提示：含粗口、文超長、超悶（我自己都覺得好悶）。請預留足夠時間及精神閱讀。
劇情進入大直路前的急彎，第六及第七集較少人生道理及笑話。有乜留返清明重陽拜山嗰陣講，再咁寫落去寫多九年都寫唔完呀！
請先溫習第一至第五集，及第三集外傳（外傳一定要睇同like的！否則完全唔明做乜）。睇blog要溫習，真係慘過返工返學呀！
內容根據真人真事改編。
（全部圖片為網上截圖）
－－－－
三碌拎嗰個書面評論都未夠。
之後Tony計劃接見個別員工，話想講畀佢哋聽公司未來發展計劃，另一方面對聽下佢哋講意見。
「我已經幫呢個行動改咗個名，叫＜促膝長談＞。」Tony一臉嚴肅講呢個行動代號。
「嘩，你估你係老廉捉人，要改行動代號咩。梁家輝tone:我哋呢個行動，命名為『寒戰』～」
我好難先喺佢面前忍得住笑。
Tony見我無反應（大佬！我呢個時候同恥笑你嘅腦電波搏鬥緊呀！），自己解釋：「手寫評語，可能有人會覺得煩，又或者怕人認得啲字跡，索性唔寫；個別接見可以顯示公司非常重視個別員工，同埋我哋有改善公司評核制度嘅決心。」
條友真係戇鳩鳩的。你搞咁撚多嘢，極其量只能夠顯示你食飽飯無屎屙。
乜春＜促膝長談＞，叫＜捉蚤詳談＞都不以為過。可以預計到被接見人士會如數家珍、細到好似蚤乸、芝麻綠豆嘅嘢都拎出嚟講。
受人錢財，替人消災，見咪見。香港分部幾百人，認認真真接見，三百個人每人見半個鐘，一日見十個鐘，咁每日唔食飯、唔去廁所，最多見廿人。足足要十五個工作天、三個星期先見完。簡直好似啲後生仔想買樓，唔食唔著五六年、好彩嘅話先儲到首期（好彩即係你儲嗰陣，樓價唔升。否則就好似我想移民去台灣咁，儲到就嚟一球，佢就加價加到兩球。屌你老母）。然後，再唔食唔著多十幾年先供完－所以我話有乜嘢廿五歲先好做晒佢，因為廿五歲後你連食都冇得食。
「Tony，我哋有三百人，見晒好大鑊。咁見法，分分鐘到見閻羅王都未見完班人。」
「Good observations。」
屌你，我得一個觀察，何來 S 呀？
「所以呢，我決定咗只需要見三碌拎裏面，評分最差個15%人，再加15%抽樣。大概見一百人。」嘩，我由俾三百個人狂姦、變左做一百人輪姦，你可以話相對地好左。即係…你會考3分好過零分囉，不過都係升唔到高中。
「仲有，要接見同事嘅名單，已經準備好。」你係『方太與你』裏面個方太？所有嘢都因為時間關係準備好？抽樣嘅方法，得佢自己知，好明顯做過手腳拉。
我拎起個名單，望一望。三碌拎最低分嗰15%人，我大概知係邊個。另外嗰班抽樣嘅……硬係有種說不出嘅違和感，呢班大部份…..好似有一種說不出嘅相同。好快我發現咗另一樣嘢：
「點解咁啱得咁橋，安祖、大力、Nelson 同秀英都有？佢哋喺三碌拎唔係排lower 15%-tile。」
「我講咗會公平公開公正咁做，抽籤嘅嘢，咁啱得咁橋，無辦法。」
「仆你個街，分部三百人，扣咗最低分嗰四五十個，你知唔知同時抽中呢幾條友嘅機會率仲細過中六合彩頭獎？」我喺腦裏面已經計左一次個機會率。＜捉蚤詳談＞應該唔係件咁簡單嘅事，佢哋一個都唔使見最安全。
「抽籤咁啱得咁橋，無辦法。」Tony一臉poker face咁解說。
「我唔理，總之你一定有出術。如果你見晒佢哋四個，我會即刻將成套評分同評語係電郵度發出去，一拍兩散。」我拎呢樣嘢嚟凶Tony，完全危急生智。我唔知道呢樣嘢可唔可以威脅佢，不過情急之下講咗先。
Tony呆一呆。
