你老母TVB 係咪傻撚左呀?

 

話說星期四晚係創興食緊雞煲,岩岩入座就見到電視播緊果個打靶節目《東張西望》。本來想用手上有遙控功能嘅LG手機轉去睇《歲月留聲》,不過竟然俾我見到好耐無見嘅劉家輝師傅,平時夜晚睇烈火雄心見到佢中氣十足,搞到而家咁其實真係好令人心酸。於是我打消逼全場人睇歲月留聲嘅念頭,繼續睇東張西望。

我屌,真係誓估唔到俾我睇到如此冷血嘅一幕。

詳細內容無謂大費周章講太多,有興趣嘅可以睇下蘋果篇報導。大概就係TVB安排左劉師傅返TVB「探下老朋友」,再加「參觀電視城」咁。成件事一開波就已經令我起撚曬雞皮,樂易玲帶住一班稍為年長嘅藝人就同劉師傅打招呼,之後東張西望嘅林映輝就好虛偽咁問師傅「開唔開心呀?」。屌,點解要逼人係百幾萬觀眾(如果TVB仲有百幾萬觀眾)話「好開心呀!」咁呢?

最最最最最最最仆街係呢一幕──你老味師傅俾人捉住左係古裝街嘅城樓影大合照,然後當然唔少得仲有一班報紙雜誌嘅傳媒跟住一齊影,等第二日TVB就可以見報建立良好企業形象咁話。呢個時候阿主持林映輝竟然無撚啦啦捉住師傅塊面,問佢有無笑。師傅答無。然後阿主持竟然篤撚住師傅塊面同師傅講,「見到佢地咁開心,笑啦?!」(我無誇張,唔信嘅自己睇返。)無撚嘢下?你逼一個中左風,面部肌肉癱瘓嘅病人為左同你做Show而去扭曲肌肉?!

 

癡撚線!真係癡撚線!你老母TVB係咪傻撚左呀?

 

再騎呢啲嘅真係接踵而至。無啦啦又話劉師傅好撚鍾意睇《愛回家》跟住推佢入愛回家個廠,我屌,你要救亡嘅不如推人去睇《西遊記》話佢好撚鍾意睇,之後逼佢攞住支金剛棒耍兩招啦,笨?再將師傅推嚟推去之後又見到岳華,師傅今次似乎真係好激動,眼淚水都標埋。但係我真係唔明,阿輝仔點解你係要夾硬問師傅係咪好感動呢?點解人地第一次唔答你你仲要追問人地逼人答係呢?你係咪傻撚左呀?推師傅去食飯,旁白洗唔洗講咩師傅飲左兩碗湯好叻仔呀?人地中風姐,幾時變埋弱智呀仆街?究竟《東張西望》呢個節目,知唔知咩叫尊重,咩叫血性?我唔明白點解仲要送隻TVBUDDY 囉?好嘔心呀你老母!

 

癡撚線,真係講十次癡撚線都形容唔到我嘅激動,真係癡撚線!姐係咁,你利用一個病人去做Show,已經好可恥,唔好同我講啲咩佢其實成件事都係好,等個病人可以探下老朋友──啱,exact7ly,如果無《東張西望》堆仆街攝製隊跟住嘅話。就算我俾你要攞彩,你咪係咁二影兩張相,擺響你個仆街《東張西望》到播囉?當一件本來係好事嘅嘢做過龍,果件事就係柒。而去到今日《東張西望》呢個地步就已經唔係柒咁簡單,係無恥,係冷血。你用呢個垃圾節目攻擊對手港視,我忍。你用呢個垃圾節目幫你套侮辱觀眾嘅《西遊記》打飛機,我忍。但係你竟然你用呢個垃圾節目,去叫一個中風嘅老人家幫你做show擠出笑容,我真係忍唔到。我唔明白今時今日呢個所謂大台竟然可以無任何嘢值得宣傳,而要靠一個病人嚟幫自己打飛機,塑造自己良好企業嘅形象。仆街啦你,無線。劉師傅中風已經唔係呢兩日嘅事,三年嚟你做左啲咩?好喇,當大眾焦點因為呢個老人家打官司而聚焦左落人地到,你就攞人嚟做宣傳品,點解可以咁無恥?仲要完左都仲要攞句彩,講乜撚嘢TVB真係大家庭──你仆街啦!當啲觀眾傻架?講呢句嘢果個到底有無廉恥架?

 

今時今日嘅TVB已經唔係拍鳩劇,買柒片咁簡單。當呢個台已經可以利用一個病人嚟幫自己塑造形象果陣,其實已經無得救。不過咁,學健吾講一句,『看了一個「叫一個中風的老人笑」的電視節目而覺得沒問題,比「叫一個中風的老人笑」更刻薄』。唔好笑,真係有人覺得TVB今次好善良架。

香港已經去到一個睇電視都睇到心寒嘅地步,真係好可悲。而去到呢一步,我都竟然只可以選擇強國《西遊記》,或者係夠膽死攞套十幾年前嘅劇擺黃金時段重播再重播嘅亞視,仲可悲。

 

作者:大埔陳奕迅

來自「九龍三大」的聯合道大學,現正修讀水泡科。對社會現狀不忿,渴望我的文字能為你帶來哪怕只是一點點的改變。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 71867
Date: 2014-05-10 01:40:39
Generated at: 2019-11-12 05:14:00
Permalink: https://www.vjmedia.com.hk/articles/2014/05/10/71867/你老母tvb-係咪傻撚左呀?