港大民研特首評分係「被拉高」還是「拉低」？

港人講地截圖

尋日友站《港人講地》話特首民望調查俾好多零分嘅極端受訪者拉低哂，仲話呢D 數據「藏在民意網站的暗處」，於是我就去咗香港大學民意網站睇吓：

咦？咁容易就俾我download 原始數據？

Download咗個file,發現係俾SPSS用嘅.sav格式，唔怪得友站話「要以特定軟件才能打開」啦。不過我用免費嘅「R」都開到。¹

今次用嘅數據於2014年3月14日從港大民調中心下載；至於R codes，我放咗響Pastebin。

友站話除咗平均分，評分分佈都好重要，咁就畫個直方圖(histogram) 睇吓啦。

係喎，個評分中位數50分，而有唔少人俾0分，拉低個平均分去到47.4．．．²咪住先，友站同港大民調都話平均分係47.5。友站一定唔會咁唔認真，唔睇清楚數據就亂噏嘅，一定係我計錯數。

原來我唔記得加權。

港大民調網站話，佢哋每一次都會將原始評分，「根據香港人口的年齡性別分佈加權調整」。例如如果今次電話訪問，有41.5%嘅受訪者係男性，但係原來香港人口有45.4%嘅人係男性，比受訪者入面嘅男性多，咁我哋就要將男性原始分數嘅比重加多D，平衡返，等數據可以代表香港市民。

好喇，等我加權之後再畫個直方圖出嚟。

今次個平均分，四捨五入之後係47.5，似乎我今次計啱數。咦，但係平均分大過中位數，而大部份數據都響圖嘅左邊，似乎俾梁特首高分嘅受訪者先係極端人士，而

47.5呢個分數已經係拉高咗嘅分數喎。

即係話，友站一係就無睇清楚數據，一係就計過數之後選擇性公佈結果，再指港大民調「藏頭露尾…實在無法不令人懷疑民調背後的用意，即使不是存心誤導，但這又是否一個公正持平的民調機構所應採用的發布方式呢？」實在乃零步笑百步之見。

1. 話說回頭，除純文字檔案外，有何檔案格式不須「特定軟件」開啓？開張圖都要「小畫家」或「預覽程式」啦
2. 友站指0分人仕為極端評分，同情地理解，友站可能視0分人仕為outliers。如是者，友站卻未有詳述其outliers之定義，及未有排除bimodal distribution 之可能性。

作者：SweetSourPork

閱讀後覺得好，請多多讚好及分享～：）