原來兇到佢。我見佢呆，自己都呆一呆。你精我都精，飲杯竹葉青。
條友諗左陣。
「好咧，咁你將佢哋四個名寫喺四張紙，抽其中兩張咧。抽中就唔使見，見少兩個，大家都輕鬆啲。」
我心諗：「咁順攤？」
屌你老味，理撚得你。第一個…我抽…
好多人講，阿媽同女友跌落水，喺假設嘅情況下問你，你唔會答得出救邊個。
不過，當呢件事真係發生，你會知。
抽第一張飛到打開個一刻，我腦海都充斥住：
「哎呀，我屋企仔細老公嫩，唔可以無左份工架。阿仔仲要讀書入直資，上補習班，學琴學畫畫學毛筆字，層樓上年先加按左，好陰公呀。你千祈唔好炒我呀阿史。我仔細老公嫩……」
仆街，點解我會諗起秀英…
打開張紙，係Nelson。
第二張… 「哎呀，我屋企仔細老公嫩，唔可以無左份工架。阿仔仲要讀書入直資，上補習班，學琴學畫畫學毛筆字……」
抽嗰陣又諗起秀英。
結果…係安祖。
於是喺咁兒嬉嘅抽籤下，Nelson同安祖就唔使同Tony促膝詳談。
—-（我是分隔線。其實，點解啲人要寫到明「我是分隔線？」。使唔使寫。（我是句號）？或者我是忿怒？
跟住開始公娼生活，俾同事用把口輪姦。
電腦部嘅高級經理A－即係外傳裏面幫我改名Uncle Shit條細佬嘅老竇。平時唔出聲，除左早晨同早抖，好少聽佢講嘢。聽聞佢好勤力、做嘢好有效率，其他部門嘅嘢都肯幫手。即使唔多講嘢，人緣都算唔錯。大家都覺得，佢個仆街老闆退休，就到佢上。
可惜佢老闆並唔係咁諗。因為公司無硬性退休年齡，所以即使65歲，佢老闆都可以以顧問嘅身份，繼續坐返原本個位－包括職位同房間，繼續出糧、繼續以老闆身份出現。A 打逆境波嘅能力都好高，一路低調做人，安守本分。無人聽過佢投訴半句。
睇張分紙，佢居然屬於最差個15%，真係有啲怪。
Tony求其講咗公司未來五年大計，一啲網上都睇到嘅嘢，就係佢所講嘅『向同事講解未來發展計劃』。
「A，呢個係俾機會你講返工作上、人事上嘅嘢，你可以隨便發揮。」
「嗯，其實我喺上次張360 evaluation 都講過。」經理A回應。
佢口中嘅360 evaluation，即係三碌拎。
「張表不記名的。」我提一提。
「咁嘅，我最近問人事部拎返咁多年嘅評核報告正本，發現裏面有好多內容唔同左。」
「下？」Tony恍然大悟。
「你有嗰疊評語嫁嘛。『有人修改appraisal』，呢單嘢放咗喺嚴重事故，你有冇睇過嫁。」我心諗。
「係。我對返自己份副本，大部份評分都降低左，以前一啲較好、較正面嘅評語，份正本都俾人修改左。最緊要係，最近呢幾年，係空白地方多左句：此人不適合晉升。」
「唔係呀嘛？」Tony口震震。大家做呢行，出街無誠信，預左呃呃氹氹，對內真係點都要有返少少。
佢哋對答嗰陣，我一路喺旁邊忍笑忍得好辛苦。
皆因我諗起一件發生喺小學五六年級嘅事。
────
嗰陣班主任係個上海婆，好撚惡、惡到今日我都仲驚；有個同學叫徐誠安，成個技安咁嘅款，好撚曳。上海婆教中文，上堂時阿安成日傾計，上海婆好憎佢。
總之大家互憎對方。
有日，上海婆派返默書改正。上海婆坐喺老師枱，一路叫名派派派，派撚晒都冇叫阿安個名。
雖然年紀細，我哋感到一場暴風雨即將來臨。
派晒簿，上海婆企起身，手拎住最後一本默書簿。佢居然好溫柔咁曉以大義，話默書嘅分數同改正，係想大家學嘢、識嘢，唔係有乜嘢不可告人的目的云云（其實我好想知默書可以有乜嘢不可告人嘅目的，核爆？竊聽？做港督？）。跟住佢講左好多細過時候，文化大革命個陣幾慘……可憐當年我根本唔知乜野嚟，我以為同黃帝呀蚩尤呀係涿鹿之戰都係遠古時代嘅嘢咁。
