進步人士江郎才盡 梁特思歪只爭蕉直

MHO 攝

MHO 攝

 

警告:呢篇文嘅性質係「怨氣文」,內容絕對唔係老少咸宜,而且充斥住大量口語廣東話同埋粗口,崇尚和理非非、講究文章書面語純淨度或者導人向善嘅,唔該過主。我冇興趣招呼你。

 

早排去咗次旅行,返嚟香港,幾日冇見我嘅同事話:「嘩乜你黑咗咁多嘅?」對於喺旅行時如常照住鏡刷牙嘅我嚟講,我真係唔覺黑咗。「吓?有咩?」「你日日望住自己梗係唔覺啦!」逐漸變黑又得,立即變黑又得?係逐漸嘅就根本唔會察覺啦,呃鬼我咩。

不過凡事都有例外,例如話,香港。

 

無論係離開香港去火星旅行再返嚟,抑或每日喺香港搭地鐵做沙甸魚、喺西洋菜街同自由行困獸鬥,香港嘅變化真係鑊鑊新鮮鑊鑊金,好似連續 24 小時放煙花,嘩嘩嘩嘩嘩,嘩到下顎都梗晒咁滯。問題係,嘩得咁上下,就算把聲唔攰,情緒上都麻木啦。唔明?死魚咁款,明未?

你以為教育局網頁戇鳩鳩將廣東話定性為「方言」單嘢會令吳克儉火燒身?錯!
你以為香港市民會對自己嘅行政長官訓斥大家唔好「未富先驕」好反感?錯!
你以為陳志雲轉職為可能係世界上第一位「首席智囊」好有爆炸性?錯!
你以為李慧玲畀人炒魷、被滅聲好大件事?錯!
你以為劉進圖畀人斬六刀可以引起人神共憤?錯!
你以為中環海濱變成解放軍碼頭會令大眾關注?錯!
你以為人大代表同《明報》「協作」會引起恐慌?錯!
你以為中共高層講到明特首要愛國愛港、普選唔可以照抄西方嗰套會敲響喪鐘?錯!
你以為區議員開會畀警察抬走足以令人 O 嘴?錯!
你以為特首千金網上失言搞到群情汹湧,然後佢會嚇到花容失色鞠躬道歉?錯!

喺幾乎每日都有不可思議事發生嘅情況之下,香港人唔係「扮瞓」都會悶到恰著、畀雷劈都唔醒。換著以上任何一單事件喺外國發生,當事人肯撚定冇可能全身而退。不過,呢度係香港,咩都可以發生,而你要解釋到前因後果,可能只可以話「係咁架啦,呢度係香港嚟架嘛」。

屌,咁到底香港係因定係果?係雞定係雞蛋?

 

冇人會諗過一個地區嘅元首上台第一日就畀幾十萬人要求佢下台,更加冇人諗過,呢個元首上任之後咩柒事都做勻咁滯,但仍然可以招搖過市,而且市民連叫佢落台都覺得好厭!唔信?睇相佬呃你十年八年,嚟緊七月一號睇下仲有幾多人會上街掉佢路姆西?宜家翻貨都變晒死貨啦!話時話,當初大手入市嘅炒家唔知散晒貨未?

早兩日有人問我一條哲學問題:點解梁思歪好事做盡,都仲可以生勾勾企出嚟話自己係「梅花」襟凍?又話「天網恢恢,疏而不漏」嘅?一兩年前或者仲有家長好 Q 慶咁講話「咁撚樣你叫我點撚樣教仔女呀你鹵味?」家下?如果我係人老竇老母,九萬樣嘢要煩,仲邊得閒計較特首係咪正直誠實好榜樣?

《主場新聞》添馬男一直都話,梁特首蓄意喺香港製造亂局、製造敵人,好讓自己名正言順咁用鬥爭思維治港,但副作用係製造無限個敵人,搞到自己施政為艱。啱一半啦,錯就錯在「施政為艱」根本唔係副作用。索性咁講啦,佢根本唔志在一時二刻嘅施政係暢順定係棘住棘住。最緊要嘅係,佢用排山倒海嘅壞新聞同危機麻痺市民,等你班港燦都習慣晒,政府柒少陣已經要還神謝恩嘅時候,梁特要推 23 條定係將香港變「一國一制」都可以暢通無阻。你以為佢「只爭朝夕」?「只爭蕉直」就有佢份。

 

咁當然又唔好話賴晒梁思歪,講到佢好似萬惡嘅根源咁。呢個時勢,係事實都唔好講出嚟丫。「今日,係乜乜最黑暗嘅一日!」、「喪鐘,為乜乜而敲!」呢啲口號經過十幾年嘅洗禮已到用到殘晒,零感染力。係零,零呀!講嘅夾硬唧啲感情出嚟,聽嘅左耳入右耳出。無論係默站五分鐘,定係守護乜柒,對觀眾嚟講都猶如水過鴨背,做咗叫做聊表心意,完全無實質效果。轉個頭,企喺道德高地嘅進步人士咪又係顧左右而言他,喺自己地盤發洩私怨,唯一貢獻就係將「唔係三言兩語講得清」變成金句。

講唔清就咪撚講啦,講啲唔講啲,賣關子呀?乜編輯冇同你講字數有限制?不如下期約稿交篇論文叫佢七碗水煲埋一碗水?編輯黑你面?家下人哋出糧架嘛,老奉幫你撮文啦。又或者,下次有邊位家長幫仔女預備測驗,記得教佢哋,「乜乜嘅嘢,唔係三言兩語講得清」,開考一分鐘唔駛就可以交卷,型到喊啦。

或者我應該原諒呢啲進步人士。江郎才盡嘅感受,我識條春咩。對住龐大嘅政府同背後更龐大嘅政權,唔夠人揪其實好閒。玩無可玩咯,咪掉轉槍頭文鬥你班排外麥卡錫法西斯。有咩慘得過眼白白睇住啲自己睇唔起嘅鍵盤戰士玩旅遊景點壓力測試玩到官媒同官員都轉口風,自己堅守道德底線、保持理性、要求同政府爭取呢樣嗰樣多年就連個桔都冇?

 

唔同階層、唔同政見嘅人近來都不約而同咁話「香港變得越嚟越陌生」。但其實究竟係香港變得太快,定係大家慣咗隻眼開隻眼閉、睇啲唔睇啲,直到香港今時今日「方方面面」都被「做大做闊」、選擇性失明都冇用嘅時候,先至承認香港已經變咗?我唔想知,反正聽日香港只會變得更加陌生。是撚柒鳩但啦。

 

作者:中佬

中佬
中佬,三十而立,最怕香港濕立立

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 65683
Date: 2014-03-08 02:58:45
Generated at: 2020-06-03 23:38:48
Permalink: https://www.vjmedia.com.hk/articles/2014/03/08/65683/進步人士江郎才盡 梁特思歪只爭蕉直