（原載於：HKORIGINALS）
廿五歲以下人士，應該唔知上圖呢隻係乜嘢嚟。佢學名叫咸濕龍，因為基因遺傳，佢雙手係一心一意用嚟渣波的。
為咗故事完整性，閱讀此外傳前請重溫＜辦公室七不思議事件＞第一至第五集。好煩，次次出文都叫人重溫，煩撚過考Listening嗰陣叫你唔好翻開張試卷嗰幾句嘢 (I REPEAT: DO NOT TURN OVER THE QUESTION PAPER)。
第一集：http://www.vjmedia.com.hk/articles/2012/09/16/19695
第二集：http://www.vjmedia.com.hk/articles/2012/12/11/26250
第三集：http://www.vjmedia.com.hk/articles/2013/03/07/33022
第四集：http://www.vjmedia.com.hk/articles/2013/05/23/39205
第五集：http://www.vjmedia.com.hk/articles/2013/08/29/47474
外傳上文提要：話說公司搞｢親子同樂日｣，我變咗Uncle Shit，食午飯時聽咗一大堆虐兒個案後……終於來到結局了。（外傳上集、外傳下集）（腐人編按：上、下完了，竟然有「終」，真係服左～）
────
同文叔傾完計、成個諗樣對住維港食完煙，返埋張枱。餐飯完全無散band跡象。
正當我哋三個想借尿遁，唔找玩遊戲嗰條數之陣……安祖拎住咪同小朋友講：
｢好咧，史叔叔、大力叔叔同Nelson叔叔同大家一齊玩串字遊戲咧。｣
眾怪物歡呼大叫。
｢好呀！｣
｢正呀！｣
｢yeah~~~｣然後拍手。
啪啪啪啪啪～～～
｢我最中意玩串字遊戲呀！｣
呢班係咪正常小朋友嚟？聽到要串字仲咁開心？我細個聽到要串字，即刻走夾唔頭咧。仲講乜嘢｢我最中意玩串字遊戲｣？講呢句嘢嘅肥仔你係咪中撚咗輻射呀……仆街我係咪去撚咗福島呀？
呢鑊夾玩，無得走。
｢好咧。Nelson叔叔以前係美國返嚟，佢英文好厲害嫁，等佢同大家玩串字呀。｣大力即刻推替死鬼出嚟。嗱，上嚟食飯代價係陪細路玩遊戲嘛，我哋當中有一個人玩咪得。
｢大力叔叔同Uncle Shit都會玩，佢哋最中意同小朋友玩。｣Nelson一句就拖咗我哋落水。係呀，我就嚟中意小朋友中意到自己生一個。
｢秀英同安祖兩個嬸嬸都會。｣我大聲疾呼。過咗半日，終於搵到位入佢兩條八婆。佢兩個好似好嬲。中正下懷。介紹我做叔叔呀嗱！史叔叔呀嗱！搞到我變Uncle Shit。
串字遊戲是這樣的。成人隊對小朋友隊。一邊講A for “xxx”，對面個隊就串 “xxx”。答錯個隊加一分，總分較高的一方就輸。老老實實，呢個計分方法非常複雜，同香港賣樓嘅樓書一樣，睇得明嗰啲個腦袋都唔係好正常……
終於……
悲劇出現了。
－－－－
成人隊先問。
｢A for Apple.｣也不可以說Nelson 在讓賽，因為對方好像只得三四歲。咁我哋細個讀書嗰陣，A係 for apple嫁嘛。
｢A-p-p-l-e, Apple~｣小朋友爽快地回應。
｢B for basketball｣小朋友問。Nelson輕鬆回答。
到安祖對Andrencia。
｢C for Cat.｣安祖問小朋友。
｢咁淺嫁～～｣Andrencia 以輕挑，輕視嘅語氣叫出來。在場的父母哄堂大笑，安祖被弄得有點尷尬。
｢家教好到呢～～禮貌好到呢～～答你就答咧仆街。｣大力喺我隔離細細聲講。
Andrenica 答啱，輪到佢問。
｢D for dext…ory.｣
｢吓？｣