佢講講講，大家幾乎瞓著之際，佢突然將一本默書簿大力掉落地下，右手叉腰，左手指住徐誠安，大聲叫道：
徐誠安！你而家用塗果液改左我俾你嘅35分，然後自己寫個85分上去，有乜嘢意思？你以為我睇唔到咩？你係咪好不滿我？
天呀～～～～～～～～
點忍到笑呀大佬！！全部人都即刻伏喺枱面，唔敢向上望，笑到呀，
哈哈哈哈哈哈哈哈哈哈哈哈哈哈哈哈哈哈哈哈哈哈哈哈。痴鳩線架！大佬呀，你用塗改液改，真係盲嘅都睇到。本簿仲要交返上去嫁！仲有，橫豎都係改，仆你個臭街，哈哈哈，點解又唔填100分？
結果徐誠安死死氣咁執返本簿，跟住足足俾人笑足兩年。
「阿安，你就好拉。默書作文，鍾意幾多分就幾多分。我恨都恨唔到。」
「喂，今次默書85分好唔好？」
「安哥，我想要91.3分，幫下手拉～」
哈哈哈哈哈哈。
（上面兩張圖，當然唔係當年嘅默書。我是從這裏下載的。
貼出嚟，係因為篇文太悶，要搵啲圖濫竽充數一下。其實，有趣的是，上／左邊的學生全部答對了，沒有任何錯漏，老師卻只給93分。下／右邊那位同學，漏了一個字扣3分，卻有95分。還有，左邊學生是寫「秋知落葉」，右邊的是寫「秋之落葉」，老師看來看漏了眼。做老師真係好辛苦嫁。
哈哈哈，萬一遇到啲仆街仔自己走去改分，你仲要去檢查一下，真係一日九十六小時都唔夠用。）
—-
經理A嘅說話打斷咗我嘅回想。
「無錯，件事係咁咁咁，你地可以睇返。我帶左我嘅副本嚟。」A拎左疊文件出嚟。
上次三碌拎嘅評語只得一句，唔清唔楚，細節原來係咁大鑊。帶埋證據嚟，睇嚟A唔係講大話。估唔到我80年代讀小學嗰陣發生嘅小學雞事件，去到2000年代投身社會，依然會發生。所以話，學校真係社會嘅縮影，嘩哈哈哈哈。
「好，我應承你我哋會徹查呢件事。」Tony認真咁講。
「A，最後將問多你一個問題：你願意減幾多成人工，嚟避免香港區裁員？」
我同經理A呆一呆。
屌你乜撚嘢問題嚟？
「我唔知。」A走出房門口。
Tony將文件收埋。
「史，改評核呢件事，事關重大，你接手可以會惹麻煩。等我搞返。」
「放心喎。你咪又係諗住拎份嘢嚟搞鳩唔知邊個。」
「你唔好對住上司講粗口。」Tony複述一次我老闆嘅回應。
「你毒啞我啦。毒撚啞我就會唔出聲咧。仲有呀！點解會問減人工嗰條問題？同評核、三碌拎無關嫁喎。」
「公司高級管理層好認真諗緊，有冇方法可以減人工之後唔裁員。我想順便係呢度搵少少腦振盪。」
「炒咗一兩個高層，一年慳幾千萬；整走幾件執行倒屎，公司盤數由紅變綠啦。使春向中低層埋手？」
「你唔好理，總之以後接見每一個人，我都會問。你幫我記低佢係接見記錄最後一欄。」
我真係好適合做奴隸。因為明知無理嘅要求我都照做。
────
近排因為公司生意其實多咗（但班高層諗緊裁員，真係腦生草），大家好忙，好耐無喺會議室聚，靠whatspp吹水多。
聽到經理A話自己份評核畀人改咗，我即刻喺whatsapp話畀佢哋知。
｢佢老闆傻撚咗咩？This is crazy.｣Nelson以前喺美國分部做過。美國人蠢就係蠢，不過佢哋有集體智慧，識得以制度代替個人層面嘅不足。所以佢哋相信評核制度，亦認為個人升遷應該以客觀、公平、公開嘅準則去決定。對於改評核，我估Nelson無諗過會發生。
｢傻啦，其實成樣嘢嘅玩法係：首先你老闆決定咗升唔升你，再諗份評核點寫。笨唔係首先寫完份評核，再決定升唔升你。即使今日畀返啲好grading你，老闆一樣唔會升你。｣大力講。
