TVB 可唔可以唔好再用《東張西望》做柒野?

《東張西望》(好似係)

 

每次見到D其實只係識得睇稿同讀稿嘅女主持,chok哂樣咁扮新聞主播腔咁「關心社會」,我真係好想嘔。可唔可以唔好侮辱主持同主播呢兩個明明好專業嘅職業﹖

今晚食飯打開電視,見到個兩個女主持一改平日笑騎騎嘅本色,神情凝重到我以為有邊個藝員過咗身。聽聽吓,原來係終極植入式廣告。

「睇完一個電視台係點樣誕生,跟住落泥就同大家睇一睇三間電視台佢哋嘅實力到底係點樣嘅。」

……過左五秒,只見電視上有兩個女主持傻的嗎咁望住個camera。說好的實力呢?另外3間電視台我唔知,呢刻我淨係知TVB柒咗。

好啦,lag機都算。屌,嗰兩個主持嘅執生方法,竟然係將689嘅乜野發牌評核標準一字不漏讀出。第一,你想表達啲乜﹖我聽咗一分鐘,淨係聽到「第一」、「第二」…去到「第十一」。內容完全聽唔到,就算聽到我都未消化到。同埋話比我知有Q用﹖無前無後無結論,到底話比觀眾知呢啲係為乜﹖其實,你係咪無野講?

其實講到尾,《東張西望》呢個節目,執咗佢啦。

主持質素低劣不在話下,最大問題係定位模糊不清。都唔知應該叫佢時事節目、綜藝節目、定娛樂節目。有時扮《今日睇真D》咁報娛樂新聞,有時又變咗《星期X檔案》咁探訪劏房居民,但係內容到喉唔到肺,只係令人感到為做而為,完全無法令人關心基層。最後個《Fun Fun選》又係九唔搭八。「今日Fun Fun選嘅問題係,夏天你最鐘意食咩呢﹖揀A—雪糕嘅有10﹪,揀B—棉棉冰嘅有30﹪,揀C—紅豆冰嘅有20﹪,揀D—食屎嘅有40﹪。睇嚟真係好多人鐘意係夏天食屎。今日東張西望做到呢度,Bye Bye。」…

咁模糊不清嘅界線,變相比TVB 每日有30分鐘做佢哋想做嘅嘢。因為佢唔係新聞節目,唔須要用中立同持平嘅手法去報導(雖然平日啲新聞都係是是但但)。而免費電視發牌爭議呢幾日,TVB正正利用《東張西望》做佢哋嘅武器去攻擊HKTV,不停向市民洗腦,覺得TVB係全世界最進步、無私同團結嘅電視台。

此刻,電視畫面上不停播出TVB不同種類的節目﹕「例如每晚嘅六點到十二點有兩次新聞,每日至少兩小時嘅兒童節目,每個禮拜亦都有定量嘅時事節目、記錄片、文化節目、長者節目、同埋年青人節目……亦都要確保立場中立,唔會引起社會不安…」

咦,等等先,呢種似曾相識嘅河蟹感覺…乜咁似《ATV焦點》嘅﹖

 

作者:林璃蝶

林璃蝶
林璃蝶,九十後香港博客。活在記憶,迷戀過去,因此喜歡以文字記下已發生的一切。最新文章﹕《張先生,謝謝你來探望我,可是……》、《鳩夢想》、《點解香港人就係唔識欣賞魔術》等。 Facebook專頁:https://www.facebook.com/o.indicum

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 53790
Date: 2013-11-06 00:43:14
Generated at: 2019-03-25 19:00:49
Permalink: https://www.vjmedia.com.hk/articles/2013/11/06/53790/tvb-可唔可以唔好再用《東張西望》做柒野?