安祖同我哋幾個嘅反應一樣。
｢D for dext…ory.｣小妹妹好臭串、不願意咁重複一次。
我都係聽唔到佢講乜，淨係知dext頭、ory尾。
安祖尷尬地話答唔識。
｢D for dextrorotatory, d-e-x-t-r-o-r-o-t-a-t-o-r-y.｣小妹妹一字不漏咁讀出。
十四個字母。我諗起幼稚園學過最多字嘅句字:How are you? Fine, thank you. 夾埋都只係十九個字母。
｢佢o翕乜春呀？閩南話？而家講英文喎。｣我問大力。
｢dextrorotatory。簡單嚟講係右旋。我唔明點解一個唔夠十歲嘅小妹妹會識一個佢大學先識嘅字，同埋識嚟做乜鳩。｣讀物理1嘅大力解釋。
｢的士司機，唔該你dextroratotory上橋直去……｣我掩住半邊咀講。
｢嘰嘰嘰嘰。｣兩條友暗笑。
1:0。成人隊錯一條，加一分。個計分制度真係好複雜。
跟住兩隊各有輸贏。好悶，我唔想浪費墨水形容。
到大力嗰陣，去到英文字母G。成人隊輸咗兩次(2)，小朋友輸咗一次(1)。
大力一拎個米高風，好似take撚咗嘢咁即刻大叫：
｢G for G點! ｣
全場死寂。
｢大力叔叔，咁乜嘢係G點呀？｣咁啱大力嘅對手係秘書Z個女。佢以天真嘅聲音問道。我知，其實天真嘅秀英心裏面都問緊同樣嘅問題。
｢你禁下禁下、搵下搵下就會掂到G點嫁咧！禁完大家都會好開心好興奮嫁！｣ 大力拎住嗰咪繼續狂呼。我好肯定條友吸撚完大麻。
全場家長都想殺撚咗大力。
｢下？｣Z個女當然唔明佢講乜，疑惑地望住阿媽。
.
.
.
.
.
.
｢嗱！G點即係G Spot，你禁你手錶G字個點，隻錶會發光～～｣大力說時按下Z個女隻G-Shock。仆街，連G Shock 同G Spot都搞錯埋…呢個gag好撚難呀。
｢哦！原來係咁，大力叔叔你好叻呀！居然畀你望到我有G 點。嘻嘻嘻嘻。｣小妹妹恍然大悟，展出天真的笑容，仲連續按咗幾次G 點…..
全場仍然一片死寂。我唔知Z返到屋企要花幾多時間，先可以教個女唔好週圍亂講G點。大力今日已經第三次講啲唔好笑嘅咸濕笑話（睇金魚，吹簫，搵G點）。佢畀人告性騷擾，睇嚟係遲早嘅事。
安祖都唔理得咁多，即刻大叫遊戲正式開始。
｢G for Gorilla!!｣大力豪氣地大叫。
Gorilla者，大猩猩也。放心，我唔係痴線的。我後來查字典先識呢個字。對我嚟講，總之唔係人類但又疑似人類嘅猴類動物，就得一個名，monkey。
｢G-o-r-i-l-l-a, Gorilla｣ 而家啲小朋友細過嗰陣，阿媽肯定將牛津大字典開奶嚟畀佢哋飲。
｢錯！！！｣大力斬釘截鐵。
再唸一次。佢無串錯Gorilla。
｢錯。｣大力仍斬釘截鐵。
眾人不解。
｢我係讀Godzilla．哥斯拉。G-o-d-z-i-l-l-a。2:2。好嘢！！｣大力自high地說。
｢呢條友……離撚晒譜。｣我心諗。
｢乜嘢係哥斯拉？｣
｢而家仲邊有人識哥斯拉呀～｣
｢大力叔叔好茅呀！｣
｢好茅呀！｣
｢奸茅。｣
盲嘅都知大力捉字蚤。眾小朋友與父母非常不滿，開始有人叫囂。啲父母話成人隊出茅招，唔算數。大力又話個遊戲無要人寫定個答案，自己無做錯。屌，玩個遊戲啫，啲父母使唔撚使咁認真，大力幾廿歲人又唔撚化。大佬呀，決勝負呢啲嘢，有時真係好arbitrary嫁。你話畀我知點解王維基會拎唔到牌呀？講呀！講啊！！
成件事好撚胡鬧。話晒係上市公司，午飯為咗gorilla定godzilla，一大班人喺度嘈。
為咗平息事件，秀英建議民主啲，一．人．一．票。
呢條女係咪戇鳩嫁！！！關投票乜事？不如投票將你凌遲處死好唔好？