｢再者，當你向第三者投訴上司，你估高層會點諗？任你投訴再合理，我最多咪炒咗你上司，但唔代表我要升返你。如果咁做，咪個個僭越向再上級投訴自己老闆？到時成公司仲有生態平衡嘅？｣
我哋得出一個結論：經理A係攬炒。
｢嘿，咁你又唔好咁講。而家公司搞呢個三碌拎同捉蚤詳談，已經係想搞文化大革命，等大家互相篤背脊啦。最近公司一連串動作，肯定有不可告人嘅陰毛咧。大家要小心啲。｣安祖煞有介事咁講。
｢安祖，你知道啲乜？｣
｢挑，我都想知。你哋問阿史，佢而家咁近權力核心嘅核心。｣
｢知個屁。Tony條友好撚陰濕，乜都唔畀我知。你哋嗰兩個人遲啲見佢，唔好畀佢chok到我哋啲嘢呀。｣
｢chok乜？Tony幫我chok精，睇怕都chok唔到啲乜出嚟啦。最多咪chok空氣。｣大力笑言。
──── （分隔線又出現了）
（係呀，篇文仲未完）
跟住見支援部主管，文叔（註：見外傳有關文叔與其子Morgetstern的故事）。支援部…即係庶務二課，職責係茶水、派信、維修、搬嘢、換光管、跟出跟入、總之公司一切唔起眼，但又要一啲體力勞動嘅工，全部由呢組人負責。早年公司福利好，人工高，而喺支援部嘅同事，一般學歷不高，所以流動性較低。佢地好多做咗三四十年，好多係五朝元老、經歷過六七個CEO，見慣風浪。因為恃老賣老，所以佢地 好 . 撚 . 惡 . 大部份人都要買佢地怕。
支援部主管，文叔，五十幾歲。佢做得主管，係一班藍領當中做人叫做圓滑少少；佢做咁耐人，一睇三碌拎單嘢就知唔對路。
文叔坐底。
「文叔，你好。」面對文叔，Tony平時嘅氣焰都熄晒。
「東尼仔，點呀？」
「無，文叔，睇下你對支援部嘅人同組織安排有冇乜嘢…」
「支援部全部人都好好呀！」文叔未等Tony講完，已經搶先開口。
Tony再想講落去，文叔舉起左手，示意Tony等等。文叔喺褲袋拎咗包紅雙囍出嚟，抽咗支放喺口。轎起腳，側側頭，拎起火柴點煙。
點完煙，文叔用手指公同中指射走支火柴。笑笑口對住Tony。
「呵呵呵，我哋組織fit到漏，人手啱啱好，唔多唔少、個個兄弟都盡心盡力。如果有邊個同事對我哋有乜嘢意見，可以直接同我講，唔使再借第二個人把口講。」講嘅時候，文叔仲摸摸自己個下巴。
文叔企起身，Tony條件反射向後縮一縮－條友梗以為文叔過嚟打鳩佢。文叔係後褲袋拎咗嗰個又殘又舊嘅銀包，拎咗張咸豐年代嘅員工證出嚟。啤住Tony同我繼續講 :
「真係呢……我文叔幾十歲人，喺公司三十五年，真係無乜風浪無見過。雖然只係讀到小學畢業，但而家做主管，處事一向公公正正，絕不偏私。」
我望住張證，完全分咗神：張員工證仲老過我呀仆街！再者，由於我平時同文叔有兩句，加上我心中無愧，所以我知佢講野嘅對象唔係我。
Tony吞一吞口水：「不過想睇下你對公司有乜意見。」
「係呀！文叔，你想講乜都可以。」為咗緩和氣氛，我唯有搭一句咀。呢幾日淨係聽人講，已經連續九十六小時無講過嘢咧。
「嗯，咁嘅。我發覺呢個乜春嘢三碌鈴，唔包括高層。」文叔拎住份三碌鈴表左翻右翻，上掀下揭。
「嗰班高層裏面，似乎好多冗員。呢班人炒咗一部份，對公司運作無影響。」
「嘩哈哈哈哈！
文叔話緊你呀，Tony，冗員呀，你啊！哈哈哈哈哈。」唔知點解我忍唔住笑。
Tony居然唔識死……
「好咧，文叔，最後一個問題：你願意減幾多成人工……」
