【短篇小說】香港落雪的日常

(photo via cc Flickr user dcdailyphotos)

(photo via cc Flickr user dcdailyphotos)

 

偽新聞一則:「由於香港受到一道極強嘅寒流加上冬季季候風影響,今日罕有全港出現落雪現象。咁亦係香港天文台有紀錄以來,首次有市區降雪。天文台預期未來數日仍會落雪。市民出街記得著夠衫保暖,而揸車嘅朋友就要更小心路面濕滑。」

睇見電視新聞報導嘅我,第一件事要考慮嘅係到底要唔要返工。不過,新聞只係提到教育局對學生嘅安排。成十分鐘嘅晨早新聞之中,就只有一句可悲嘅「市民出街記得著夠衫保暖」關我事。真係夠晒離地……屌哪星,而家唔洗返工咩!出街!

呢類天氣報告,實在無法令獨單嘅我感到一絲溫暖。唔好講歐洲有火辣辣嘅裸女報天氣頻道,就連日本都搵偶像去報啦!我嘅阿Kay呢?肯定响屋企同張生做緊令兩人體溫上升嘅活動,仲一口都full晒添……相信早餐B係一日豐富嘅開始。

我呢?當然女友唔可能買四十幾萬嘅新車比我代步啦!一早同成班苦海中人一齊迫地鐵。點知行到去地鐵站,聽到大堂宣佈:「由於落雪引致電力故障關係,現時所有無上蓋路段會暫停。荃灣線只……」

唔係呀!東九龍返工去唔到九龍灣以東,新界西去到荔景,香港島去唔到柴灣……咪即係死晒!而家仲有幾多人响尖沙咀同中環返工呀?嗰度旅遊區嚟㗎!

聽咗兩次廣東話完普通話,普通話完又英文,水蛇春咁長嘅宣佈之後,我終於搵到港鐵提供嘅接駁巴士。條人龍同李廣田《花潮》一樣咁有詩意。

有車,人在動,無車,人也潮水一般地動,在燈光照射下,每一個人都有他自己的怒樣,就仿佛墮進大海上翻腾,你越看得出神,你就越感到有一片人潮正在向車站四面八方迫過來,好像有一种生命力在不斷擴展。而且,你可以聽到人潮的聲音,谁知道呢,也許是問候,也許是地方粗言,人聲,車聲,粗口聲……,這一切交織在一起,再加上寒風,天怒人怨。

我嘗試以3G網絡打返公司請假,線路繁忙得緊要。打咗十幾次之後,終於接通。係老闆:「一個二個凍少少就想放假,而家公司無糧出呀!請假紙就免,有死亡證就攞返嚟啦!你只可以死,唔可以病!」

接過指令之後,我唯有「死」返公司。响落住雪嘅情況之下迫上咗巴士,感受到死去活來嘅悶熱。點解落雪都仲要搭冷氣巴,而點解冷氣巴係會咁焗?我望唔透。

冬天搭冷氣巴返工,
一上,一落,
邊個落車唔嘔就贏。

返到公司坐底之後,一上facebook,立即比香港各區的雪景洗版。有朋友白痴到倒杯水落地下拍片,睇下會唔會立即結冰。咁梗係唔得啦!只搞到一地都係。

除此之外,就係一段又一段嘅駡戰。

動新聞中見到有記得問特首會唔會考慮停市,同勸僱主唔洗市民返工。

特首話:「香港作為一個國際都市,好多嘢係唔可以話停就停。外國亦無先例因落雪而要求私人公司停業。呢種擾亂市場運作嘅舉措,係要謹而慎之去考慮,並唔係一時三刻可以落決定。我本人亦立即要求各區避寒中心全面運作,去幫助有需要嘅市民。」

佢到底講咩呀?避寒中心同返工有咩關係呀?不過,當轉移視線同語言偽術已經成為咗指定動作嘅時候,真係麻木晒。

跟住少不了見到網台光頭鬍鬚佬嘅火氣片段:「而家香港落雪呀!大佬!有咩比市民安全更加重要,呢個仆街689政府唔死人都唔會做嘢。條友搞笑就一定啦!停業同休市都分唔撚清,仲關個避寒中心叉事咩?你老味,平日凍少少都開啦!成班官根本係一啲承擔都無,仲問乜撚嘢責啫?而最恐怖嘅係佢背後點解唔休市,就係因為唔可以有個先例比大陸見到,到時湖北又話要休,北京又話休,咁咪亂撚晒!」

Ok!我都知佢九成又關中共事,不過見佢鬧得咁興起,七情上面,我就自然投射去媽叉我老闆身上。條氣總算順返少少。

之後,又見到唔少網民影咗張相留言:「可恥!」
原來係一張banner同一個籌款箱,上面寫住寒冬送暖籌款。咁又點會可恥呢?再細心睇下comment,原來個籌款機構根本就無同關注露宿者同長者團體有任何共識。有人質疑啲錢會去咗邊。

疑似攪手嘅立即回應佢有幫人嘅權利,唔一定要捐比某特定機構。又話露宿者同長者唔係唯一受災主體,指出全港都係持份者。

當然,籌款箱上一個心型加間屋嘅logo,又真係好易引人誤會。

見到一段長長嘅駡戰,真係覺得好煩。

呢個時候,旁邊嘅同事問我:「喂!一陣lunch 叫唔叫外賣呀?」
我指一指reception:「痴線!落少少雪凍得你死咩?你睇Pretty,仲著住條褸屌裙返工咋!」
同事話:「不過,出面好凍喎!」
我立即答佢:「你好想見到老闆個西面呀?有得出去抖下氣,話之佢雪崩啦!」

有好多怨氣,就連落雪都撲唔熄。

這就是香港的日常。

 

作者:之樂

之樂
常言道:「知足常樂」。只要凡事沒要求,那就不是最快樂嗎?於是,之樂樂於成為宅男一「枚」,睇睇女,寫寫字,足矣!

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 63094
Date: 2014-02-12 14:37:18
Generated at: 2021-05-16 01:22:43
Permalink: https://www.vjmedia.com.hk/articles/2014/02/12/63094/【短篇小說】香港落雪的日常