給《窮富翁》的五個建議:不如拍《富窮鬼大作賤》

(原載於:HKORIGINALS

給《窮富翁》的五個建議:不如拍《富窮鬼大作賤》

 

新一輯《窮富翁大作戰》曲終人散。這個系列拍了幾輯,是時候搞搞新意,小弟有以下建議,希望有關人士可以考慮考慮:

 

建議1:《窮富翁大作戰》製作組下次改拍《富窮鬼大作賤》,搵一班窮人去過地產商窮奢極侈離地萬呎的富翁生活,訓下龍床、食下魚翅撈飯、嘆下酒池肉林,充分暴露現時資本家的荒淫無道一面。收視應該會唔錯。而且公開招募志願者時應該有幾十萬人報名,未開播先轟動。

 

建議2:《窮富翁大作戰》製作組下次可以改拍《左右翼大兜亂》,搵一班左翼社運人士去過下本地北區媽媽的生活,住下上水、爭下奶粉、遇下水貨客、排幾晚通宵輪候幼稚園申請表,充分體驗下從萬呎高空急降的在地生活。同時搵一班本土派鍵盤戰士,去搞下社運組織,落下區、入下東北、派下傳單、搞下街頭論壇,體驗一下鍵盤以外的世界。夠晒有建設性、夠晒左中右大團結、夠晒政治正確喇掛﹖

 

建議3:《窮富翁大作戰》製作組下次可以改拍《港男港女駁錯線》,搵一班超級港女扮男人,去過下毒男窮忍的生活,拖下豬扒、挨下麥記、食下豆腐火腩飯、上下高登,充分體驗下毒忍生活。同時搵一班毒男,去扮下女人,輪下女廁、戴下M巾、試幾日裝住幾磅假肚體驗孕婦生活。夠晒兩性平等、夠晒女權、夠晒社會和諧喇掛﹖

 

建議4:《窮富翁大作戰》製作組下次可以改拍《老屎忽大作戰》,搵一班已經上晒岸離晒地的60後老屎忽,去過下80後毫無上流機會的灰爆生活,做下起薪點8000蚊的散仔、每日要定時被一班親朋戚友哦足一小時負能量說話、住下劏房、一日三餐營多撈麵,充分體驗下80後廢青生活。仲要求佢地要響三年內儲到三十萬「老婆本」,實踐下獅子山下精神,做唔到就要捐出全副身家。哇,真係諗起都興奮。

 

建議5:《窮富翁大作戰》製作組下次可以改拍《高登友大考戰》,搵一班畢左業十年以上、(自稱)會考30分、高考幾條A的高登仔,去過下DSE中學雞應考生活,做下廿年PAST PAPER、每日要定時被一班親朋戚友哦足一小時「鼓勵」說話、一日要補三場習、每日去輪自修室,充分體驗下「其實唔難」的DSE生活。仲要求佢地一定要拎到至少四個五星星,否則就要去西洋菜街全裸倒立扮狗吠。

 

以上建議,部份固然是開玩笑,部份卻是可行的。在日益對立分裂的香港社會,提倡換位思考、玩玩交換身份的電視節目,似乎不錯。

 

作者:Lunyeah

Lunyeah
一個喜歡歷史和抽水的80後網絡憤青。 專做廁所考據、愛寫遊戲文章、亂評影視作品。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 53565
Date: 2013-11-02 23:22:38
Generated at: 2020-10-25 05:06:53
Permalink: https://www.vjmedia.com.hk/articles/2013/11/02/53565/給《窮富翁》的五個建議:不如拍《富窮鬼大作賤