「哈哈哈哈哈！文叔同班手下，唔出糧都幫唔到公司幾多。要減不如炒咗我先。咁咧，東尼仔，你自己減咗人工先啦。」
「哈哈哈哈。多謝你，文叔。你最後嗰幾句評語好中肯。嘻嘻嘻嘻嘻…」我一路送文叔出返去，一路忍唔住笑。冗員喎！冗員喎！冗員！冗員喎！
────
之後係抄襲gigi（唔記得麻煩睇返第五集）。佢出名big mouth，見佢之前嗰晚洗乾淨隻耳仔聽佢爆鑊。
gigi個屎忽幾乎未貼到張櫈，已經開始爆料。
「我早兩星期，喺高抿嗰度，撞到同事見工！」抄襲gigi 大叫。
「真？邊個嚟。」Tony聞到有血腥味，打蛇隨棍上。
「咪阿大力個見習，拜仁囉。」
呢樣嘢無人喺三碌拎提過，所以我都有少少突然。轉工咪轉工，有乜所謂？
「哦，咁你知唔知佢去見乜工？」Tony繼續問。
「據聞係Analyst/VP。」
「下？」Tony畀佢嚇親。因為拜仁只係junior，多數做associate。
「你唔知佢老母係邊個咩。」
跟住gigi將拜仁嘅家底，有幾多隻狗、屋企有幾多條底褲，仲有晏就食乜嘢做午餐都講埋我知。
我終於忍唔住插咀：「咁你上高抿做乜。」
gigi可能無諗過我會問，口窒窒咗一下。
「你咪又係上去見工。嘻．嘻．嘻。」我賤笑。
gigi見勢色唔對，即刻轉話題。佢又講咗經理A同佢老闆嘅恩怨－佢講到好似電視劇咁精彩；各個秘書嘅話題，仲爆咗好多同事嘅私人關係。佢唔去做偵探，真係懷才不遇。
講下講下，佢又屎忽痕：
「我要投訴支援部。」
「投訴乜嘢？」Tony又聞到有血腥味。我感到有點不妙。
「班友好粗魯，叫佢哋拎文件，成日推三推四。打畀文叔，佢又護短。好離譜。
仲有，文叔老夫少妻，你哋知唔知？」
「gigi，一樣還一樣，你唔好咁撚離譜。文叔私生活關你撚事？」我屌柒佢。gigi入職年期較短，後生仔女，唔識尊重老人家。同埋，之前文叔咁串咀，我直覺Tony會利用呢啲花邊新聞搞小動作。
「你繼續講。」Tony截住我。gigi以前跟過Tony，我開始懷疑佢哋打龍通，要夾計整走啲人。
「文叔個仔呀，叫乜春嘢Morgenstern，戇鳩嫁咩，改埋同行差唔多嘅名。哎呀，佢咁老，個仔唔知係咪佢嘅。」
啪！
我用盡全身嘅力，一嘢拍落張枱，企起身指住gigi：「八婆你講撚夠未？」
gigi見唔對路，即刻收聲。
「呀，最後，我想向兩位講一樣嘢。」gigi喺公文袋，搵咗張超聲波出嚟，放咗喺我哋枱面。
一張疑似喺肚內嬰兒嘅超聲波。
我撞一撞Tony嘅手肘，傾傾頭、細細聲同佢講：
「喂，Tony，乜你咁唔小心呀。哈哈哈哈哈。
下次唔好用乜嘢0.03咧，咁薄好容易穿。要用啲套，好似你面皮咁撚厚先得嫁。」
「講咩呀你？」Tony板起臉。
「用厚啲嘅避孕套呀。」悶咗咁多日，終於可以講笑。再唔講嘢我會自殺。
gigi 無理會我哋內鬨：
「今日20xx年x月x日。我喺34樓會議室，正式通知兩位我有咗身孕。」
我呆一呆:
「你……
係想我幫佢搵返個老竇，定幫佢改名？
嗱，仔嘅話一於改名USB。唔係行家UBS，係USB。大個咗可以見窿就插。哈哈哈哈。女嘅話改Cabriolet，夠難讀艱澀，意味又深遠，好名嚟嫁，諗諗佢。」
Cabriolet係馬車，亦即係的士學名taxicab cabriolet後面嗰部份。的士喎，任上唔嬲；cabriolet亦係來自拉丁文嘅capreolus，癲羊，夠放。一定好受男仔歡迎。
我點會唔知gigi屎忽鬼拎張心電圖出嚟做乜。即使你之前有幾廢、有幾渣，員工表現如何如何地低劣，一有咗身孕，通知咗公司，公司一定唔可以解僱你。
