（photo via cc Flickr user rutlo）
好，今日唔講科技，用廣東話口語同大家講講 IKEA 個食堂！眾所周知，IKEA 喺沙田同九龍灣都有個餐廳，姑且就叫佢食堂吧！咁平時蛋糕諗唔到食乜，又想狂隊吓汽水（任飲），就會去幫趁吓呢個自助食堂。
$19 一碟肉丸加意粉，再加幾蚊有杯汽水俾你任斟，$30 以下埋到單醫飽肚，再唔係就三五知己一家大細買多兩三碟薯條吹下水，仲舒服過坐老麥食淋過菜心嘅薯條類物體多多聲！做到咁平又好食，除咗 IKEA 之外，就算香港八大巨學咁嘅價錢都無咁嘅質素啦下化？
咁好啦，大家都知道咩叫「羊毛出自羊身上」嫁啦？計計條數，食店除咗原材料燈油火蠟之外，人工都好緊要！要 IKEA 用「相宜」價格供應到中等級數嘅食物，咁幫幫手食完執返好晒枱面上啲碗碗碟碟，成個餐盤放返去個餐車度，咁 IKEA 咪請少幾個人去執盤去清潔，顧客又有平嘢食，IKEA 又慳到錢，原理好簡單姐！
唔知係咪香港人自細就比麥當勞寵壞咗，好似奉旨唔會執盤嫁喎！其實幫幫手執盤唔難，已經唔洗分類放置，埋單比錢果盤嘢，食完就成盤拎返去個餐車度就得啦！而餐車同座位嘅距離一定近過行出 IKEA 門口。每次見到啲人唔執盤就走，蛋糕心諗，唔通食完會無晒力，連個盤都捧唔起？咁我好願意幫你報警帶你去醫院驗下先，係咪 IKEA 啲嘢食有問題搞成咁！（當然無可能啦！）
Anyway，唔執盤嘅結局都係得一個，就係政府一路鼓勵嘅「創造就業機會」，請返啲 Staff 做返食客本身應有嘅義務：執盤！話就話創造就業機會係件好事，之不過呢個就業機會創造喺一個本來唔應該出現嘅位置度，而唔係加強呢個服務本身嘅價值。再簡單啲講，如果係因為好食咗新鮮咗而調高個價格，蛋糕都心甘情願，但如果係因為有班自私嘅食客，食完唔自己清理好而需要請多個人黎執手尾，講出黎都 laugh die me 啦！
講咗咁耐，都係想提提大家，幫幫手下次去 IKEA 餐廳食完嘢，自己執返乾淨佢！
【遊戲攻略】解鎖二三艘潛艇教學 《Monster Hunter Rise》刷國王獨角仙悶到瞓著
《星際啟示錄》全面大解構
港大舍堂次文化雜談（上）：迎新與仙制
【憂傷的嫖客】「環保吹」
其實點先算係鍾意一個人？
【Reg Day 攻略】大學新生註冊四件事
2014年3月11日