你又唔好理，好多父母弱智地贊成投票（仆街，要人投票贊唔贊成投票，本身就係投票嘅一種。即係點？整個公投嚟決定有冇公投？）。
最後投票結果，當然認為小朋友無錯嘅係佔大多數。比數維持2:1。
之後小朋友出題H for Hallelujah（哈利路亞）。大力居然識答。
｢你好撚低手呀，哥斯拉。｣大力無乜心機行返埋嚟嗰陣，Nelson恥笑佢。
｢挑，一班人無guts，又唔了解個遊戲規則去玩呢個遊戲。輸咗淨係識得嘈。｣
｢唔經唔覺，餐飯已經食到三點。呢個係最後一個回合咧。｣安祖宣布。我人生第一次係辦公時間食午餐食到三點，睇嚟呢個同樂日也有啲好處。
不過，最後呢回合由……我……負責，對手咁啱係Morgenstern。點解咁啱？大佬呀，而家寫故事呀！梗係咁啱得咁橋啦。
我先發。
｢I for instagram.｣
不過，我係無instagram的。
可能因為文叔收入唔高，無智能手機，所以Morgenstern完全唔知係乜。不過，佢根據phonics 幾乎串到出嚟（幾撚恐怖，我望住instagram都幾乎唔識串）。可惜佢唔係串多咗個L，就係串咗其他嘢。2:2。
一額汗呀。
最後一題，如果我守得住，成人隊就力保不失。講出嚟都禮，成班人夾埋百鳩幾歲，身水身汗為咗和場波。
｢守住呀阿史！人類嘅幸福喺你手上！機會嚟咧，飛雲！！！｣大力同Nelson係後面 嘈生晒 打氣。
Morgenstern諗咗一陣。
｢J for Halappino.｣
沉默。
沉默。
｢喂，你…你……咪滾我喎Morgenstern，Hala係H字頭喎。畀…你講多次。｣我口震震咁問。
｢J for Halappino.｣
沉默。
沉默。
沉默。
沉默。
沉默。
我擰轉頭問大力同Nelson：
｢嘻嘻嘻嘻，佢講乜嘢Filipino？
做乜嘢關賓妹事呀？我唔識喎。｣
｢妖！！！！！｣眾齊聲。
2:3。
結果成人隊因為我唔識答呢題而輸咗。正所謂盲拳打死老師傅，一班年薪六七位數嘅人，輸畀班豆丁，唔係好出奇啫。佢哋又識寫波多野結衣日本平假名咩？
最後小朋友隊勝出，人事部送咗啲小禮物畀全部小朋友。
───
好咧，究竟乜嘢係Filipino呢？奇怪嘅係，當我話唔識嘅時候，居然無人講正確答案係乜，直接判小朋友勝出。
唔通我真係咁撚蠢，唔識一個全宇宙都識嘅字？
唔通我真係咁撚蠢，唔識一個全宇宙都識嘅字？
唔通我真係咁撚蠢，唔識一個全宇宙都識嘅字？
唔通我真係咁撚蠢，唔識一個全宇宙都識嘅字？
唔通我真係咁撚蠢，唔識一個全宇宙都識嘅字？
我受到太大打擊，成個下午都無心機做嘢。只係自己房炒股票，唔敢見人，廁所都唔敢去。我懷疑過我係咪應該排隊讀Thought，或者搵返間幼稚園讀過書。
份三碌拎呢？當然係無咗影……
直到傍晚，我聽到門口班細路大叫再見，｢親子同樂日｣終於完結嗰陣，心情先平伏啲。簡直好似過咗一萬年咁長。
為咗收拾心情，我約咗大力同Nelson去會議室煲煙。
｢究竟……乜嘢係Filipino?賓妹？｣我問。
｢你仲問？乜嘢架都畀你丟乾丟淨。｣大力大大力將煙灰質落煙灰盎。
｢咁究竟乜嘢係Filipino?｣再問。
佢哋兩個沉默。
｢屌你兩件撚樣，自己都唔識。｣迷底畀我揭穿。
秀英同安祖搞掂手尾入嚟，我即刻問佢哋。
｢哈哈哈哈。Jalapeno呀。J－A－L－A－P－E－N－O，
墨西哥辣椒。墨西哥話，J發音H，所以Jalapeno讀成Halappino。你條死文盲以為人哋講賓妹。｣秀英解釋。
｢美國咁近墨西哥，你喺美國留過學都唔識？有冇搞錯？｣我向Nelson咆哮。
｢你白痴嘅，大陸咁近香港，點解上面班友又唔識廣東話？｣Nelson咁都可以抽到水。
