理性討論?值得咩?

大年初二,未到赤口,已經喺網上同人開年。證明當初寫《新正頭,你洗咗頭未?》呢篇文嘅顧慮並非多餘。無他,出得嚟行,預咗畀人彈,特別係當你寫嘅課題涉及其他人嘅信念甚至狂熱嘅時候。所以我絕少書寫宗教有關嘅議題。

只不過想寫一下「片面地否定『迷信』」(我每次都用引號括住「迷信」,係因為我認為經過思考之後而選擇相信風水術數並非全然、斷然或盲目『迷』信),結果就引來一啲讀者(睇過篇文就叫「讀者」架啦)留言批評(編按:其實多數COMMENT 都在下面總編SHARE 的時候那個POST 下面,見下),話唔得科學、立論者應先提出論證,諸如此類。

 

 

喂,當我只係 layman 地 (係,我好貼地,唔識亦冇時間拋咩理論咩主義)講緊一啲冇科學支持嘅習俗、民間智慧嘅時候,你要我提出論證,即係問和尚借梳、叫民建聯派杮啫?冇得拗,真係拗都無謂。我永遠說服唔到佢哋,大家打口水交打到 2047 都唔會有結果。正如返工好多打工仔話,好憎開會。點解?因為開會好多時候傾嚟傾去都係冇結果,一個二個議題都係「容後再議」或者「返去問老闆」或者「同阿邊個邊個傾傾夾夾」,完全係浪費青春。

咁當然,可能我太懶,太早提出「反正話不投機,不如慳返啖氣」,有聲音話我唔畀「理性討論」嘅空間。 Okay ,清楚、明白。結果再猜多十幾板,大家各自知道對方想講乜,咪各自收隊食飯睇波瞓覺。我唔享受呢個過程,但至少大家討論有最基本嘅尊重,算啦。

 

理性討論

 

食飯嗰陣,我諗起呢一幅圖。社交網絡嘅出現,令唔同背景唔同信念嘅人可以喺同一個平台上發表自己嘅睇法,唔再限於《城市論壇》或者報紙嘅筆陣。社交網絡亦都令討論速度加快……當然視乎你嘅字速度。但講真,前人隔空論戰每一板相差數以日計,同今時今日幾分鐘就一句、幾個鐘就幾百個留言嘅速度差天共地。

開港有話「慢工出細貨」,咁快呢?當然唔一定質素差,但係冇經過細思慢想嘅發言,少不免受情緒同四周眾聲喧嘩嘅雜音所影響。真正可以捉到鹿、脫到角嘅,唔會太多。

即使畀你去到金字塔嘅尖頂,一切從論點出發,咁又點?好多話題都唔係非黑即白、大是大非,總有人會固執己見,更多嘅情況係從一個話題衍生更多問題,拗下拗下,由水客貨是否走私,到應否設立奶粉離境稅,到自由市場與政府干預,到資本主義與階級鬥爭……講到最後,除咗打嘴炮講兩句「資本家可恥!可恥!」或者和諧地講句「一人少句啦嘈夠未」,真係唔知講咩好。就係見得太多呢啲穿梭時空、跨越太陽系嘅旅行團,我先想從源頭減廢,將爭拗消滅於萌芽狀態。

 

中學嗰陣參與過辯論比賽,有說「真理越辯越明」,其實呢句嘢本身已經好有商榷餘地。換轉喺中學、大學,我可能都會贊成透過討論解決紛爭,但係事隔多年,我唔再係咁諗,特別係當件事同一個人嘅信仰、喜好有關嘅時候。試過一次出席聚會,講到政治立場,有人同我講話「要一直鞭策自己,唔好畀社會磨平自己嘅棱角,淪為左右不分嘅和稀泥」,我嗰下第一刻就係諗起:「少年,你還年輕……」

一個人點樣諗嘢、相信啲乜,絕對受到出身、教育同閱歷影響。長年受困象牙塔嘅人,絕對有權不食人間煙火,拋出一套又一套科學化嘅理論,對於世事都以同一把呎同一套準則衡量。含住銀鎖匙出世、活喺溫室入面嘅人,亦唔會明白咩叫緣份、咩叫際遇,因為要風得風,「我的字典裡沒有放棄」。上咗岸嘅「六、七十後」,亦好難理解「八、九十後」嘅苦況。夏蟲不可語冰,其來有自。

 

唔駛同我講咩「犬儒」、「綏靖」、「失敗主義」,我只係知道人生苦短,有大把嘢值得你同我花時間花心機去做,好過用喺網上同人打到天昏地暗。同意我嘅諗法,一個 LIKE 我就心領,唔同意嘅,有得傾就傾,冇得傾就算,that’s it。至於玩到人身攻擊嘅話,我只會話, it’s hilarious。

 

作者:中佬

中佬
中佬,三十而立,最怕香港濕立立

閱讀後覺得好,請多多讚好及分享~:)

其他熱門文章

  • 【遊戲介紹】耍帥動作射擊遊戲 《Gungrave G.O.R.E》無限子彈變型棺材爽爆殺敵 by 五木
    主打耍帥和爽爆的動作遊戲,除了《Devil May Cry》外,還有另一個系列《Gungrave》(銃神)。新 […]…
  • 未來為你的旅途 – 鐵路願景 by MTR Service Update
    車務工程部就提出「鐵路願景」(RailwayVision)計劃,將三大鐵路範疇、設備,即車站、列車、票務系統更新之餘,仲期望可將服務提升至另一個層次,迎合下一個 20 年的需要。例如大家有無稔過售票機可以找番紙幣 ? 網上買完飛又可以直接搭…
  • 【憂傷的嫖客】「環保吹」 by 菠蘿
    某天下午,就在我們對一樓一場所集中地進行實地考察的時候,遇見了一行三人、正在「洗樓」的嫖客小隊。所謂洗樓,就是嫖客在一樓一鳳姐集中的大厦,向每個鳳姐單位門口按鐘、逐個審視,直至他們遇上合眼緣的鳳姐,與她們進行交易為止。而這三人有別於一般的嫖…
  • 《鋼鍊》「等價交換」根本不是真理 by 方潤
    很多人提及《鋼》,都是提及等價交換原理,甚至以為《鋼》就是教人等價交換,其實是大謬。因為《鋼》的每一集都有這段開場白,由主角兩兄弟讀出:「人不作出犧牲,就不會得到任何回報,想得到一樣東西,就必須付出同等的代價。這就是煉金術的基本原則 - 「…
  • 講起「蔡康年」,你諗起乜野? by 齋老味
    曾經係當紅DJ,因為施念慈報警話俾佢打,立即被貶為人渣,無得做DJ走曬樣,從此淪為TVB專用低能或變態角色。近年因為有高清台,無記多咗財經節目,先知佢原來而家係財經主持。…
  • 語言陷阱(上):闕義、歧義、含混 by 楊梓燁
    這種因為語法結構的問題,而造成一個語辭(詞語、字、句子)在某語境裡有兩個或以上的意思,便叫做「語法歧義」。這種歧義的其他例子,例如有「求學不是求分數」,可以理解成「求學,不是求分數」,又可以開玩笑地理解成「求學?不,是求分數!」。又例如算命…
歡迎讚好我們的facebook page,免費資訊源源送上。

文章資訊

ID: 62051
Date: 2014-02-02 00:00:54
Generated at: 2022-11-27 20:24:24
Permalink: https://www.vjmedia.com.hk/articles/2014/02/02/62051/理性討論?值得咩?