步，響收費、設備、衛生各方面都有改良的話，啲人僻室談情（編按：仲談？）嘅空間大咗，拍拖拍到加入婚姻這一種邪教（史兄新書名，十一月出版）嘅機會又大啲，長遠嚟講係可以推高結婚率，如果生育同結婚係成正向關係，咁的確真係可以提高生育率。當然，呢個只係理論上咁講，我從未幫襯過，唔知裡面咩環境。不過如果蔣麗芸真係成功爭取香港嘅時鐘酒店「Love Hotel化」，遍地開花的話，可能會有道德團體聲討佢了。
其實我有個再進取啲嘅建議，就係參考新加坡政府資助speed-dating活動1，但係再去盡啲。政府可以考慮發「酒店劵」俾全港成年人，酒店劵可以用響時鐘酒店或者正式酒店，鼓勵啲情侶、夫婦可以多啲僻室談心，想放心啲就一次用多幾張劵去正式酒店，否則就去時鐘酒店。如果政府希望真係推高造人數字，我建議向夫婦派發更多酒店劵。利申，我是已婚人士，不過我係為香港好，所以不避嫌作此建議。
2. 「嬰兒基金」係幫小朋友由出世嗰日起儲錢，新年時逗嘅利是要統統放晒落基金，而政府就會向小朋友「發債」，徵用佢哋嘅利是錢作為興建隧道同商場嘅資金，令小朋友成為政府嘅債主。阿Ann之後愈講愈起勁，話橫掂小朋友大個之後都會用到以上嘅設施，政府咁做可以話係「為孩子們的未來而設（build their future）」！
強制儲利是錢？呢個咪即係兒童強積金囉！你蔣麗芸仲嫌強迫金整估香港人唔夠呀？如果係好似iBond咁，係要有錢先買到嘅債券，咁你咪即係令iBond呢類明益中產嘅福利性金融產品益埋中產兒童囉，人地一年利是錢五位數字，窮人小朋友買基金買條毛咩？
其實我用咁多字嚟討論蔣麗芸咁嘅水平嘅論點，我自己都覺得唔好意思。
做PTGF，做到同事幫襯你
【讀者投稿】《RO 新世代的誕生》各屬性換算、配裝建議、職業分類
如何成為護士？（包括登記護士與註冊護士）
Zopiclone——傳說中的安眠藥「白瓜子」
扭曲的澳門美食及食評文化
琴日我第1次約PTGF，有感而發（利申23歲男）
2013年10月26日