｢秀英你好勁呀。咁難嘅英文都識，不過墨西哥辣椒係點嘅樣？｣大力放冷箭。
｢我唔知喎，咪辣椒咁嘅樣掛。反正一生人裏面，又有幾可見到真正嘅墨西哥辣椒？唔係中國射火箭，香港人同太空人又會有關？學A for Astronaut，J for Jalapeno，日常生活邊會用到？
我有時都會懷疑小朋友學嚟做乜，不過佢要默書，人學佢學，無辦法，都唔諗咁多。萬一佢日後遇到墨西哥人，都可以吹下水。你唔明嫁咧。｣
｢你知唔知乜嘢係Corona?｣Nelson問。
｢Corolla?車嚟嫁？｣一講唔識嘅嘢，天真的聲音又會出現。
｢Corona係全球最賣得嘅啤酒品牌之一，原產地為墨西哥。地球上識Corona嘅人一定比識Jalapeno多，墨西哥人亦普遍以生產Corona為榮。有次去新加坡開會，對手係個墨西哥佬，我同佢由Corona開始傾計，最後傾咗單勻返嚟。｣Nelson解釋。
｢嘩等我今晚買兩枝，食飯嗰陣同仔仔講下先。｣
｢算罷拉，秀英。
最慘唔係做某啲無用、廢嘅嘢。如果你以為有用而去做－即使事實係冇用，咁只係你蠢，掌握嘅資訊唔夠。你學聰明一點，買一點教訓，慢慢會學精，會進步。
更慘係你明知樣嘢廢，你都跟住去做。點解？全世界都咁做，我唔咁做可能蝕底。你portfolio一吋三十頁？我加到兩吋八十頁。
你明知無用都去做，只會越做越多。錢越洗越多，倒頭來只會白忙一場。永遠不會進步，只會越來越沉淪。
即使只有億分一機會，我都要買定保險。提高智商嘅奶粉、讀兩間幼稚園、學七種語言九種樂器，學定先，無壞。唔怕一萬，至怕萬一。
因為呢啲萬一，老竇老母越俎代庖，幫個仔主動放棄晒童年嘅快樂。
我終於知道點解會有人信性交轉運。
唔怕一萬，至怕萬一。拮兩下，話唔定真係轉到運。
信性交轉運嘅少女，大個咗就係怪獸媽咪。｣
｢好咧Uncle Shit，發未夠偉論未？據聞你份三碌拎今日十二點前要交。｣安祖提醒我。
｢哎呀，含家鈴，掛住湊細路，份嘢未－做－過呀～～｣我尋門而出。
結果我嗰晚做到十二點。
亦因為今日嘅遭遇，我暗地裏將｢親子同樂日｣改為｢史兄受難日｣。
───
後記
｢史兄受難日｣翌日。
當然無補假啦仆街，你以為我係英女皇？
喺廁所撞到大力。
｢尋日玩串字，你個仆街講G for Godzilla。哥斯拉，Out唔Out啲呀你？｣洗緊手嘅我對大力講。
｢我知你受咗好大打擊，Filipino，哈哈哈哈。不過件事都過咗十幾個鐘，忘記佢啦施主。｣大力喺廁格邊屙尿邊講。
｢屌你，G梗係for Girls Generation啦！｣我搵洗手水潑向大力。
｢仲少時？out 唔out啲呀你？而家全世界都玩緊Crayon Pop 首Bar Bar Bar～～｣大力潑返啲尿過嚟。
｢嘩你痴撚線嫁？詆毀我嘅少時？我而家去屙篤屎放喺你個仆街嘅枱面。｣我扮除褲。
｢去食煙啦，仲屙屎。｣大力用右手搭住我膊頭行。
｢喂你好似未洗手喎！｣
｢得拉，大菌食細菌。借個電話嚟，等我叫埋Nelson啦。｣
｢你成手都係尿喎。｣
｢童子尿嚟，明目、有益呀……｣
｢我阿媽叫我飲湯嗰陣都係話明目、有益……｣
二人慢慢朝向會議室進發……
我、秀英與怪獸家長的故事(辦公室七不思議事件 外傳)－完
(正傳幾時出？無呀，未得閒寫）
－－－－
廣告時間：
鄙人傾盡全力編寫的首本小說＜婚姻這種邪教＞，已在各大書局有售。希望各路人馬多多支持，等出版社有水腳幫我出＜辦公室七不思異事件＞的小說版！多謝！
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2013年11月10日
