反普教中?你問過家長未?

(photo via cc Flickr user Chris S. Lin @ Taiwan)

(photo via cc Flickr user Chris S. Lin @ Taiwan)

 

打仗,戰線切忌拉得太長。關心時政嘅人,喺李慧玲、劉進圖、王維基、政改、伍珮瑩、自由行等連串事件疲勞轟炸之下,仲有閒情關注「普教中」或「未來基金」,精力應該去到達人級數。(所以我真心佩服林忌)

正正係因為咁,喺一班學生哥出旺角收集簽名反對「普教中」嘅時候,我冇話好關注件事,冇同其他珍惜廣東話嘅朋友一齊寫文或者喺 Facebook 出 status 爭取其他人關注。

隔咗一排,今日我見到有文話小學生用普通話背九因歌。哇,山山街沼?山痴吔衣?真係顛覆我廿幾年前嘅印象。但我問自己, who fxxking care?

 

So far 我見到對「普教中」有異議嘅人,有中學生、大學生、年輕教師……同埋其他同我年紀相約嘅「 80 後」。至於我認識嘅家長或者資深啲嘅同事,我就真係冇聽過佢哋講啲咩。

唔講,一係認同、一係默許、一係冇感覺、一係敢怒不敢言。而以香港人少少嘢唔滿意都嘈冤巴閉 complain complain complain 嘅特質嚟講,唔講,唔似係因為唔敢講。

 

其實咁多年嚟,香港家長莫講話進化,就算變都好似冇乜點變過。由以前要細蚊仔學琴、學游水,補中英數社科健,到家下畀小朋友學粵劇、學俄文、返 Playgroup 、返兩間幼稚園,背後理念始終如一:最緊要入到好學校、第時搵份好工搵到錢。

好喇,咁家長會點睇「普教中」呢?

 

講搵食,家長喺港英時代就叫仔女學好英文,到回歸前後天秤開始傾斜向普通話嘅一邊。無他嘅,返大陸搵真銀嘛,英資怡和都遷冊離港咯……有「兩文三語」存在,都唔係一時三刻判定廣東話死刑嘅,但係香港經濟上越嚟越倚靠大陸,零售業賣衫賣鞋賣錶賣化妝品全部都靠自由行照顧,「返演關鍊」、「油電視框」,基層如是,專業人士亦如是,響應政府呼籲「北上抓緊機遇」,梗係識普通話緊要啦。

打從香港經濟上畀大陸捏住個袋(咩袋?仲要問??) ,就註定普通話大過廣東話。爭就爭在,香港人為咗實用真係可以去到好盡,盡到巴不得仔女初出娘胎已經曉得講普通話,認為咁樣有「優勢」。唔信?自己去乜乜 condom 家長討論區望下,咩叫「民意」。

 

我寫呢篇嘢,唔係為咗長他人志氣,只係想點出一個事實:就算政府有普教中嘅政策或 hidden agenda,學校或學店都可以上有政策、下有對策,但如果家長本身都要求仔女學好普通話、崇普棄粵,下一代仲有咩好講?

反「普教中」呢條戰線,唔係淨係你同我企出嚟就可以打贏。如果唔盡早改變唔到家長嘅立場,等到接收「普教中」嘅小學生進入輿論戰場就已經太遲,輸撚梗。

 

作者:中佬

中佬
中佬,三十而立,最怕香港濕立立

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 66184
Date: 2014-03-13 16:57:56
Generated at: 2021-05-14 18:25:49
Permalink: https://www.vjmedia.com.hk/articles/2014/03/13/66184/反普教中?你問過家長未?