「史，你唔使咁串。仲有，你頭先拍枱，嚇親我無所謂，嚇親啤啤就唔好。拍枱嗰下我原諒你，不過你頭先對住我同啤啤，講咗三次性器官，仲話乜嘢USB同cabriolet，我就唔會原諒你。」
「咁快啲叫神懲罰我啦，或者代表月亮嚟懲罰我～～再扣我五十分！哈哈哈哈哈。」
「嗯，gigi，你有身孕嘅事會記議在案，並通知人事部。」Tony又淆撚晒底。仆街，扯貓尾扯得咁撚渣，畀啲戲睇下啦。
────
上面呢幾個人，已經叫最有趣。
嗰幾個星期，我聽埋好多無厘頭、悶到爆，同工作毫無關係嘅意見。仲要係大部份，其實喺三碌拎已經見過，今次知道咗係邊個畀，不過亦完全喪失咗之前三碌拎不記名嘅安排。到見秀英同Nelson，我又唔使見。Tony應該唔會喺佢哋身上搵到乜嘢料出嚟，一干人等應該無驚無險。
我始終唔知道係邊個畀「一萬年太久，只憎Derek（大力）」呢句評語。見到中途，我自製咗一張紙牌，上面印咗呢兩句嘢。每次見人，我就會拎呢張牌出嚟，睇下對面條友有冇反應。不過，無人有反應。可能唔喺嗰30%人度掛。
結果，＜捉蚤詳談＞白白浪費咗我幾個星期。雖然我唔做呢單嘢，都無其他嘢做。
────
＜捉蚤詳談＞後約兩星期。
晨早六點收到CEO發個電郵，＜工資節省計劃＞。
仆街！乜撚嘢中文名嚟，好核凸呀！同埋，出乜嘢中文電郵？嗚嗚嗚……
嘩，內容仲震撼：佢話已經同部份員工取得共識，佢哋自願減薪嚟救公司！
自願減薪？公司係咪以為啲人傻嫁？有人會信咩？
再望一望肯減薪個名單。
個名單硬係有啲熟口面……
我起身食咗兩支煙…………………………………………
仆街！！！！！！！！！
我嗱嗱臨開返＜捉蚤詳談＞要見個｢15%隨機抽樣｣嘅名單。一睇……
原來，所謂15%抽樣，大部份係｢親子同樂日｣有帶細路返嚟公司的同事。
仆街！！！！！！！！！邊有咁多巧合？？？佢哋一定係晨早諗好，邊個帶得仔女返嚟，生活有負擔，應該怕畀人炒。要佢哋減薪就容易好多。有份工，有人工，點都好好過畀人炒，收入變成零。
屌你老母！！呢班人無人性嫁！！！！！
個減薪名單，秀英榜上有名。無文叔份、大力同經理A亦唔係名單中。
大家做呢行習慣早起。呢個時候，大力發咗個message去我哋五個嘅group度：
｢係呀，我自願呀！你嚟咧，減我人工啦，20%夠唔夠？再減多啲啦，50%？畀撚晒你好唔好？痴鳩線。我死都唔會減人工，你有種就炒我。｣
無耐秀英應該起咗身。
｢唉，我迫於無奈應承咗。尋日放工，CEO office只係畀咗五分鐘我考慮簽唔簽，都冇時間同你哋講。我屋企仔細老公嫩，唔可以無左份工架。阿仔仲要讀書入直資，上補習班，學琴學畫畫學毛筆字，層樓上年先加按左，好陰公呀。唯有接受。我以為自己係TBB做緊，畀阿樂小姐迫我簽約呀。｣
即使面對減人工，秀英仍然是秀英。呢一點堅持，佢由day1已經有。我估地球大爆炸，臨炸嗰刻，佢依然係咁撚煩，怕供唔到樓、怕個仔長唔大、怕佢無時間讀書……
不過，多得秀英，我先肯定｢親子同樂日｣同減薪有關。
────
甚麼是成年人的世界？
成年人的世界，就係有好多嘢你明知道唔應該咁做，但被形勢、被人夾，驅使你去做啲你唔願意做嘅嘢。
好多人話呢啲叫處世之道、政治手腕；有人會話呢啲叫認命、屈服。
我希望一直保持赤子之心，在發表意見前不猜度、不揣摩人家的心態。當然有點不理會人家感受，我也可能錯，但我忠於並相信我的直覺與分析。
