一反常態用廣東話貼文，係因為真係要原汁原味咁講一次。
一切由Google開始。相信如果大家出左一件產品，都會不時喺Google打下件商品嘅名稱，睇下出面反應係點。拿！寫潮文狂推果啲人唔好話你無試過。你梗係會想知有無人share有無人like！
話說小弟上星期四喺iTunes，KKBox 等平台擺左隻舖頭無得埋嘅「碟」出黎。無錯係音樂作品，不過只係喺網上賣。你唔聽歌？定從來唔比錢聽歌？知你架勒，Spotify有得免費聽。唔知乜碟？獨立音樂人無唱片公司撐，你收唔到風都無法，但為左費事比容總話我落廣告唔比錢1，我係唔會喺正文寫個碟名出黎。（但我無話插圖無…）
隻「碟」出街唔夠48小時，星期五晚睇下外面乜野反應。望下KKBox幾多個like，iTunes流行榜點點點。咦？OK喎，算係有個交代。點之，之後喺Google打自己個中文名，加埋自己個碟名，我竟然見到下面呢個畫面。
唔。籃。係。呀？
第一條Link，竟然係唔知邊條茂李放出來嘅非法下載link。一掃落去，唔只一條，係好籃多條。我Click入去，嘩。唔係貼下咁簡單，有D真係有20幾個Reply多謝。
我第一個反應，係覺得我比人輪姦完。我隻碟iTunes喺賣$58，而果20幾人個個有download，乘返都起碼少左成千幾銀生意呀！好似好銅臭… 但其實製作係有成本，多少都想賺返少少返黎嘅。
但更心噏嘅係，音樂呢行咁落去，真係無得做！我呢啲玩左超過10年，叫做有啲積蓄嘅還好。做音樂反正都係想人聽啫，咁樣比人肉俎砧板上，我至多睇開啲當你免費宣傳，最後多左人識嘅都係我。輸少當贏，你吹得我漲？ 難委係20出頭收入唔多果啲Band仔。辛辛苦苦儲錢出碟，你唔買都算，如果仲要放出來任人魚肉。其實同比人輪真係無分別。後生仔一腔熱誠你都蝦，聽歌嘅真係對得住自己良心？
睇清楚果啲非法下載link，就知佢喺邊度偷我啲歌出黎。但其實諗返我上一個project，啲歌係免費喺自己網頁放出黎比人下載，無經過KKBox之類嘅主流平台。由於本身已經免費，捕住主流平台嘅人又唔知，網上面真係無呢啲「魚肉」Link架喎。合法地免費嘅唔見你宣傳下，人地要明碼實價嘅你先至去偷去搶。點解硬係咁仆街嘅呢？
諗起當日喺銅鑼灣街邊玩音樂比差佬竇果時，個個網民大呼“This city is dying!” 又話城市容不下音樂等等等等。但大家聽歌嘅時候，又係咪有確保自己無同班有權者一齊踐踏音樂人呢？我當你post條非法link出黎係免費宣傳，唔代表個個獨立音樂人都一樣。玩音樂、錄歌，其實真係要成本要時間的。付出與收入不成正比，要以音樂維生當然係無可能。就當城市同埋聽歌嘅人都迫到音樂人個個只係可以為興趣玩音樂，但衣食住行、生活節奏等等各方面，又係咪可以比到人呢個空間呢？
如果有一日，呢個城市無晒好嘅音樂，大家睇完呢篇文，應該明白點解。你係咪可以盡自己少少能力，救下音樂呢？
＝＝＝
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2014年2月24日