公司有很多聰明的人，起碼，我的智商應該是最低的15%。
據聞Tony入職不久，利用強勁的遊說與溝通技巧，加上數口超精，轉數快，幫公司M&A完成幾單大刁。年輕有為，人家都稱他做｢智將｣。搭直升機做咗老闆的近身後，漸漸變得喜歡揣摩老闆心意。越升，就越多精力放喺揣摩。
日子久了，Tony變得只懂揣摩老闆心意，當日那些遊說與溝通技巧，聰明才智，早已不復再。
今日，大家仍然稱Tony智將。
不過係｢智障｣。
Tony蒙在鼓裏，以為人家仍欣賞他的才智。
我知道，由頭到尾係高層同Tony嘅佈局，處心積累要減嗰班人人工；我亦知道今次係高層同Tony嘅部署，要離間同事之間嘅關係，當中我哋五個係對象之一。
不過，我無法不懷疑安祖作為｢親子同樂日｣嘅搞手，對減薪事情毫不知情。仲有，秀英同大力見Tony嘅時候，又會唔會畀Tony條粉腸chok咗我哋之間嘅秘密出嚟？
同佢哋做同事咁多年，知道佢哋為人，應該唔會咁做。亦因為咁，我更加討厭我自己。
我討厭我自己。
我討厭我自己。
我討厭我自己。
我討厭我自己。
我討厭我自己。
我討厭我自己。
我討厭我自己。
我討厭我自己。
我討厭我自己。
我討厭我自己。
煙駁煙駁煙駁煙駁煙駁煙駁煙駁煙駁煙駁煙。
叮！
在我腦海靈光一閃，我突然知道點解班友要搞咁多嘢。
窗外此時遠處傳來一陣歌聲。
周潤發唱的＜飛沙風中轉＞，由林振強作詞。
歌的頭幾句是這樣：
人在風暴中 無奈的打轉
如像風砂 倦也須兜轉
無奈的疾衝 無奈的刁轉
曾熱的面孔 漸缺少溫暖
這首歌聽過很多次。每次也被周潤發那種唱腔引得發笑。也因為呢首歌中間有幾句類似客家話（我是客家人），所以我好記得呢首歌。
到今日先知呢首歌嘅詞好偉大，喻意一流。人浮於事，無奈順流而行，好似沙喺風暴中兜兜轉轉。
我聽著，想起自己控制不了自己，要懷疑自己的同事，好悲哀。一邊聽著，一邊哭了。
思前想後，我忍唔住發咗個訊息去個group度：
｢安祖，
點解你要同公司高層同流合污，搞個『親子同樂日』出嚟，等班友可以輕鬆知道邊個有細路，再迫佢哋減人工？｣
────
同時，個group傳嚟另外一個訊息。
Nelson發的。
｢I am on the plane backing to the States. 尋晚11點Tony嚟搵我，話我辦公時間嫖妓。我一係返美國總公司，一係等收律師信，告我毀公司聲譽。
我請假返大陸去叫雞件事，得嗰次喺會議室我哋五個人知，仲有孖仔知。史，你講，孖仔見你哋嗰陣有冇講過出嚟？
點解你哋要出賣自己人？
I don’t wanna talk to any of you, not this life, not next, forever.｣
────
我看到Nelson的訊息，呆了很久……因為……
孖仔真係無喺＜捉蚤詳談＞講過呢件事。
窗外吹來陣陣陰風，將我吐出來的白煙吹至四散。遠方仍傳來＜風沙風中轉＞：
人在風暴中 難預早打算
人被風浪沖 聚也許苦短
<辦公室七不思議事件 六、上．完>
───
你問：點解呢篇完得咁奇怪？
梗係啦，之後嗰啲未寫得切呀。哈哈哈哈哈。
<辦公室七不思議事件 六、下>，2014年5月預計再連載；＜七、結局＞2046年 2014年7月，我、秀英、安祖、大力、Nelson與公司來個終極了斷！
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2014年2月17日
